വിദ്യ എസ്​.എഫ്​.ഐക്കാരിയല്ല -മന്ത്രി പി. രാജീവ്​

കളമശ്ശേരി: ഗെസ്റ്റ്​ ലെക്​ചറർ നിയമനത്തിന്​ വ്യാജരേഖ ചമച്ച കേസിൽ ഒളിവിൽ കഴിയുന്ന കെ. വിദ്യ എസ്​.എഫ്​.ഐ ​നേതാവല്ലെന്ന്​ മന്ത്രി പി. രാജീവ്​. ഒരുകാലത്ത്​ എസ്​.എഫ്​.ഐയുടെ ഭാഗമായി യൂനിയൻ ഭാരവാഹിയായിരുന്നു. തെറ്റ് ചെയ്തതായി കണ്ടെത്തിയാൽ കർശന നടപടി ഉണ്ടാകും.

ഒരു കുറ്റവാളിയെയും സംരക്ഷിക്കുന്ന സമീപനം സർക്കാറിനില്ലെന്നും അദ്ദേഹം മാധ്യമപ്രവർത്തകരോട്​ പറഞ്ഞു. നേരത്തേ പ്രവർത്തിച്ചിരുന്നു എന്നതുകൊണ്ട് അവരെ സംരക്ഷിക്കുക എന്നത് എസ്.എഫ്.ഐയുടെ ഉത്തരവാദിത്തമല്ല. ഈ ആരോപണങ്ങളെല്ലാം ചാരാൻ ഒരു സംഘടന വേണമെന്നല്ലാതെ എസ്.എഫ്.ഐക്കെതിരായ ആരോപണങ്ങളിൽ മറ്റൊന്നുമില്ല.

വിദ്യക്ക്​ പിഎച്ച്.ഡി ലഭിക്കാൻ താൻ ഇടപെട്ടെന്ന കെ.എസ്​.യു ആരോപണം അസംബന്ധമാണ്​. കേരളം പോലൊരു സംസ്ഥാനത്ത് വ്യാജ സർട്ടിഫിക്കറ്റ്​ ഉപയോഗിച്ച് ഒരാൾ രണ്ട് കോളജുകളിൽ പഠിപ്പിക്കുന്ന സാഹചര്യമുണ്ടായത് ആവർത്തിക്കാതിരിക്കാൻ ആവശ്യമായ മാറ്റങ്ങൾ കൊണ്ടുവരുന്നത്​ അതത് കോളജുകളും ഉന്നത വിദ്യാഭ്യാസ വകുപ്പും പരിശോധിക്കേണ്ടതാണെന്നും രാജീവ്​ പറഞ്ഞു.