കെ. സുധാകരനെതിരെ വിജിലന്‍സ് അന്വേഷണം; പരാതിക്കാരൻ മുൻ ഡ്രൈവർ

തിരുവനന്തപുരം: കെ.പി.സി.സി പ്രസിഡൻറ്​ കെ. സു​ധാകരനെതിരെ വിജിലൻസി​െൻറ പ്രാഥമിക അന്വേഷണം. സുധാകര​െൻറ മുൻ ഡ്രൈവർ പ്രശാന്ത്​ ബാബു നൽകിയ പരാതിയിലാണ്​ വിജിലൻസ്​ ഡയറക്​ടർ സുധേഷ്​കുമാർ പ്രാഥമിക അന്വേഷണത്തിന്​ നിർദേശിച്ചത്​. കോഴിക്കോട്​ വിജിലൻസ്​ എസ്​.പിക്കാണ്​ നിർദേശം.

കണ്ണൂർ ഡി.സി.സി ഓഫിസ്​ നിർമാണം, കെ. കരുണാകരന്‍ ട്രസ്​റ്റ്​​ എന്നിവയുമായി ബന്ധപ്പെട്ട്​ സാമ്പത്തികതിരിമറി നടത്തിയെന്ന പരാതിയിലാണ്​ പ്രാഥമിക അന്വേഷണം. പ്രാഥമിക പരിശോധനയിൽ കഴമ്പുണ്ടെന്ന്​ കണ്ടാൽ എഫ്​.​െഎ.ആർ രജിസ്​റ്റർ ചെയ്​ത്​ സമഗ്ര അന്വേഷണം നടത്തും.

ഞായറാഴ്​ച ഉച്ചക്കുശേഷം അന്വേഷണസംഘം പ്രശാന്തി​െൻറ കണ്ണൂർ പള്ളിക്കുന്നിലെ ഫ്ലാറ്റിലെത്തി മൊഴി രേഖപ്പെടുത്തി​. പരാതിയിൽ സൂചിപ്പിച്ച പണമിടപാടുമായി ബന്ധപ്പെട്ട ചില രേഖകൾ പ്രശാന്ത്​ അന്വേഷണസംഘത്തിന്​ കൈമാറി.

കെ. സുധാകരൻ കെ.പി.സി.സി പ്രസിഡൻറ്​ ആയതിനു​പിന്നാ​െല മുഖ്യമന്ത്രിയും സുധാകരനും കൊമ്പുകോർത്തിരുന്നു. ബ്രണ്ണൻ കോളജ്​ കാലം പറഞ്ഞ്​ ഇരുവരും പോരടിച്ചെങ്കിലും വേഗംതന്നെ കെട്ടടങ്ങി. ഇതിന്​ പിന്നാ​െലയാണ്​ സുധാകരനെതിരെ അന്വേഷണ നീക്കം.

സർക്കാർനീക്കത്തിനെതിരെ പ്രതിപക്ഷം വിമർശനവുമായി രംഗത്തെത്തി. ഭയപ്പെടുത്താൻ സർക്കാർ നോക്കേണ്ടെന്ന്​ പ്രതിപക്ഷനേതാവ്​ വി.ഡി. സതീശൻ പറഞ്ഞു. ലോക്​സഭ സ്​പീക്കറുടെ അനുമതിയില്ലാതെ പ്രാഥമിക പരിശോധന പോലും നടക്കില്ല. പ്രചാരണത്തിനും രാഷ്​ട്രീയനേതാക്കളെ അപമാനിക്കാൻ വേണ്ടിയുമാണിതെന്നും അദ്ദേഹം പറഞ്ഞു. കെ. സുധാകരൻ സർക്കാർനീക്കത്തോട്​ പ്രതികരിച്ചിട്ടില്ല.

2010ൽ കെ. കരുണാകര​െൻറ മരണത്തിനുശേഷമാണ്‌ കെ. സുധാകരൻ എം.പി ചെയർമാനായി ലീഡർ കെ. കരുണാകരൻ സ്‌മാരക ട്രസ്‌റ്റ്‌ രൂപവത്​കരിച്ചത്‌. ചിറക്കൽ കോവിലകത്തി​െൻറ ഉടമസ്ഥതയിലായിരുന്ന രാജാസ്‌ ഹയർസെക്കൻഡറി, യു.പി സ്‌കൂളുകളും ഏഴര ഏക്കർ സ്ഥലവും 16 കോടി രൂപക്ക്​ ​ വാങ്ങാൻ ട്രസ്‌റ്റ്​ തീരുമാനിച്ചിരുന്നു. എന്നാൽ കോടികൾ സമാഹരിച്ചശേഷം സുധാകരൻതന്നെ ചെയർമാനായി കണ്ണൂർ എജ്യ​ുപാർക്ക്‌ എന്ന സ്വകാര്യ കമ്പനി രൂപവത്​കരിച്ചു. ഈ കമ്പനിയുടെ പേരിൽ സ്‌കൂൾ രജിസ്‌റ്റർ ചെയ്യാൻ ആവശ്യപ്പെട്ടതോടെ ഇടപാടിൽനിന്ന്​ കോവിലകം മാനേജ്‌മെൻറ്​ പിന്മാറി. സ്‌കൂൾ പിന്നീട്‌ ചിറക്കൽ സർവിസ്‌ സഹകരണ ബാങ്ക്‌ വാങ്ങി. ഇടപാട്‌ നടന്നില്ലെങ്കിലും പിരിച്ചെടുത്ത പണം പലർക്കും ഇനിയും തിരിച്ചുകൊടുത്തില്ലെന്നാണ് പ്രശാന്ത് ബാബു വിജിലൻസിന്​ നൽകിയ പരാതി.