വർക്കല കടലിൽ കുളിക്കാനിറങ്ങിയ യുവാക്കൾ മുങ്ങി മരിച്ചു

വർക്കല: വർക്കല കടലിൽ കുളിക്കാനിറങ്ങിയ മൂന്ന് യുവാക്കൾ മുങ്ങി മരിച്ചു. തമിഴ്നാട് കോയമ്പത്തൂർ പല്ലടം സ്വദേശി അജയ് വിഘ്‌നേശ്​ (24), വർക്കല പാലച്ചിറ രഘുനാഥപുരം പി.എസ് സദനത്തിൽ അജീഷ് (29), ആലംകോട് വഞ്ചിയൂർ പുതിയതടം ഡ്രീം മഹലിൽ മാഹീൻ (30) എന്നിവരാണ് മരിച്ചത്. ഞായറാഴ്ച വൈകുന്നേരം വ്യത്യസ്ത അപടങ്ങളിലാണ്​ മൂന്ന് യുവാക്കളുടെയും ജീവൻ കടൽ കവർന്നത്.

അജയ് വിഘ്നേശ്​​ ഉൾപ്പെടുന്ന കോയമ്പത്തൂരിൽ നിന്നെത്തിയ അഞ്ചംഗ സംഘമാണ് ആദ്യം അപകടത്തിൽപെട്ടത്. ഞായറാഴ്ച വൈകുന്നേരം നാലോടെ ഇവർ ഇടവ ഓടയം കടപ്പുറത്ത് കുളിക്കാൻ എത്തി. കടലിൽ കുളി കഴിഞ്ഞ് അഞ്ചുപേരും കരക്കെത്തിയെങ്കിലും അജയ് വിഘ്നേശും സുഹൃത്ത്​ ബാല ശിവരാമനും (23) വീണ്ടും കടലിലിറങ്ങി. തിരയിലകപ്പെട്ട ഇവർ ചുഴിയിൽ താഴ്ന്നുപോകുകയായിരുന്നു.

സുഹൃത്തുക്കൾ നിലവിളിച്ചതിനെ തുടർന്ന് മത്സ്യത്തൊഴിലാളികളാണ് രണ്ടുപേരെയും രക്ഷിച്ച് കരയിലെത്തിച്ചത്. വർക്കലയിലെ സ്വകാര്യ ആശുപത്രിയിൽ എത്തിച്ചെങ്കിലും അജയ് വിഘ്‌നേശ്​ മരിച്ചു. കോയമ്പത്തൂരിൽ ദന്ത ഡോക്ടറാണ്​. ഗുരുതരാവസ്ഥയിൽ ആശുപത്രിയിൽ ചികിത്സയിലുള്ള ബാല ശിവരാമൻ മെക്കാനിക്കൽ എൻജിനീയർ ആണ്.

വൈകുന്നേരം അഞ്ചര​േയാടെ പാപനാശം ബലി മണ്ഡപത്തിനും ആലിയിറക്കത്തിനും മധ്യേ ഏണിക്കര ബീച്ചിലാണ്​ രണ്ടാമത്തെ അപകടം. വർക്കല കോടതിയിലെ ഡി.ടി.പി ഓപറേറ്ററായ അജീഷ് രണ്ട് സുഹൃത്തുക്കൾക്കൊപ്പം കടലിൽ കുളിക്കവെ തിരയിൽപെട്ട്​ മുങ്ങുകയായിരുന്നു.

തീരത്തുണ്ടായിരുന്നവരുടെ ബഹളം കേട്ട് ഓടിയെത്തിയവർ രക്ഷിച്ച് ആശുപത്രിയിൽ പ്രവേശിപ്പിച്ചെങ്കിലും മരിച്ചു. പുഷ്പാംഗദൻ-സരസ്വതി ദമ്പതികളുടെ മകനാണ് അജീഷ്. ഭാര്യ: ആതിര. മകൻ: ആദിദേവ്. ഒരു സഹോദരിയുണ്ട്.

അഞ്ചേമുക്കാലോടെയാണ് കാപ്പിൽ പൊഴിയിൽ അടുത്ത അപകടം നടന്നത്. മാഹീനും സുഹൃത്തുക്കൾക്കൊപ്പമാണ് കാപ്പിൽ തീരത്തെത്തിയത്. പൊഴിമുഖത്ത് കുളിക്കവെയാണ് മാഹീനും തിരയിലകപ്പെട്ടത്. മത്സ്യത്തൊഴിലാളികളും നാട്ടുകാരും ചേർന്ന് രക്ഷപ്പെടുത്തി ആശുപത്രിയിൽ എത്തിച്ചെങ്കിലും മരിച്ചു. ഭാര്യ: നഫിയ. രണ്ടു മക്കളുണ്ട്.