സത്യപ്രതിജ്ഞയിൽ ഉപയോഗിച്ചത്​ വിവാദമായി; 'പ്രഫസർ' ഒഴിവാക്കി മന്ത്രി ആർ. ബിന്ദു

തിരുവനന്തപുരം: മന്ത്രിയായുള്ള സത്യപ്രതിജ്ഞയിൽ പേരിനൊപ്പം പ്രഫസർ ഉപയോഗിച്ച ആർ. ബിന്ദു നിയമസഭാംഗമായി സത്യവാചകം ചൊല്ലിയപ്പോൾ അത്​ ഒഴിവാക്കി. തൃശൂർ ശ്രീ കേരളവർമ കോളജിൽ ഇംഗ്ലീഷ്​ വിഭാഗത്തിൽ അസോസിയേറ്റ്​ പ്രഫസറായിരുന്ന ബിന്ദു മന്ത്രിസഭാംഗമായപ്പോൾ പേരിനൊപ്പം പ്രഫസർ ചേർത്തുപറഞ്ഞത്​ വിവാദമായിരുന്നു.

ഇത്​ സമൂഹമാധ്യമങ്ങളിലടക്കം ചർച്ചയായി. ഇതിന്​ പിന്നാലെയാണ്​ സഭാംഗമായുള്ള സത്യവാചകത്തിൽനിന്ന്​ മന്ത്രി ബിന്ദു പ്രഫസർ പദവി ഒഴിവാക്കിയത്​. എന്നാൽ, സത്യവാചകം ചൊല്ലു​േമ്പാൾ സഭയിലെ സ്​ക്രീനിൽ പ്രഫസർ പദവി കൂടി ചേർത്താണ്​ പേര്​ തെളിഞ്ഞത്​. കൂടാതെ ഫേസ്​ബുക്കിലെ ഇവരുടെ ഔദ്യോഗിക പേജിലും പ്രഫസർ എന്നുണ്ട്​.