അത്​ അമ്മയല്ല, നിസ്സഹായതയിൽ നിലവിളിച്ച്​ പ്രസന്ന

നിലമ്പൂർ: ബന്ധുക്കളുടെ കൈത്താങ്ങിൽ ആശുപത്രിയിലേക്ക് നടന്നുനീങ്ങുമ്പോൾ പ്രസന്നക്ക്​ വിറക്കുന്നുണ്ടായിരുന്നു. ഹൃദയം നുറുങ്ങുന്ന വേദനയോടെയാണ് അവർ മൃതശരീരങ്ങൾ കിടത്തിയ വാർഡിന്‍റെ പടി കയറിയത്. മൃതദേഹം അമ്മയുടേതാവല്ലേ എന്നായിരുന്നു പ്രാർഥന. അമ്മയുടേതെന്ന്​ ബന്ധുക്കൾ സംശയിച്ച മൃതശരീരത്തിലേക്ക്​ ഒന്നു നോക്കാനേ സാധിച്ചുള്ളു. ശരീരം അമ്മയുടേതെന്ന്​​ ഉറപ്പിക്കാൻ പ്രസന്നക്ക്​ കഴിഞ്ഞില്ല. പാതി മാത്രമുള്ള ശരീരം കണ്ട് അവർ വാവിട്ടു കരഞ്ഞു. ഏങ്ങലടിച്ച് ബന്ധുവി​ന്റെ തോളിലേക്ക് ചാഞ്ഞു. കൂടെയുള്ളവരുടെ കണ്ണുകൾ നിറഞ്ഞു.

വയനാട്​ ഉരുൾപൊട്ടലിൽ ചൂരൽമല മുരളീഭവനത്തിൽ ചിന്നയും സഹോദരനും സഹോദരഭാര്യയും പുത്രനുമടക്കം നാലുപേ​രെയാണ്​ കാണാതായത്. സഹോദരൻ ദാമോദര​ന്റെ മൃതദേഹം വീടിനടുത്തുനിന്ന് തന്നെ കണ്ടെത്തി. 84കാരിയായ ചിന്നയെയും ദാമോദരന്‍റെ ഭാര്യ അമ്മാളുവിനെയും മകൻ ഹരിദാസനെയും കണ്ടെത്താനായില്ല. ചാലിയാറിൽ നടത്തിയ തിരച്ചിലിൽ ചൊവ്വാഴ്​ചയാണ്​ ചിന്നയുടേതെന്ന്​ സംശയിക്കുന്ന മൃതദേഹം ക​ണ്ടെത്തിയത്​.

മേപ്പാടിയിലേക്ക്​ കൊണ്ടുപോയ മൃതദേഹം, വ്യാഴാഴ്ച രാവിലെ പ്രസന്നയുടെ സഹോദരങ്ങൾക്ക്​ കൂടി കാണിച്ചുകൊടുക്കും. ഇതിനു ശേഷമേ ചിന്നയുടേതാണോയെന്ന സംശയത്തിന്​ അറുതിയാവുകയുള്ളു. ചൂരൽമലയിൽ ചിന്നയും സഹോദരൻ ദാമോദരനും അടുത്തടുത്ത വീടുകളിലാണ്​ താമസം.

ദുരന്തത്തിന്​ തലേന്നാൾ പകൽ ചിന്ന, ഒന്നര കിലോമീറ്റർ അകലെ നീലിക്കാവ്​ പാലത്തിന്​ സമീപമുള്ള സഹോദരി ചന്ദ്രികയുടെ വീട്ടിലായിരുന്നു. വൈകുന്നേരം സ്വന്തം വീട്​ തുറന്ന് വിളക്കുവെച്ചശേഷം അന്തിയുറങ്ങാൻ തൊട്ടുതാഴെയുള്ള ദാമോദരന്‍റെ വീട്ടിലേക്ക്​ പോവുകയായിരുന്നു. ഉരുൾപൊട്ടലിൽ ഈ വീടും സമീപമുള്ള വീടുകളും അപ്പാടെ ഒലിച്ചുപോയി. ഈ വീട്ടിൽ അന്തിയുറങ്ങിയ നാലുപേരെയാണ്​ ദുരന്തം കവർന്നത്​.