ലോക്സഭ തെരഞ്ഞെടുപ്പ്: തൃശൂരിൽ വി.എസ്.സുനിൽകുമാർ, വയനാട്ടിൽ ആനി രാജ; സി.പി.ഐ സ്ഥാനാർഥി ചർച്ചകൾ സജീവം

തിരുവനന്തപുരം: ലോക്സഭ തെരഞ്ഞെടുപ്പിനുള്ള സി.പി.ഐ സ്ഥാനാർഥി നിർണയത്തെക്കുറിച്ച ചർച്ച സജീവം. തിരുവനന്തപുരം, തൃശൂർ, മാവേലിക്കര, വയനാട്​ സീറ്റുകളാണ്​ സി.പി.ഐക്കുള്ളത്​. തിരുവനന്തപുരത്ത്​ പന്ന്യൻ രവീന്ദ്രൻ, തൃശൂരിൽ മുൻമന്ത്രി വി.എസ്.​ സുനിൽ കുമാർ, മാവേലിക്കരയിൽ യുവ നേതാവ്​ അനിൽകുമാർ എന്നിവരാണ്​ പരിണനയിലുള്ളത്​. രാഹുൽ ഗാന്ധിക്കെതിരെ വയനാട്ടിൽ ദേശീയ നേതാവ്​ ആനി രാജ വരുമെന്നാണ്​ റിപ്പോർട്ട്​. ​

വ്യാഴാഴ്ച നടക്കുന്ന​ ​സംസ്ഥാന സെക്രട്ടേറിയറ്റ്​ യോഗത്തിന്‍റെ മുഖ്യ അജണ്ട സ്ഥാനാർഥി ചർച്ചയാണ്​. യോഗത്തിൽ സ്ഥാനാർഥി നിർണയത്തിന്‍റെ മാനദണ്ഡങ്ങൾ നിശ്ചയിച്ച്​ അതത്​ ജില്ല കമ്മിറ്റികളോട്​ അഭിപ്രായം തേടും. സംസ്ഥാന നേതൃത്വം ആഗ്രഹിക്കുന്ന പേരുകൾ നിർദേശിക്കും.

ജില്ല ഘടകത്തിന്‍റെ താൽപര്യം കൂടി പരിഗണിച്ച്​ മൂന്നുപേ​രുടെ പാനൽ ജില്ലയിൽനിന്ന്​ ആവശ്യപ്പെടും. 26ന്​ വീണ്ടും ചേരുന്ന സംസ്ഥാന സെ​ക്രട്ടേറിയറ്റ്​ യോഗം അന്തിമ തീരുമാനമെടുക്കും. തുടർന്ന്,​ സംസ്ഥാന കൗൺസിൽ ചേർന്ന ശേഷമാകും പ്രഖ്യാപനം.