‘മരണക്കിടക്കയിൽ കിടക്കുന്ന ആൾക്ക് കൊടുക്കാനുള്ള വെള്ളത്തിനും കത്ത് നൽകേണ്ടി വരുമോ?’; മന്ത്രി റോഷി അഗസ്റ്റിനോട് എം. വിൻസന്‍റ്

തിരുവനന്തപുരം: വെള്ളക്കരം വർധന നിയമസഭ നടപടികൾ നിർത്തിവെച്ച് ചർച്ച ചെയ്യണമെന്ന്​ ആവശ്യപ്പെട്ട്​ കൊണ്ടുവന്ന അടിയന്തര പ്രമേയത്തിന്​ അനുമതി നിഷേധിച്ചതിൽ പ്രതിഷേധിച്ച്​ പ്രതിപക്ഷം നിയമസഭയിൽനിന്ന്​ വാക്കൗട്ട്​ നടത്തി. എ.ഡി.ബിയെ സഹായിക്കാനും അവരുടെ നിർദേശാനുസരണവുമാണ്​ ഈ നിരക്ക്​ വർധനയെന്ന്​ പ്രമേയം അവതരിപ്പിച്ച അഡ്വ. എം. വിൻസന്റ് ആരോപിച്ചു. വാട്ടർ അതോറിറ്റിയുടെ നഷ്ടക്കണക്ക് നിരത്തി പ്രതി​രോധിച്ച മന്ത്രി റോഷി അഗസ്റ്റിൻ അതോറിറ്റിയെ സംരക്ഷിക്കാൻ സർക്കാർ കൈക്കൊള്ളുന്ന നടപടികൾക്ക്​ പ്രതിപക്ഷത്തിന്‍റെയും പിന്തുണ ആവശ്യപ്പെട്ടു.

ഇത്തരത്തിലൊരു നോട്ടീസ് പ്രതിപക്ഷം കൊണ്ടു​വന്നത് നന്നായെന്ന് റോഷി അഗസ്റ്റിൻ പറഞ്ഞു. 4911.42 കോടി രൂപയുടെ സഞ്ചിത നഷ്ടമാണ് വാട്ടർ അതോറിറ്റിക്കുള്ളത്​. ജല ഉപയോഗത്തിൽ കുറവ് വരുത്താൻ പൊതു സമൂഹത്തെ പഠിപ്പിക്കേണ്ടതുണ്ട്. 15,000 ലിറ്റർ വെള്ളം ആവശ്യമുള്ള എത്ര കുടുംബങ്ങളുണ്ട്​. നാലോ അഞ്ചോ അംഗങ്ങളുള്ള ഒരു കുടുംബത്തിന്​ പ്രതിദിനം നൂറ്​ ലിറ്റർ വെള്ളം ആവശ്യമുണ്ടായോയെന്നും അദ്ദേഹം ചോദിച്ചു.

വെള്ളം കുറച്ച് ഉപയോഗിക്കാൻ പ്രേരിപ്പിക്കേണ്ട സമയമായി. മരണക്കിടക്കയിൽ കിടക്കുന്ന ആളുടെ വെള്ളംകുടി സർക്കാർ മുട്ടിച്ചെന്നൊക്കെ പറയുന്നത്​ ഭൂഷണമല്ല. വെള്ളം കൊടുക്കുന്നതിൽ പിശുക്ക് കാണിക്കില്ല. 37,95,000 കണക്​ഷനുകൾകൂടി കൊടുക്കാനുണ്ട്. എ.ഡി.ബി സംബന്ധിച്ച്​ ആശങ്ക വേണ്ട. വരുംകാല നിലനിൽപിന് ഈ വർധന​​ അനിവാര്യമാണെന്നും മന്ത്രി കൂട്ടിച്ചേർത്തു.

മരണക്കിടക്കയിൽ കിടക്കുന്ന ആൾക്ക് കൊടുക്കാനുള്ള വെള്ളത്തിനും കത്ത് നൽകേണ്ടി വരുമോയെന്ന്​ പ്രമേയം അവതരിപ്പിച്ച എം. വിൻസന്റ് ചോദിച്ചു. ആരാച്ചാർക്കുള്ള ദയപോലും സർക്കാറിനില്ല. 70 ലക്ഷം പേർക്ക് ഈ ചാർജ് വർധന ബാധകമാകും. അടച്ചിട്ട വീടിന് നികുതി ഏർപ്പെടുത്തിയപോലെ കിട്ടാത്ത വെള്ളത്തിന് നികുതി അടക്കേണ്ടിവരും. എ.ഡി.ബിയെ കരിഓയിൽ ഒഴിച്ച എൽ.ഡി.എഫാണ്​ ഇപ്പോൾ എ.ഡി.ബിക്കുവേണ്ടി കരം കൂട്ടിയതെന്നും അദ്ദേഹം കൂട്ടിച്ചേർത്തു.

നികുതി ഈടാക്കുന്നത്​ സർക്കാറിന്‍റെ അവകാശമാണെന്നും ​പക്ഷേ, അത്​ ഈടാക്കുന്നത്​ മനുഷ്യന്റെ അവസ്ഥ പരിഗണിച്ചാകണമെന്നും പ്രതിപക്ഷ നേതാവ് വി.ഡി. സതീശൻ പറഞ്ഞു. അടിയന്തരപ്രമേയം ചെയർ തള്ളിയതിനെ തുടർന്നാണ്​ പ്രതിപക്ഷം ഇറങ്ങിപ്പോയത്​.