ചാണ്ടിയുടെ രാജി അവസരവാദ രാഷ്​ട്രീയ ശൈലിക്കുള്ള തിരിച്ചടി -സുധീരൻ

തിരുവനന്തപുരം: താൽക്കാലിക നേട്ടങ്ങൾക്ക്​ അതിസമ്പന്നരെയും അവസരവാദികളെയും അധികാരസ്ഥാനങ്ങൾ നൽകി അംഗീകരിക്കുന്ന സി.പി.എമ്മി​​െൻറ അവസരവാദ രാഷ്​ട്രീയ ശൈലിക്കുള്ള തിരിച്ചടിയാണ് തോമസ്​ ചാണ്ടിയുടെ രാജിയിലൂടെ സംഭവിച്ചതെന്ന്​ വി.എം. സുധീരൻ. തോമസ് ചാണ്ടി അല്ലാതെ മറ്റൊരാൾക്കും മന്ത്രി പദവിയിൽനിന്ന്​ ഇത്രയും നാണംകെട്ട് ഇറങ്ങിപ്പോകേണ്ടിവന്നിട്ടി​ല്ലെന്നും അദ്ദേഹം ഫേസ്ബുക്ക്​ പോസ്​റ്റിൽ പറഞ്ഞു.

ജനഹിതവും ഇടതുമുന്നണിയിലെ പൊതുവികാരവും ഏറ്റവും ഒടുവിൽ ഹൈകോടതിയുടെ രൂക്ഷമായ വിമർശനവും ഉണ്ടായിട്ടും പണക്കരുത്തി​​െൻറ സമ്മർദ തന്ത്രങ്ങളുമായി രാജി​വെക്കാതിരിക്കാനാണ് ചാണ്ടി ശ്രമിച്ചത്​. ഭരണഘടന പ്രതിസന്ധി ഉണ്ടാക്കുന്നതും മന്ത്രിസഭയുടെ കൂട്ടുത്തരവാദിത്തം തകർന്നുപോകുന്നതുമായ അവസ്ഥ സി.പി.ഐ മന്ത്രിമാരുടെ മന്ത്രിസഭ യോഗ ബഹിഷ്കരണത്തിലൂടെ വന്നതിനാൽ മാത്രമാണ് ചാണ്ടിയെ രാജിവെപ്പിക്കാൻ മുഖ്യമന്ത്രി തയാറായത്​.

ചാണ്ടി പ്രശ്നം ആകെ വിലയിരുത്തുമ്പോൾ മുഖ്യമന്ത്രിയുടെയും സി.പി.എമ്മി​​െൻറയും അഴിമതിവിരുദ്ധ പ്രഖ്യാപനങ്ങളുടെയും കമ്യൂണിസ്​റ്റ്​ മൂല്യം ഉയർത്തിപ്പിടിക്കുന്നുവെന്ന അവരുടെ അവകാശവാദങ്ങളുടെയും തകർച്ചയാണ് പ്രകടമാകുന്നതെന്നും അദ്ദേഹം ചൂണ്ടിക്കാട്ടി.