കാർ ആറ്റിൽ വീണ്​ രണ്ടുപേർ മരിച്ചു

കോട്ടയം: കുമരകം-ചേർത്തല റൂട്ടിൽ കൈപ്പുഴമുട്ട്​ പാലത്തിന്​ താഴെ കാർ ആറ്റിലേക്ക്​ മറിഞ്ഞ് രണ്ടുപേർ മരിച്ചു. മഹാരാഷ്ട്രയിൽ സ്ഥിരതാമസക്കാരനായ കൊല്ലം ഓടനാവട്ടം സ്വദേശി ജയിംസ് ജോർജ്, മഹാരാഷ്ട്ര താനെ ബദ്​ലാപുർ സ്വദേശി രാജേന്ദ്ര സർജെയുടെ മകൾ ​സൈലി രാജേന്ദ്ര സർജെ എന്നിവരാണ്​ മരിച്ചത്​. കാറിൽ കൂടുതൽ പേരുണ്ടായിരുന്നോയെന്നും സംശയമുണ്ട്​. അതിനുള്ള തിരച്ചിൽ രാത്രി വൈകിയും തുടരുകയാണ്​. കാറിൽ ഒരു കുഞ്ഞുണ്ടായിരുന്നതായും പറയപ്പെടുന്നു.

തിങ്കളാഴ്ച രാത്രി എട്ടരക്കുശേഷമാണ്​ സംഭവം. കുമരകം ഭാഗത്തുനിന്ന്​ വന്ന കാർ കൈപ്പുഴമുട്ട് പാലത്തിന്‍റെ ഇടതുവശത്തെ സർവിസ് റോഡ് വഴി ആറ്റിലേക്ക്​ വീഴുകയായിരു​ന്നെന്ന്​ ദൃക്സാക്ഷികൾ പറയുന്നു. കാറിനുള്ളിൽനിന്ന്​ നിലവിളി കേട്ട് നാട്ടുകാർ ഓടിയെത്തിയപ്പോൾ കാർ വെള്ളത്തിൽ മുങ്ങിത്താഴുന്നതാണ്​ കണ്ടത്​. ഹൗസ്​ബോട്ടുകൾ സഞ്ചരിക്കുന്ന ഏറെ ആഴമുള്ള ആറ്റിലേക്കാണ്​ കാർ മുങ്ങിത്താഴ്ന്നത്​. വഴി പരിചയമില്ലാത്തതാണ്​ അപകടകാരണമായതെന്നും ഗൂഗിൾ മാപ്പ്​ ഉപയോഗിച്ച്​ വന്നതിലെ ആശയക്കുഴപ്പമാണോ അപകടത്തി​േലക്ക്​ വഴി​െവച്ചതെന്നും​ സംശയിക്കുന്നു. എറണാകുളം രജിസ്ട്രേഷനിലുള്ളതാണ്​ കാർ. എറണാകുളത്തുനിന്ന്​ വാടകക്കെടുത്തതാണ്​ കാർ. കുമരകം സന്ദർശിച്ചശേഷം മടങ്ങുകയായിരുന്നുവെന്നാണ്​ സൂചന. അരമണിക്കൂറിലേറെ കാർ വെള്ളത്തിൽ മുങ്ങിക്കിടന്നു.

മഴയും പ്രദേശത്തെ ഇരുട്ടും രക്ഷാപ്രവർത്തനത്തെ പ്രതികൂലമായി ബാധിച്ചു. അരമണിക്കൂറിലേറെയുള്ള പ്രയത്നത്തിനൊടുവിലാണ്​ കാർ ആറ്റിൽനിന്ന്​ ഉയർത്തിയത്​. കാറിൽ കണ്ടെത്തിയ രണ്ടുപേരെയും കോട്ടയം മെഡിക്കൽ കോളജിലേക്ക്​ കൊണ്ടുപോയെങ്കിലും വഴിമധ്യേ മരണം സ്ഥിരീകരിക്കുകയായിരുന്നു. നാട്ടുകാരും അഗ്നിരക്ഷാസേനാ സ്കൂബാ ടീമംഗങ്ങളും വടം ഉപയോഗിച്ച്​ കെട്ടിവലിച്ചാണ്​ കാർ കരക്കെത്തിച്ചത്​. കോട്ടയം, വൈക്കം ഭാഗത്ത്​ നിന്നുള്ള അഗ്നിരക്ഷാ സേനാ യൂനിറ്റുകളും ഗാന്ധിനഗർ, കുമരകം പൊലീസും നാട്ടുകാർക്കൊപ്പം രക്ഷാപ്രവർത്തനത്തിനുണ്ടായിരുന്നു​