പാണക്കാട് തങ്ങളെ കണ്ടതില്‍ വിജയരാഘവ​െൻറയും കെ. സുരേന്ദ്ര​െൻറയും പ്രതികരണം ഒന്ന്​ -എം.എം. ഹസന്‍

തിരുവനന്തപുരം: താല്‍ക്കാലിക ലാഭത്തിന് സി.പി.എം വര്‍ഗീയതയെ കൂട്ടുപിടിക്കുകയാണെന്ന് യു.ഡി.എഫ് കണ്‍വീനര്‍ എം.എം. ഹസന്‍. നിയമസഭ തെരഞ്ഞെടുപ്പില്‍ ബി.ജെ.പിക്ക് ഒന്നിലേറെ സീറ്റുകള്‍ നേടിക്കൊടുക്കാമെന്ന രഹസ്യ ധാരണയാണ് ബി.ജെ.പിയും സി.പി.എമ്മും തമ്മിലുള്ളത്.

ഇതി​െൻറ അടിസ്ഥാനത്തിലാണ് ബി.ജെ.പിയുടെ രാഷ്​ട്രീയ പ്രചാരണം സി.പി.എം ആവര്‍ത്തിക്കുന്നത്. സോളാര്‍ കേസ് സി.ബി.ഐക്ക്​ വിട്ടതും സ്വര്‍ണകള്ളക്കടത്ത് കേസ് ഒച്ചിഴയുംപോലെ നീങ്ങുന്നതും ബി.ജെ.പി-സി.പി.എം ധാരണയുടെ ഒടുവിലത്തെ ഉദാഹരണമാണ്. തെരഞ്ഞെടുപ്പ് കഴിയുംവരെ സ്വര്‍ണക്കടത്ത് കേസില്‍ ഒരു നടപടിയുമുണ്ടാകില്ലെന്ന ബി.ജെ.പിയുടെ ഉറപ്പിന്മേലാണ് സോളാര്‍ കേസ് സി.ബി.ഐക്ക്​ വിടാന്‍ തീരുമാനമായതെന്നും അദ്ദേഹം പറഞ്ഞു.

മുസ്​ലിം ലീഗ് ഒരു വര്‍ഗീയ കക്ഷിയാണോയെന്നത് മുഖ്യമന്ത്രി വ്യക്തമാക്കണം. 1964ല്‍ ഇതേ ലീഗുമായി അധികാരം പങ്കിട്ട സി.പി.എം, ലീഗ് ഒരു വര്‍ഗീയ കക്ഷിയാണെങ്കില്‍ എന്തിന് അവരുമായി ധാരണയുണ്ടാക്കിയെന്നും ഹസന്‍ ചോദിച്ചു. യു.ഡി.എഫ് നേതാക്കള്‍ പാണക്കാട് തങ്ങളെ കണ്ടതില്‍ വിജയരാഘവ​െൻറയും കെ. സുരേന്ദ്ര​െൻറയും പ്രതികരണം ഒന്നുതന്നെയാണ്. ഇത് ലീഗിനെതിയുള്ള വിമര്‍ശനമാണോ, അതോ മുസ്​ലിംകള്‍ക്കെതിരെയുള്ള വിമര്‍ശനമാണോയെന്ന് ഹസന്‍ ചോദിച്ചു.

കേരള രാഷ്​ട്രീയത്തില്‍ കാലുറപ്പിക്കാന്‍ ബി.ജെ.പി നടത്തുന്ന വര്‍ഗീയ പ്രചാരണം തന്നെയാണ് സി.പി.എമ്മും നടത്തുന്നതെന്നും ഹസന്‍ പറഞ്ഞു. മലപ്പുറത്ത് ലീഗ് പ്രവര്‍ത്തകൻ കൊല്ലപ്പെട്ടത് രാഷ്​ട്രീയ വൈരാഗ്യം കൊണ്ടുതന്നെയാണ്. സി.പി.എം അണികളോട് കൊലക്കത്തി താഴെയിടാന്‍ പിണറായി വിജയന്‍ ആവശ്യപ്പെടണമെന്നും ഹസന്‍ പറഞ്ഞു.