ആരുമുണ്ടാകില്ലെന്ന്​ കരുതിയ വിവാഹം ലൈവായി കണ്ടത്​ ലക്ഷങ്ങൾ; ആലപ്പുഴയിലെ 'ചെമ്പു കല്യാണ' വിശേഷമിങ്ങനെ

രജിസ്റ്റർ ജാഫീസിൽ വിവാഹം രജിസ്റ്റർ ചെയ്യു​േമ്പാൾ കൈവിരലിലെണ്ണാവുന്ന ആളുകളെ ഉണ്ടായിരുന്നുള്ളൂ. അതുകൊണ്ടു തന്നെ ക്ഷേത്രമുറ്റത്തെ പന്തലിൽ നടത്തുന്ന വിവാഹ ചടങ്ങുകൾ​ക്കും സാക്ഷിയാകാൻ ഏറെയാളുകളെയൊന്നും അവർ പ്രതീക്ഷിച്ചിരുന്നില്ല. പക്ഷേ, കാലം തെറ്റിയെത്തിയ മഴയും വെള്ളവുമെല്ലാം ആ കണക്കുകളെല്ലാം തെറ്റിച്ചു. അപൂർവമായ 'ചെമ്പു കല്യാണം' ചാനലുകളിലൂടെയും സാമൂഹിക മാധ്യമങ്ങളിലൂടെയും ​ൈലവായി കണ്ടത്​ ലക്ഷങ്ങളാണ്​.

തലവടിയിലാണ്​ സംഭവം. ക്ഷേത്രത്തിൽ ആചാരങ്ങളനുസരിച്ച്​ നടത്താൻ നിശ്ചയിച്ച വിവാഹമായിരുന്നു ആകാശി​േന്‍റതും ഐശ്വര്യയുടേതും. കനത്ത മഴയിൽ വെള്ളം കയറിയതോടെയാണ്​ ഇരുവരുടെയും വിവാഹ ചടങ്ങുകളിൽ മാറ്റം വന്നത്​.

നേരത്തെ, ഇവരുടെ വിവാഹം രജിസ്റ്റർ ഒാഫീസിൽ നടന്നതാണ്​. വീട്ടുകാർക്ക്​ വിവാഹത്തിന്​ പൂർണസമ്മതം ഇല്ലാത്തതിനാൽ അടുത്ത ചില ബന്ധുക്കളും സുഹൃത്തുക്കളുമാണ്​ അന്ന്​ കൂടെ ഉണ്ടായിരുന്നത്​. ശേഷം, ​ക്ഷേത്രത്തിൽ വെച്ചുള്ള താലികെട്ട്​ ഇന്ന്​ (തിങ്കളാഴ്ച) നടത്താൻ നിശ്ചയിച്ചതായിരുന്നു. അതിനിടയിലാണ്​ മഴ കനത്തതും ക്ഷേത്രത്തിലും സമീപത്തെ ഹാളിലുമൊക്കെ മുട്ടറ്റം വെള്ളം കയറിയതും.

വെള്ളം കയറിയെങ്കിലും, സാഹസികമായി തന്നെ നേരത്തെ നിശ്ചയിച്ചത്​ പ്രകാരം വിവാഹം നടത്താൻ തീരുമാനിക്കുകയായിരുന്നു. അങ്ങനെയാണ്​ വലിയ ചെമ്പ്​ പാത്രത്തിൽ കയറി വിവാഹ ഹാളിലെത്തിയത്​. മുട്ടറ്റം വെള്ളം നിൽക്കുന്ന ഹാളിൽ ഉയർന്നു നിൽക്കുന്ന മണ്ഡപത്തിലേക്ക്​ ​െചമ്പിൽ കയറി ഇരുവരും എത്തി. ഹാളിൽ അടുത്ത ബന്ധുക്കൾ മാത്രമേ ഉണ്ടായിരുന്നുള്ളൂ. അതേസമയം ഈ അപൂർവ വിവാഹം കാമറയിൽ പകർത്താൻ ചാനൽ പ്രവർത്തകർ ഉണ്ടായിരുന്നു.

താലികെട്ടടക്കമുള്ള വിവാഹ ചടങ്ങുകൾ ചാനലുകൾ ലൈവായി തന്നെ ടെലികാസ്റ്റ്​ ചെയ്​തു. താരപ്രഭയിൽ ആകാശും ഐശ്വര്യയും വിവാഹിതരായി. ചാനലുകളിലൂടെ ലക്ഷങ്ങൾ ആ വിവാഹത്തിന്​ സാക്ഷിയാകുകയും ചെയ്​തു. ചടങ്ങുകൾക്ക്​ ശേഷം, ആകാശും ഐശ്വര്യയും ചെമ്പിൽ കയറി ക്ഷേത്രദർശനവു​ം നടത്തിയാണ്​ മടങ്ങിയത്​. മഴയിൽ നിറം മങ്ങിപ്പോകുമെന്ന്​ കരുതിയ വിവാഹം താരശോഭയിൽ നടന്നതിന്‍റെ സന്തോഷത്തിലാണ്​ ദമ്പതികൾ.