വഞ്ചിയൂ​ർ സബ്​ ട്രഷറി തട്ടിപ്പ്​ കേസ്​ ​പ്രതി ബിജുലാലിനെ പിരിച്ചുവിടും

തിരുവനന്തപുരം: വഞ്ചിയൂർ സബ്​ ട്രഷറി തട്ടിപ്പ്​ കേസ്​ പ്രതി ബിജുലാലിനെ സർവിസിൽനിന്ന്​ പിരിച്ചുവിടാൻ തീരുമാനം. സബ്​ ട്രഷറിയിലെ സീനിയർ അക്കൗണ്ടൻറായിരുന്നു ഇദ്ദേഹം.

ധനകാര്യമന്ത്രി തോമസ്​ ഐസകി​െൻറ അധ്യക്ഷതയിൽ ഫിനാൻസ് സെക്രട്ടറി ആർ.കെ. സിങ്​, എൻ.ഐ.സി ട്രഷറിയിലെ ഉയർന്ന ഉദ്യോഗസ്ഥർ എന്നിവരുടെ നേതൃത്വത്തിൽ ചേർന്ന ​യോഗത്തിനുശേഷമാണ്​ തീരുമാനം. നടപടി ക്രമങ്ങൾ പൂർത്തീകരിച്ച്​ കുറച്ചുദിവസങ്ങൾക്കുള്ളിൽ പിരിച്ചുവിടൽ ഉത്തരവിറങ്ങും. വെറുമൊരു ക്രമക്കേടല്ല, ഗുരുതരമായ സൈബർ കുറ്റകൃത്യമാണ്​ ബിജുലാൽ നടത്തിയതായി കണ്ടെത്തിയതെന്ന്​ ധനമന്ത്രി അറിയിച്ചു.

ധനവകുപ്പി​െൻറ മൂന്നു പേരും എൻ.ഐ.സിയുടെ ഒരാളും അടങ്ങുന്ന പ്രത്യേക അന്വേഷണസംഘത്തെ സംഭവങ്ങൾ സമഗ്രമായി പരിശോധിച്ച് റിപ്പോർട്ട് നൽകുന്നതിന് നിയോഗിച്ചു​. അഞ്ച് ദിവസത്തിനുള്ളിൽ റിപ്പോർട്ട് സമർപ്പിക്കണം. ഈ റിപ്പോർട്ടി​െൻറ അടിസ്ഥാനത്തിൽ മുകളിലുള്ള ഉദ്യോഗസ്ഥരുടെ ഭാഗത്തുനിന്ന്​ വീഴ്ചയുണ്ടായിട്ടുണ്ടെങ്കിൽ അത്​ ​കണ്ടെത്തി നടപടിയെടുക്കുമെന്നും ഈ തട്ടിപ്പിൽ വഞ്ചിയൂർ ട്രഷറിയിലെ മറ്റുള്ളവരുടെ പങ്ക് പരിശോധിക്കുമെന്നും മന്ത്രി ഫേസ്​ബുക്​ പോസ്​റ്റിലൂടെ അറിയിച്ചു.

തട്ടിപ്പു കണ്ടുപിടിച്ച എസ്.ടി.ഒ ബാബു പ്രസാദ് ഒഴികെ വഞ്ചിയൂർ ട്രഷറിയിലെ മുഴുവൻ ഉദ്യോഗസ്ഥരെയും താൽക്കാലികമായി സ്ഥലം മാറ്റും. വീണ്ടും ട്രഷറി സോഫ്റ്റ്​ വെയർ സെക്യുരിറ്റി ഓഡിറ്റിനു വിധേയമാക്കും. ഇതിനു പുറമേ ഫങ്ഷൻ ഓഡിറ്റ് നടത്തുന്നതിന് എൻ.ഐ.സിയുടെയും ട്രഷറി ഐ.ടി സെല്ലി​െൻറയും സംയുക്ത ടീമിനു രൂപം നൽകും. സമാന സംഭവങ്ങൾ വേറെ ഉണ്ടായിട്ടുണ്ടോയെന്ന്​ പരിശോധിക്കുമെന്നും മന്ത്രി അറിയിച്ചു.