നിർത്തിയിട്ട ട്രാവലർ മുന്നോട്ടുനീങ്ങി; അടിയില്പെട്ട് ഡ്രൈവർക്ക് ദാരുണാന്ത്യം
text_fieldsമൂവാറ്റുപുഴ: വീടിന് മുന്നിൽ ട്രാവലർ പാർക്ക് ചെയ്തശേഷം നടക്കുകയായിരുന്ന യുവാവ്, മുന്നോട്ട് നീങ്ങിയ അതേ വാഹനത്തിനടിയിൽപെട്ട് മരിച്ചു. വാഹനത്തിന്റെ ഡ്രൈവർ വാളകം കുന്നയ്ക്കാല് തേവര്മഠത്തില് നന്ദുവാണ് (25) മരിച്ചത്.
വ്യാഴാഴ്ച ഉച്ചക്ക് 12ഓടെയാണ് അപകടമുണ്ടായത്. വീടിന് സമീപം നിർത്തിയിട്ടശേഷം നടക്കുന്നതിനിടെയാണ് ട്രാവലർ മുന്നോട്ടുനീങ്ങുന്നത് ശ്രദ്ധയിൽപെട്ടത്. റോഡിലേക്ക് നീങ്ങാതിരിക്കാൻ ട്രാവലറിനുള്ളിൽ കയറാൻ ശ്രമിക്കവേ പിടിവിട്ട് അടിയിലേക്ക് വീഴുകയായിരുന്നു. സമീപത്തെ കിടങ്ങിലെ കെട്ടിൽ ഇടിച്ച് ട്രാവലർ നിന്നതോടെ നന്ദു അതിനടിയിൽ കുടുങ്ങുകയും ദേഹത്തുകൂടി വാഹനം കയറിയിറങ്ങുകയുമായിരുന്നു.
അപകടം നേരില്ക്കണ്ട പ്രദേശവാസികള് ചേര്ന്ന് എക്സ്കവേറ്റർ എത്തിച്ച് വാഹനം ഉയര്ത്തിയാണ് നന്ദുവിനെ പുറത്തെടുത്തത്. ഉടൻ മൂവാറ്റുപുഴയിലെ സ്വകാര്യ ആശുപത്രിയില് പ്രവേശിപ്പിച്ചെങ്കിലും രക്ഷിക്കാനായില്ല. മൂവാറ്റുപുഴ പൊലീസും അഗ്നിരക്ഷാസേനയും സ്ഥലത്തെത്തി നടപടി സ്വീകരിച്ചു.
മൃതദേഹം മൂവാറ്റുപുഴ ജനറല് ആശുപത്രിയിലെ പോസ്റ്റ്മോര്ട്ടത്തിനുശേഷം ബന്ധുക്കള്ക്ക് വിട്ടുനല്കും. സംസ്കാരം പിന്നീട്. പിതാവ്: സജി. മാതാവ്: സിന്ദു. സഹോദരന്: അനന്തു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.