ലോക്​നാഥ്​ ബെഹ്​റ വിജിലൻസ്​ ഡയറക്​ടറായി തുടരുന്നത്​ ചട്ടവിരുദ്ധമായി 

തിരുവനന്തപുരം: ഡി.ജി.പി ലോക്നാഥ് ​െബഹ്​റ മാസങ്ങളായി വിജിലൻസ് ഡയറക്ടറായി തുടരുന്നത്​ ചട്ടവിരുദ്ധമായാണെന്ന്​ വ്യക്തമായി. കാഡർ തസ്​തികയായ വിജിലൻസ്​ ഡയറക്​ടർ സ്ഥാനത്തേക്ക്​ ക്രമസമാധാന ചുമതലയുള്ള ഡി.ജി.പി പദവിയിലുള്ള വ്യക്തിയെ നിയമിച്ചത്​ കേന്ദ്ര ആഭ്യന്തര മന്ത്രാലയത്തെ അറിയിക്കാതെയാണെന്നുള്ള വിവരമാണ്​ പുറത്തുവന്നത്​.

ഹൈകോടതിയിൽനിന്നും നിരവധി തവണ വിമർശനമുണ്ടായിട്ട്​ പോലും വിജിലൻസ്​ ഡയറക്​ടറെ മാറ്റി നിയമിക്കാൻ സർക്കാർ തയാറായിട്ടുമില്ല. വിജിലൻസ് കമീഷൻ രൂപവത്​കരിക്കാനുള്ള ഭരണപരിഷ്കാര കമീഷൻ ശിപാർശയുടെ ചുവടുപിടിച്ച്​ വിജിലൻസ് ഡയറക്ടർ സ്ഥാനം എക്സ് കാഡർ തസ്​തികയാക്കി മാറ്റാനുള്ള ആലോചനയിലാണ്​ സർക്കാർ​. ഇതു വിവാദമായ സാഹചര്യത്തിൽ നിലവിൽ വിജിലൻസ്​ എ.ഡി.ജി.പിയായ ഷെയ്​ഖ്​ ദർവേശ്​ സാഹിബിനെ ഡയറക്​ടറാക്കാനുള്ള നീക്കവും നടക്കുന്നുണ്ട്​.
ക്രമസമാധാന ചുമതലയുള്ള പൊലീസ് മേധാവിയുടെയും വിജിലൻസ് ഡയറക്ടറുടെയും രണ്ട്​ തസ്​തികകളാണ്​ കേന്ദ്ര സർക്കാർ അംഗീകരിച്ച കേരളത്തിലെ ഡി.ജി.പിമാരുടെ കാഡർ തസ്തിക. 

ഡി.ജി.പി റാങ്കിലെ മറ്റുദ്യോഗസ്ഥർ നിലവിലുള്ളപ്പോൾ കാഡർ തസ്തികയിൽ മറ്റാരെയും നിയമിക്കാൻ പാടില്ലെന്നും വ്യവസ്ഥയുണ്ട്​. അതിനു പുറമേ, രണ്ട്​ തസ്തികകൾ ഒരാൾ വഹിക്കുന്നത്​ അഖിലേന്ത്യ സർവിസ് ചട്ടങ്ങളുടെ ലംഘനമാണ്. ആറു മാസത്തിലധികം കാഡർ തസ്തികയിൽ ആരെയെങ്കിലും നിയമിച്ചാൽ കേന്ദ്ര സർക്കാറി​​​​െൻറ അംഗീകാരം വാങ്ങണമെന്നും വ്യവസ്ഥയുണ്ട്​. എന്നാൽ, ഇതെല്ലാം കാറ്റിൽ പറത്തിയാണ്​ കഴിഞ്ഞ 11 മാസമായി ലോക്​നാഥ്​ബെഹ്​റയെ ഇൗ കസേരകളിൽ അവരോധിച്ചിട്ടുള്ളത്​. 

കേന്ദ്രചട്ടങ്ങളുടെ നഗ്​നമായ ലംഘനം നടത്തിയിട്ടും അനങ്ങാപ്പാറ നയമാണ്​ ഇൗ വിഷയത്തിൽ സർക്കാർ കൈക്കൊള്ളുന്നത്​. ഇത്രയും നാൾ ഇൗ ചട്ടലംഘനം സർക്കാർ ഒളിപ്പിച്ചിരു​െന്നങ്കിലും വിവരവാകാശ നിയമ പ്രകാരമുള്ള ചോദ്യത്തിനു മറുപടിയായാണ് ഇൗ നിയമനം അറിഞ്ഞിട്ടില്ലെന്ന്​ കേന്ദ്ര സർക്കാർ അറിയിച്ചത്​. വിജിലൻസ്​ ഡയറക്​ടർ സ്​ഥാനത്ത്​ നിയമിക്കാനാവശ്യമായ ഉദ്യോഗസ്ഥരില്ലാത്തതിനാലല്ല ഇൗ നിയമനം നടക്കാത്തത്​. സർക്കാറി​​​​െൻറ ചൊൽപ്പടിക്ക്​ നിൽക്കാത്ത വിനീത ‘വിധേയരെ’ലഭിക്കാത്തതാണ്​ ഇതിനു​ കാരണം. ബെഹ്റക്ക്​ പുറമേ, സംസ്ഥാനത്ത്​ ഡി.ജി.പി റാങ്കിൽ 11 ഉദ്യോഗസ്ഥരുണ്ട്. നാലു പേർക്ക് ഏതാനും മാസം മുമ്പാണ്​ ഡി.ജി.പി പദവി നൽകിയത്.

കേന്ദ്രസർക്കാറി​​​​െൻറയും എ.ജിയുടെയും അനുമതി ഇല്ലാത്തതിനാൽ ഇൗ 12 ഡി.ജി.പിമാരിൽ ഒമ്പത്​ പേരും എ.ഡി.ജി.പിയുടെ ശമ്പളമാണ് വാങ്ങുന്നത്. ജേക്കബ് തോമസ്, ലോക്നാഥ് ബെഹ്റ, ഋഷിരാജ് സിങ് എന്നിവർക്കാണ്​ കേന്ദ്ര അംഗീകാരമുള്ളത്​. ഡി.ജി.പി തസ്​തികയിലുള്ള എൻ.സി. അസ്താനയുടെ ഡി.ജി.പി പദവിക്ക്​ ഇതുവരെ കേന്ദ്ര അംഗീകാരം ലഭിച്ചിട്ടില്ല. കഴിഞ്ഞ ഏപ്രിലിൽ സുപ്രീം കോടതി വിധിയുടെ അടിസ്ഥാനത്തിൽ ടി.പി. സെൻകുമാർ ഡി.ജി.പിയായി മടങ്ങിയെത്തിയപ്പോഴാണ്​ ബെഹ്റയെ വിജിലൻസ് ഡയറക്ടറായി സർക്കാർ നിയമിച്ചത്. 

സെൻകുമാർ വിരമിച്ച ശേഷം ബെഹ്റയെ പൊലീസ് തലവനാക്കി. വിജിലൻസ് ഡയറക്ടറുടെ അധിക ചുമതല ആദ്യം നൽകി. പിന്നീട് പൂർണ ചുമതലയും നൽകി. ഒരു സർക്കാറും മുൻകാലങ്ങളിൽ ഇത്തരം നിയമനം നടത്തിയിട്ടുമില്ല. ഇതിനു മുമ്പ്​ ഒരു സർക്കാറും ഈ രണ്ടു സുപ്രധാന പദവികളിൽ ഒരേസമയം ഒരു വ്യക്തിയെ നിയമിച്ചിട്ടില്ല, അതും ഇത്രയധികം ഡി.ജി.പിമാർ സർവിസിലുള്ളപ്പോൾ. ‍കാഡർ തസ്തികയിൽ ഒരേ വ്യക്തിയെ നിയമിച്ചതിനെ മറ്റ്​ ഡി.ജി.പിമാർ നിയമപരമായി ചോദ്യം ചെയ്തിരുന്നെങ്കിൽ ഇൗ നിയമനം വിവാദമായേനെ. എന്നാൽ, സർവിസിൽ ബെഹ്​റയെക്കാൾ സീനിയറും ഒരേ ബാച്ചുകാരുമായ ഋഷിരാജ് സിങ്ങും ജേക്കബ് തോമസും അതിന്​ മുതിരാതിരുന്നതാണ്​ ഇതു​ വിവാദമാകാതിരുന്നതിന്​ പ്രധാനകാരണം. കേന്ദ്രസർക്കാറി​​​​െൻറ അനുമതി ഇല്ലെന്ന വെളിപ്പെടുത്തലോടെ വിജിലസ്​ ഡയറക്​ടർ നിയമനം വീണ്ടും വിവാദത്തിലേക്ക്​ നീങ്ങുകയാണ്​.