വൈറ്റില ഫ്ലൈ ഒാവർ: അലൈൻമെൻറ്​ പരാതികൾ ഗൗരവമുള്ളതെന്ന്​ ഹൈകോടതി

കൊച്ചി: വൈറ്റില ഫ്ലൈ ഒാവർ അലൈൻമ​​െൻറി​​​െൻറ അപാകതകളെക്കുറിച്ച പരാതികൾ ഗൗരവമുള്ളതെന്ന്​ ഹൈകോടതി. പരാതികളും നിർദേശങ്ങളും പരിഗണിക്കുന്നത്​ സാധ്യമാണോയെന്ന്​ ആരാഞ്ഞ കോടതി മൂന്നു തട്ടുകളിലായി ഗതാഗതം പുനഃക്രമീകരിക്കുന്ന തരത്തിൽ അത്യാധുനിക ഫ്ലൈ ഒാവർ നിർമിക്കണമെന്ന ആവശ്യം ചർച്ച ചെയ്യാൻ ബന്ധപ്പെട്ടവരുടെ യോഗം വിളിക്കാനാവുമോയെന്ന് ഒരാഴ്​ചക്കകം അറിയിക്കാൻ സർക്കാറിന് നിർദേശം നൽകി. നിലവിലെ അലൈൻമ​​െൻറ്​ അനുസരിച്ച്​ ഫ്ലൈ ഒാവർ നിർമിച്ചാൽ ഗതാഗതക്കുരുക്ക്​ കുറക്കാനാവില്ലെന്ന്​ ചൂണ്ടിക്കാട്ടി ​​​നെട്ടൂർ സ്വദേശി ഷമീർ അബ്​ദുല്ല നൽകിയ പൊതു താൽപര്യ ഹരജിയാണ്​ കോടതി പരിഗണിച്ചത്​.

സിഗ്​നൽ ലൈറ്റ്​ കാത്ത്​ നിൽക്കാ​െത വാഹനങ്ങൾക്ക്​ എല്ലാ റോഡിലേക്കും സുഗമമായി സഞ്ചരിക്കാനാവുന്ന വിധത്തിലുള്ളതല്ല നിലവിൽ നിർമിക്കാനുദ്ദേശിക്കുന്ന ഫ്ലൈ ഒാവറെന്ന്​ ഹരജിയിൽ പറയുന്നു. ഒാരോ റോഡിൽനിന്നും മൂന്നു ദിശകളിലേക്ക് വാഹനങ്ങൾക്ക് തിരിയാൻ സാധിക്കണം. ഇങ്ങനെ മൊത്തം 15 ദിശകളിലേക്കുള്ള ഗതാഗതം സുഗമമാക്കാൻ ഇപ്പോഴത്തെ ഫ്ലൈ ഒാവർ മതിയാവില്ല. മൂന്നു തട്ടിലായി ഗതാഗതം ക്രമീകരിക്കുന്ന ഫ്ലൈ ഒാവർ വേണമെന്ന്​ വ്യക്​തമാക്കി മെട്രോമാൻ ഇ. ശ്രീധരൻ പൊതുമരാമത്ത് സെക്രട്ടറിക്ക് കത്തു നൽകിയിരുന്നു. 

പൊതുജനത്തി​​​െൻറ നികുതി പണം ഉപയോഗിച്ചുണ്ടാക്കുന്ന പദ്ധതികൾ അവർക്ക് ഉപകരിക്കുന്നതാവണമെന്ന്​ കോടതി നിരീക്ഷിച്ചു. ഫ്ലൈ ഒാവർ എന്നതുകൊണ്ടുള്ള ഉദ്ദേശ്യം തന്നെ കുരുക്കുകളില്ലാത്ത വിധം മുകളിലൂടെ മറുവശം കടക്കലാണ്. എന്നാൽ, ഇടപ്പള്ളിയിലുൾപ്പെടെ ഫ്ലൈ ഒാവർ വന്നിട്ടും ഏറെ നേരം സിഗ്​നലിന്​ കാത്തുനിൽക്കേണ്ട സ്​ഥിതിയാണ്​. ഇൗ അവസ്​ഥ തനിക്കും നേരിടേണ്ടി വന്നിട്ടുണ്ട്​. പദ്ധതികൾ ഭാവി തലമുറയെ കൂടി ലക്ഷ്യമിട്ടുകൊണ്ടുള്ളതാകണം. 

രണ്ടു റോഡിലെ മാത്രം തിരക്ക് കുറക്കാൻ എന്തിനാണ് ഇത്ര വലിയ പദ്ധതിയെന്ന്​ കോടതി ആരാഞ്ഞു. ഒരിക്കൽ പണിതിട്ട് സൗകര്യക്കുറവി​​​െൻറ പേരിൽ പൊളിച്ച് പണിയൽ പ്രായോഗികമല്ലാത്തതിനാൽ എല്ലാ വശങ്ങളും പഠിച്ചുവേണം പദ്ധതി തയാറാക്കേണ്ടതും നടപ്പാക്കേണ്ടതും. കേന്ദ്ര ഫണ്ടുൾപ്പെടെ വേണ്ടെന്ന നിലപാട് സ്വീകരിച്ചാണ്​ നിർമാണം സംസ്​ഥാന സർക്കാർ സ്വയം ഏറ്റെടുത്ത്​ നടപ്പാക്കുന്നത്​. അതിനാൽ, ഫണ്ടി​​​െൻറ പേരിൽ സൗകര്യപ്രദമായ രൂപരേഖയിലുള്ള നിർമാണം പരിഗണിക്കാതിരിക്കാനാവില്ല. ദേശീയപാത അതോറിറ്റി, പൊതുമരാമത്ത്​ വകുപ്പ്​, ആർ.ബി.ഡി.സി.കെ, കൊച്ചി, ഡൽഹി മെട്രോ റെയിൽ അധികൃതർ, കൊച്ചി കോർപറേഷൻ മേയർ, ജി.സി.ഡി.എ ചെയർമാൻ, വൈറ്റില മൊബിലിറ്റി ഹബ്​ എം.ഡി എന്നിവരുടെ യോഗം ചേരാനാണ്​ നിർദേശം.