വാഗമൺ സിമി ക്യാമ്പ്​; പ്രതിയുടെ തിരിച്ചറിയൽ പരേഡിന്​ അനുമതി

കൊച്ചി: വാഗമൺ സിമി ക്യാമ്പ്​ കേസിലെ പ്രതിയുടെ തിരിച്ചറിയൽ പരേഡിന്​ അനുമതി. കഴിഞ്ഞ ദിവസം കോടതിയി​ൽ ഹാജരാക്കിയ കേസിലെ 37ാം പ്രത​ി മുംബൈ സ്വദേശി അബുൽ സുബ്​ഹാൻ ഖുറൈശിയുടെ തിരിച്ചറിയൽ പരേഡ്​ നടത്താനാണ്​ എറണാകുളം ജുഡീഷ്യൽ മജിസ്​ട്രേറ്റ്​ കോടതി അനുമതി നൽകിയത്​. കാക്കനാട്​ ജില്ല ജയിലിൽ തിരിച്ചറിയൽ പരേഡ്​ നടത്താനായി കാക്കനാട്​ ജുഡീഷ്യൽ ഫസ്​റ്റ്​ ക്ലാസ്​ മജിസ്​ട്രേറ്റിനെയാണ്​ ചുമതലപ്പെടുത്തിയിരിക്കുന്നത്​. എന്ന്​ പരേഡ്​ നടത്തണമെന്ന കാര്യം മജിസ്​ട്രേറ്റാവും തീരുമാനിക്കുക.

ഡിസംബർ 10 മുതൽ 12 വരെ കോട്ടയം വാഗമണ്ണിലെ തങ്ങൾപാറയിൽ സിമി പ്രവർത്തകർ രഹസ്യ യോഗം ചേർന്ന്​ ആയുധ പരിശീലനം നടത്തിയെന്നാണ്​ കേസ്​. ക്യാമ്പിനുവേണ്ട പണം സ്വ​രൂപിച്ചത്​ ഖുറൈശിയാണെന്നാണ്​ എൻ.​െഎ.എയുടെ ആരോപണം. വിദേശത്തായിരുന്ന പ്രതി അടുത്തിടെ തിരികെ വരുന്നതിനിടെ ഡൽഹി വിമാനത്താവളത്തിൽവെച്ചാണ്​ പിടിയിലായത്​. അഹ്​മദാബാദ്​ സ്​ഫോടനവുമായി ബന്ധപ്പെട്ട്​ രജിസ്​റ്റർ ചെയ്​ത നിരവധി കേസുകളിലും ഇയാൾ പ്രതിയാണ്​.

കോടതി പുറപ്പെടുവിച്ച പ്രൊഡക്​ഷൻ വാറൻറി​​​​െൻറ അടിസ്ഥാനത്തിൽ ഗുജറാത്ത്​ പൊലീസാണ്​ കഴിഞ്ഞ ഏഴിന്​ പ്രതിയെ ​കൊച്ചിയിലെത്തിച്ചത്​. 37 പ്രതികളുള്ള കേസിൽ 35 പ്രതികൾക്കെതിരായ വിചാരണയുടെ അന്തിമ വിധി ഇൗ മാസം 15ന്​ നടക്കും. ഇനി ഒരു പ്രതി മാത്രമാണ്​ പിടിയിലാകാനുള്ളത്​.