വി.സി നിയമനം: തനിക്ക്​ പൂർണ അധികാരമെന്ന്​ ഗവർണർ

തിരുവനന്തപുരം: വൈസ്​ ചാൻസലർ നിയമനത്തിൽ തനിക്ക്​ പൂർണ അധികാരമുണ്ടെന്നും പരാതിയുണ്ടെങ്കിൽ ഉന്നത വിദ്യാഭ്യാസമന്ത്രിക്ക്​ കോടതിയിൽ പോകാമെന്നും​ ഗവർണർ ആരിഫ്​ മുഹമ്മദ്​ ഖാൻ.

സർവകലാശാല നിയമപ്രകാരവും യു.ജി.സി റെഗുലേഷൻ പ്രകാരവും ചാൻസലറിൽ നിക്ഷിപ്​തമായ അധികാരം ഉപയോഗിച്ചാണ്​ സാ​ങ്കേതിക സർവകലാശാലയിലും ഡിജിറ്റൽ സർവകലാശാലയിലും വി.സി നിയമനം നടത്തിയതെന്നും ഗവർണർ പറഞ്ഞു.

ഹൈകോടതിയിൽ നിന്ന്​ രണ്ടുദിവസം മുമ്പ്​ വ്യക്തത ലഭിച്ച ശേഷമാണ് വി.സി നിയമനം നടത്തിയത്​. വി.സി നിയമനത്തില്‍ ചാൻസലർക്ക്​ പൂര്‍ണ അധികാരമുണ്ടെന്നാണ് ഹൈകോടതി വ്യക്തമാക്കിയത്​. ഉന്നത വിദ്യാഭ്യാസമന്ത്രിയുടെ അഭിപ്രായങ്ങള്‍ക്ക് മറുപടി പറയാന്‍ താനില്ലെന്നും മന്ത്രിക്ക് അഭിപ്രായപ്രകടനം നടത്താനുള്ള എല്ലാ അവകാശവുമുണ്ടെന്നും ഗവര്‍ണര്‍ പറഞ്ഞു.

ഹൈകോടതിയിൽ നിന്നുള്ള വ്യക്തത ആവശ്യമായതിനാലാണ്​ രണ്ട്​ സർവകലാശാലകളിലും ഒരു മാസമായി താൻ വി.സി നിയമനം നടത്താതിരുന്നത്​ - ഗവർണർ പറഞ്ഞു.