സമുദായങ്ങൾ തമ്മിൽ അടിച്ചോ​ട്ടെ എന്ന മട്ടിൽ സർക്കാർ നോക്കുകുത്തിയാകുന്നു -വി.ഡി. സതീശൻ

മലപ്പുറം: സാമുദായങ്ങൾക്കിടയിൽ ഭിന്നത സൃഷ്​ടിക്കുന്ന പാലാ ബിഷപ്പിന്‍റെ വിവാദ പ്രസ്​താവനയുടെ പശ്​ചാത്തലത്തിൽ രംഗം കൂടുതൽ വഷളാവാതെ നോ​ക്കേണ്ട സർക്കാർ നോക്കുകുത്തിയായി നിൽക്കുകയാണെന്ന്​ പ്രതിപക്ഷ നേതാവ്​ വി.ഡി സതീശൻ എംഎൽ.എ. സി.പി.എമ്മിന്​ ഇതിനകത്ത്​ ഒരു നിഗൂഡ അജണ്ട ഉണ്ടോ എന്ന്​ സംശയിക്കുന്ന തരത്തിലാണ്​ പാർട്ടിയുടെ സംസ്​ഥാന സെക്രട്ടറിയുടെ പ്രതികരണമെന്നും അദ്ദേഹം മലപ്പുറത്ത്​ മാധ്യമങ്ങളോട്​ വ്യക്​തമാക്കി.

ഫെയ്​ക്ക്​ ഐ.ഡികൾ സമൂഹമാധ്യമങ്ങളിലൂടെ വ്യാപകമായി രണ്ട്​ സമുദായങ്ങളെ തമ്മിലടിപ്പിക്കാനുള്ള ശ്രമം നടത്തുന്നുണ്ട്​. ഒരു സംഘപരിവാർ അജണ്ട ഇതിനുപിന്നിലുണ്ട്​. സമുദായങ്ങൾ തമ്മിൽ അടിച്ചോ​ട്ടെ എന്ന മട്ടിൽ സർക്കാർ നോക്കുകുത്തിയായി നിൽക്കുകയാണ്​. ഇത്​ ശരിയല്ല. സി.പി.എമ്മിന്​ ഇക്കാര്യത്തിൽ ഒരു നയവുമില്ല. ഇതിനകത്ത്​ ഒരു നിഗൂഡ അജണ്ട അവർക്കുണ്ടോ എന്ന്​ സംശയിക്കുന്ന തരത്തിലാണ്​ പാർട്ടിയുടെ സംസ്​ഥാന സെക്രട്ടറി ഇതിനോട്​ പ്രതികരിക്കുന്നത്​.

ഞങ്ങൾ ഇതിനകത്ത്​ കക്ഷി ചേരുന്നില്ല. രണ്ടുസമുദായങ്ങൾ തമ്മിൽ പ്രശ്​നമുണ്ടാകു​​േമ്പാൾ ഇരുകൂട്ടരോടും സംയമനം പാലിക്കാനാണ്​ ഞങ്ങൾ ആവശ്യപ്പെടുന്നത്​. ഒരുതരത്തിലും ആ സംഘർഷം വലുതാവാതിരിക്കാനുള്ള ശ്രമമാണ്​ ഞങ്ങൾ നടത്തുന്നത്​- സതീശൻ വ്യക്​തമാക്കി.

മുസ്​ലിം -ക്രിസ്ത്യൻ സമുദായങ്ങളെ തമിലടിപ്പിക്കാനുള്ള സംഘ പരിവാർ അജണ്ടയിൽ കേരളം വീണു പോവരുതെന്നും പരസ്പരം പാലൂട്ടി വളർത്തുന്ന ശത്രുക്കളാണ് തീവ്രവാദവും ഭീകരവാദവും പ്രോത്സാഹിപ്പിക്കുന്നതെന്നും കഴിഞ്ഞദിവസം സതീശൻ അഭിപ്രായപ്പെട്ടിരുന്നു.