വിഴിഞ്ഞം തുറമുഖ നിർമാണം: തടസ്സങ്ങൾ ഉടൻ നീക്കണമെന്ന്​ ഹൈകോടതി

കൊച്ചി: വിഴിഞ്ഞം തുറമുഖ നിർമാണ സ്ഥലത്തേക്കുള്ള എല്ലാ തടസ്സങ്ങളും അടിയന്തരമായി നീക്കണമെന്ന്​ ഹൈകോടതി. മത്സ്യത്തൊഴിലാളികൾ നിർമാണം തടസ്സപ്പെടുത്തുന്നതിനെതിരെ പൊലീസ്​ സംരക്ഷണം തേടി അദാനി ഗ്രൂപ്പും കരാറുകാരും നൽകിയ ഹരജിയിലും പൊലീസ് സംരക്ഷണത്തിന് ഉത്തരവിട്ടിട്ടും പാലിച്ചിട്ടില്ലെന്ന് കാട്ടി നൽകിയ കോടതിയലക്ഷ്യ ഹരജിയിലുമാണ്​ ജസ്റ്റിസ്​ അനു ശിവരാമന്‍റെ ഉത്തരവ്​. ഹരജി വീണ്ടും പരിഗണിക്കുന്ന നവംബർ ഏ​ഴിനകം തടസ്സങ്ങൾ നീക്കണമെന്നാണ്​ കോടതിയുടെ അന്ത്യശാസനം.

കോടതി ഉത്തരവ്​ ലംഘിച്ച്​ സമരക്കാർ സംഘടിച്ച്​ തടസ്സം സൃഷ്​ടിക്കുന്നതായി ഹരജിക്കാർ ആരോപിച്ചു. ഇതുമൂലം നിർമാണ സ്ഥലത്തേക്ക്​ പോകാനോ വരാനോ കഴിയുന്നില്ലെന്നും നിർമാണം സ്തംഭിച്ച അവസ്ഥയിലാണെന്നും അവർ വാദിച്ചു. അതേസമയം, തുറമുഖ നിർമാണത്തിന്‍റെ പേരിലുണ്ടാകുന്ന പരസ്ഥിതി പ്രശ്​നം ആശങ്കപ്പെടുത്തുന്നതാണെന്നും പലരുടെയും വാസസ്ഥലം നഷ്ടപ്പെടുമെന്നും സമരക്കാർ ആരോപിച്ചു. വിഷയത്തിൽ മുഖ്യമന്ത്രി ഇടപെട്ട്​ ചർച്ച നടക്കാനുള്ള സാധ്യതയും ചൂണ്ടിക്കാട്ടി. എന്നാൽ, ഇവയൊന്നും കോടതിയുടെ പരിഗണന വിഷയങ്ങളല്ലെന്നും ഇത്തരം കാര്യങ്ങളുന്നയിച്ച്​ നിർമാണ സ്ഥലത്തേക്ക്​ തടസ്സം സൃഷ്ടിക്കുന്നത്​ അനുവദിക്കാനാവില്ലെന്നും കോടതി വ്യക്തമാക്കി. തുടർന്നാണ്​ ഉടൻ തടസ്സങ്ങൾ നീക്കം ചെയ്യാൻ ആവശ്യപ്പെട്ടത്​.

തുറമുഖ നിർമാണത്തിന്​ മതിയായ പൊലീസ്​ സംരക്ഷണം നൽകണമെന്ന ഇടക്കാല ഉത്തരവ്​ കർശനമായി നടപ്പാക്കാൻ കോടതി നേരത്തേ ഉത്തരവിട്ടിരുന്നു