യൂനിവേഴ്​സിറ്റി കോളജിൽ വിദ്യാർഥിനിയുടെ ആത്മഹത്യാശ്രമം; മനുഷ്യാവകാശ കമീഷൻ കേസെടുത്തു

തിരുവനന്തപുരം: എസ്.എഫ്.ഐയുടെ അതിരുവിട്ട സംഘടനാപ്രവർത്തനം മൂലം പഠിക്കാൻ കഴിയുന്നില്ലെന്നാരോപിച്ച് യൂനിവേഴ്സിറ്റി കോളജിൽ ഒന്നാംവർഷ കെമിസ്ട്രി ബിരുദ വിദ്യാർഥിനി ആത്മഹത്യക്ക് ശ്രമിച്ച സംഭവത്തിൽ മനുഷ്യാവകാശ കമീഷൻ സ്വമേധയാ കേസെടുത്തു. സംഭവം കോളജ്​്​ പ്രിൻസിപ്പലും കോളജ്​ വിദ്യഭ്യാസ ഡയറക്​ടറും അന്വേഷിച്ച്​ ഒരു മാസത്തിനകം റിപ്പോർട്ട്​ നൽകണമെന്നും കമീഷൻ ഉത്തരവിട്ടു.

വ്യാഴാഴ്ച മുതൽ പെൺകുട്ടിയെ കാണാനില്ലെന്ന് കാണിച്ച് രക്ഷാകർത്താക്കൾ പൊലീസിൽ പരാതി നൽകിയിരുന്നു. വെള്ളിയാഴ്ച രാവിലെ കാമ്പസിനകത്തെ ലേഡീസ് റൂമിൽ രക്തം വാർന്നുകിടക്കുന്ന നിലയിലാണ്​ പെൺകുട്ടിയെ കണ്ടെത്തിയത്. തുടർന്ന് പൊലീസെത്തി​ ആശുപത്രിയിൽ പ്രവേശിപ്പിക്കുകയായിരുന്നു. അപകടനില തരണം ചെയ്തതായി ആശുപത്രി വൃത്തങ്ങൾ അറിയിച്ചു.

പരീക്ഷ സമയത്തും ക്ലാസ് സമയങ്ങളിലും വിദ്യാർഥി യൂനിയന്‍ നേതാക്കള്‍ നിര്‍ബന്ധിച്ച് ക്ലാസില്‍നിന്ന്​ പുറത്തിറക്കി പരിപാടികള്‍ക്ക്​ പങ്കെടുപ്പിക്കുന്നതായും ക്ലാസുകളിൽ കയറാൻ കഴിയാത്തതിനാൽ ഇ​േൻറണല്‍ മാര്‍ക്കില്‍ കുറവുണ്ടാകുന്നെന്നും ആരോപിക്കുന്ന രണ്ടുപേജുള്ള ആത്മഹത്യകുറിപ്പ്​ പൊലീസ്​ കണ്ടെടുത്തിരുന്നു. എന്നാൽ ആത്​മഹത്യാ കുറിപ്പിലെ ആരോപണങ്ങൾ ഇന്ന്​ മൊഴി എടുക്കാൻ പൊലീസ്​ എത്തിയപ്പോൾ പെൺകുട്ടി ഉന്നയിച്ചില്ല. തനിക്ക്​ പരാതി ഇല്ലെന്നായിരുന്നു മൊഴി​. ഇത്​ കോടതിയിലും ആവർത്തിച്ചു.

​എസ്​.എഫ്​.ഐയുടെ അമിത സംഘടാ പ്രവർത്തനം മൂലം ക്ലാസുകൾ നഷ്​ടമാകുന്നത്​ സംബന്ധിച്ച്​ പ്രിൻസിപ്പലിനോട് നേരിട്ട് പരാതി പറഞ്ഞെങ്കിലും യാതൊരു നടപടിയുമെടുത്തില്ലെന്ന്​ ഇന്നലെ പെൺകുട്ടി പൊലീസിന്​ മൊഴി നൽകിയിരുന്നു​. പരാതിയെക്കുറിച്ചറിഞ്ഞ എസ്.എഫ്.ഐ നേതൃത്വം ഭീഷണിപ്പെടുത്തി. സുഹൃത്തുകളിൽനിന്ന്​ ഒറ്റപ്പെടുത്തി, കളിയാക്കി. എല്ലാവരും ഒരുമിച്ച് നില്‍ക്കണമെന്നും ഇതിനെതിരെ പ്രതികരിക്കണമെന്നും ആവശ്യപ്പെട്ടെങ്കിലും സംഘടനക്കെതിരായതിനാല്‍ ആരും ഒപ്പം നിന്നില്ല. ഇതോടെയാണ് ആത്മഹത്യക്ക് ശ്രമിച്ചതെന്നായിരുന്നു പെൺകുട്ടി പൊലീസിനോട് പറഞ്ഞത്​. എന്നാൽ ഇന്ന്​ വിശദ മൊഴി എടുക്കാൻ പൊലീസ്​ എത്തിയപ്പോൾ പരാതിയില്ലെന്ന്​ അറിയിക്കുകയായിരുന്നു.

നന്നായി പഠിക്കുന്ന പെണ്‍കുട്ടി കോളജിലെ ക്ലാസുകള്‍ നഷ്​ടപ്പെടുന്നതിനെക്കുറിച്ച് നേരത്തേയും സമൂഹമാധ്യമങ്ങളിലൂടെ പ്രതികരിച്ചിരുന്നു. യൂനിയൻ മീറ്റിങ്ങുകൾ ക്ലാസ് റൂമിൽ നടത്തുന്നതുമൂലം അധ്യാപകർ ക്ലാസിൽ കയറാറി​ല്ലെന്നും നേരത്തേ എഴുതിയിട്ടുണ്ട്​. കേന്ദ്രമാനവ വിഭവശേഷി മന്ത്രാലയത്തി​​​െൻറ കീഴിലുള്ള നാഷനൽ ഇൻസ്​റ്റിറ്റ്യൂഷനല്‍ റാങ്കിങ് ഫ്രെയിം വര്‍ക്കി​​​െൻറ ദേശീയ റാങ്ക് പട്ടികയില്‍ ഒന്നാം സ്ഥാനം നേടിയ യൂനിവേഴ്‌സിറ്റി കോളജിലെ പഠന അന്തരീക്ഷത്തെക്കുറിച്ചാണ് ഗുരുതരമായ ആരോപണം.