വിവേക്​ എക്സ്​പ്രസുകൾ ഇനി ആഴ്ചയിൽ രണ്ട്​ ദിവസം

തിരുവനന്തപുരം: യാത്രക്കാരുടെ തിരക്ക്​ കണക്കിലെടുത്ത്​ കന്യാകുമാരി-ദിബ്രുഗർ, ദിബ്രുഗർ-കന്യാകുമാരി വിവേക്​ എക്സ്​പ്രസുകൾ ഇനി ആഴ്ചയിൽ രണ്ടു ദിവസം സർവിസ്​ നടത്തും. ദിബ്രുഗറിൽ നിന്ന്​ ശനി, ചൊവ്വ ദിവസങ്ങളിലാവും സർവിസ്​. കന്യകുമാരിയിൽ നിന്ന്​ വ്യാഴം, ഞായർ ദിവസങ്ങളിലും. നവംബർ 22ന്​ ഇത്​ നിലവിൽ വരും.

ഇന്ത്യയിലെ തന്നെ ഏറ്റവും ദൈർഘ്യമേറിയ ​ട്രെയിൻ സർവിസാണിത്​. 4400 കിലോമീറ്ററാണ്​ സർവിസ്​ ദൂരം. നാല്​ ദിവസം പിന്നിട്ടാണ്​ ട്രെയിൻ ലക്ഷ്യസ്ഥാന​ത്ത്​ എത്തുന്നത്​. കന്യാകുമാരിയിൽനിന്ന്​ ചൊവ്വാഴ്ചകളിലും ദിബ്രുഗറിൽനിന്ന്​ ഞായറാഴ്ചകളിലും പുറപ്പെടും വിധത്തിലാണ് നിലവിലെ സമയക്രമം.

ദീർഘദൂരം സഞ്ചരിക്കുന്നതുകൊണ്ടുതന്നെ മതിയായ ശുചീകരണത്തിന്‍റെ അഭാവം വലിയ പരാതികൾക്കും ഇടയാക്കുന്നുണ്ട്. ട്രെയിൻ യാത്ര ആരംഭിച്ചത്​ മുതലുള്ള ഭക്ഷണാവശിഷ്ടങ്ങൾ ​കൊണ്ട്​ കോച്ചുകൾക്കുള്ളിലെ വേസ്റ്റ്​ ബിൻ നിറഞ്ഞുകവിഞ്ഞ്​ പരിസരമാകെ ചിതറിയ നിലയിലാണ്​ പലപ്പോഴും ട്രെയിൻ കേരളത്തിലേക്കെത്തുന്നത്​.

ഓൺ ബോർഡ് ഹൗസ്​ കീപ്പിങ് സർവിസ് നിലവിൽ വന്നതോടെ, പ്രധാന സ്റ്റേഷനുകളിൽ നേര​േത്തയുണ്ടായിരുന്ന ക്ലീനിങ്​ നാമമാ​ത്രമായി. ഓൺ ബോർഡ് ക്ലീനിങ് സ്റ്റാഫ്‌ അടക്കം ശുചീകരണ തൊഴിലാളികൾ മിക്ക ട്രെയിനുകളിലുണ്ടെങ്കിലും ഈ അവസ്ഥക്ക് ഒരു മാറ്റവുമില്ല

ഭിന്നശേഷിക്കാർക്ക്​ അധിക കോച്ച്​

തിരുവനന്തപുരം: ഇൻഡോർ-കൊച്ചുവേളി വീക്ക്​ലി എക്സ്​പ്രസ്​ (20932), കൊച്ചുവേളി-ഇൻഡോർ വീക്കിലി എക്സ്​പ്രസ്​ (20931) എന്നിവയിൽ ഭിന്നശേഷിക്കാർക്കായി സെക്കന്‍ഡ്​​ ക്ലാസ്​ കോച്ച്​ അധികമായി ഏർപ്പെടുത്തിയതായി റെയിൽവേ അറിയിച്ചു. ഭിന്നശേഷിക്കാർക്കായുള്ള സെക്കന്‍ഡ്​​ ക്ലാസ്​ കോച്ചിന്​ പുറമേ രണ്ട്​ ടു ടിയർ എ.സി, അഞ്ച്​ ത്രീ ടിയർ എ.സി, എട്ട്​ സെക്കൻഡ്​​ ക്ലാസ്​ സ്ലീപ്പർ, നാല്​ സെക്കന്‍ഡ്​ ക്ലാസ്​ സിറ്റിങ്​ എന്നിങ്ങനെയാണ്​ പുതിയ കോച്ച്​ നില.

സമയത്തിൽ മാറ്റം

തിരുവനന്തപുരം: കന്യാകുമാരി-പുനലൂർ പ്രതിദിന എക്സ്​പ്രസ്​ തിരുവനന്തപുരം, കഴക്കൂട്ടം സ്​റ്റേഷനുകളിൽ എത്തുന്ന സമയക്രമത്തിൽ മാറ്റം വരുത്തി. തിരുവനന്തപുരം സെൻട്രലിൽ വൈകീട്ട്​ 5.25നും (പഴയ സമയം-5.15) കഴക്കൂട്ടത്ത്​ വൈകീട്ട്​ 5.50 നുമാണ്​ (പഴയ സമയം- 5.34) ഇനി എത്തിച്ചേരുക.