വൈറ്റില, കുണ്ടന്നൂർ മേൽപ്പാലങ്ങൾ നാടിന്​ സമർപ്പിച്ചു; സർക്കാറിന്‍റെ നേട്ടത്തിൽ അസ്വസ്​ഥരാകുന്ന ചിലർ കുത്തിത്തിരിപ്പുണ്ടാക്കുന്നു -മുഖ്യമന്ത്രി

കൊച്ചി: കൊച്ചിയുടെ ഏറെക്കാലത്തെ സ്വപ്​നമായ വൈറ്റില, കുണ്ടന്നൂർ മേൽപ്പാലങ്ങൾ മുഖ്യമന്ത്രി പിണറായി വിജയൻ നാടിന്​ സമർപ്പിച്ചു. ഓൺലൈനായാണ്​ പാലങ്ങളുടെ ഉദ്​ഘാടനം നടന്നത്​​.

ജനങ്ങളുടെ നികുതിപ്പണം ഉപയോഗിച്ച്​ നിർമിക്കുന്ന വൈറ്റില ​ൈഫ്ലഓവർ, ജനങ്ങൾ വിശ്വാസമർപ്പിക്കുന്ന സർക്കാറിന്‍റെ പ്രതിനിധിയെന്ന നിലയിൽ ഉദ്​ഘാടനം ചെയ്യാനായതിൽ സന്തോഷമുണ്ടെന്ന്​ മുഖ്യമന്ത്രി പറഞ്ഞു. ഒപ്പം മുടങ്ങിക്കിടന്ന പദ്ധതി​ സമയബന്ധിതമായി പൂർത്തിയാക്കി നാടിന്​ സമർപ്പിക്കാൻ കഴിഞ്ഞു എന്നതിന്‍റെ അഭിമാനവും. 18 മാസം കൊണ്ട്​ നിർമാണം പൂർത്തിയാക്കാനായിരുന്നു നിശ്ചയിച്ചിരുന്നത്​. എന്നാൽ, പലവിധ പ്രതിസന്ധികൾ ഇതിനിടയിൽ ഉണ്ടായി. ​ഇതിനെയെല്ലാം മറികടന്ന്​ കൃത്യമായ ആസൂത്രണത്തോടെയാണ്​ ഇപ്പോൾ പാലം പൂർത്തിയാക്കിയത്​​.

സംസ്​ഥാന സർക്കാറിന്‍റെ ഫണ്ട്​ ഉപയോഗിച്ച്​ ദേശീയപാതയിൽ നിർമിക്കുന്ന പാലമാണിത്​. ഇത്​ കേന്ദ്ര ഏജൻസിയാണ്​ നിർമിച്ചിരുന്നതെങ്കിൽ ടോൾ പിരിവ്​ ഉണ്ടാകുമായിരുന്നു. പാലം യാഥാർഥ്യമാകുന്നതോടെ ഇവിടത്തെ ഗതാഗതക്കുരുക്കിന്​ പരിഹാരമാകുമെന്നും മുഖ്യമന്ത്രി പറഞ്ഞു.

കഴിഞ്ഞദിവസം വൈറ്റില പാലം തുറന്നുകൊടുത്ത വി​4 കേരളക്കെതിരെ രൂക്ഷമായ രീതിയിലാണ്​ മുഖ്യമന്ത്രി പ്രതികരിച്ചത്​. 'മികച്ച രീതിയിൽ നിർമിച്ച മേൽപ്പാലം സർക്കാർ ഉദ്​ഘാടനം ചെയ്യുന്നതിൽ അസ്വസ്​ഥപ്പെടുന്ന ചിലരുണ്ടാകാം. ആസൂത്രണ ഘട്ടത്തിലോ പ്രതിസന്ധി ഘട്ടത്തിലോ ഇവരെ കാണാനാകില്ല. ഫണ്ടില്ലാതെ പദ്ധതി ഉപേക്ഷിച്ചപ്പോൾ ഇവരുടെ​ രോഷം കണ്ടില്ല. തൊട്ടടുത്തുള്ള മറ്റൊരു പാലത്തിൽ അഴിമതിയുടെ ഭാഗമായി ബലക്കുറവ്​ സംഭവിച്ചപ്പോഴും ഇവരുണ്ടായില്ല.

മുടങ്ങിക്കിടന്ന പദ്ധതി പ്രതിസന്ധികൾ തരണം ചെയ്​ത്​ പൂർത്തീകരിച്ചപ്പോൾ ഇവർ കുത്തിത്തിരിപ്പുമായി പ്രത്യക്ഷപ്പെടുന്നതാണ്​ കണ്ടത്​. പ്രശ്​നങ്ങൾ സൃഷ്​ടിച്ച്​ അതിലൂടെ പ്രശസ്​തി നേടുകയാണ്​ ഇവരുടെ തന്ത്രം. കേവലം ചെറിയ ആൾക്കൂട്ടം മാത്രമാണവർ​. നീതിപീഠത്തിൽ ഉന്നത സ്​ഥാനം അലങ്കരിച്ചവർ വരെ ഇത്തരം ചെയ്​തികൾക്ക്​ കുടപിടിക്കുകയാണ്​. ഇവരോട്​ സഹതാപം മാത്രമേയുള്ളൂ' -മുഖ്യമന്ത്രി പറഞ്ഞു.

വൈറ്റില ജങ്ഷന് മുകളില്‍ മെട്രോ പാലത്തിന് കീഴെ അപ്രോച്ച് റോഡ് അടക്കം 717 മീറ്റര്‍ നീളത്തിൽ 85 കോടി ​െചലവിട്ടാണ് പാലം പണിതത്. 2017 ഡിസംബര്‍ 11നാണ്​ നിർമാണം തുടങ്ങിയത്. ഉദ്​ഘാടന ശേഷം പൊതുമരാമത്ത്​ മന്ത്രി ജി. സുധാകരന്‍റെ നേതൃത്വത്തിൽ പാലം യാത്രക്കാർക്കായി തുറന്നുകൊടുത്തു.

2018 മാര്‍ച്ചിലാണ്​ ​കുണ്ടന്നൂർ പാലത്തിന്‍റെ നിർമാണം തുടങ്ങിയത്​. കൊച്ചി- ധനുഷ്കോടി ദേശീയപാതക്ക്​ മുകളിലൂടെ അപ്രോച്ച് റോഡ് അടക്കം 701 മീറ്റര്‍ നീളത്തിൽ 74 കോടിയിലധികം ​െചലവിട്ടാണ് കുണ്ടന്നൂര്‍ പാലം നിർമിച്ചത്​. രണ്ട് പാലങ്ങളുടെയും നിർമാണം മാർച്ചിൽ പൂ‍‌‌ർത്തിയാക്കേണ്ടതായിരു​െന്നങ്കിലും ​േകാവിഡും കാലാവസ്ഥയും തിരിച്ചടിയാകുകയായിരുന്നു.