വയനാട്​ ദുരന്തം: നിർത്തലാക്കിയ 300 രൂപ ദിനബത്ത പുനരാരംഭിക്കാനാവുമോയെന്ന്​​ പരിശോധിക്കും​ -മുഖ്യമന്ത്രി

തിരു​വനന്തപുരം: വയനാട്​ ദുരന്തബാധിതരായി വാടകവീടുകളിൽ താമസിക്കുന്ന ഒരു കുടുംബത്തിലെ രണ്ടുപേർക്ക്​ വീതം​ 300 രൂപ വീതം ദിനബത്ത കൊടുത്തിരുന്നത്​ പുനരാരംഭിക്കാനാവുമോയെന്ന്​​ പരിശോധിക്കുമെന്ന്​ മുഖ്യമന്ത്രി പിണറായി വിജയൻ. സംസ്ഥാന ദുരന്തനിവാരണ നിധിയിൽനിന്ന്​ മൂന്നുമാസം വരെ മാത്രമേ അത്തരത്തിൽ സഹായധനം വിതരണം ചെയ്യാൻ പറ്റൂ എന്നതിനാലാണ്​​ അത്​ നിർത്തിയത്​. ഇനിയുമത്​ കൊടുക്കാൻ കഴിയുമോയെന്നത്​ ഗൗരവമായി പരിഗണിക്കും. അതിതീവ്ര ദുരന്തമായി പ്രഖ്യാപിച്ചതിനാൽ എം.പിമാരുടെ ഫണ്ടിൽനിന്ന് ഒരു കോടി രൂപ വരെ ചെലവഴിക്കാൻ അനുമതിയുണ്ട്. ഇക്കാര്യം സൂചിപ്പിച്ച്​ രാജ്യത്തെ എല്ലാ എം.പിമാർക്കും താൻ നേരിട്ട് കത്ത്​ അയച്ചിട്ടുണ്ടെന്നും നിയമസഭയിൽ ടി. സിദ്ദീഖ്​ എം.എൽ.എയെ മുഖ്യമന്ത്രി പിണറായി വിജയൻ അറിയിച്ചു.

സംസ്ഥാന ദുരന്തനിവാരണ നിധിയുടെ മനദണ്ഡങ്ങളിൽ ഹൈകോടതി ഇളവ്​ വരുത്തിയതിനാൽ 120 കോടി രൂപ വിനിയോഗിക്കാൻ അനുമതിയുണ്ട്​. എന്നാൽ, ദുരന്തത്തിൽ കൃഷിഭൂമി നഷ്ടപ്പെട്ടവർക്ക് പകരം കൃഷിഭൂമി നൽകാനാവില്ലെന്നും മുഖ്യമന്ത്രി പറഞ്ഞു.

ദുരന്ത നിവാരണ നിയമം അനുസരിച്ചല്ല വയനാട്ടിൽ ഭൂമി ഏറ്റെടുക്കുന്നത്​. ഭൂമി ഏറ്റെടുക്കൽ നിയമപ്രകാരം നിശ്ചയിക്കുന്ന തുക ഉടമകൾക്ക്​ നൽകും. ഇത്​​ ഹൈകോടതിയും അംഗീകരിച്ചിട്ടുണ്ട്​. അതിന്‍റെപേരിൽ വീണ്ടും എതിർപ്പ്​ ഉയരുമെന്ന്​ തോന്നുന്നില്ല. എന്നാൽ, ആശങ്കയുടെ പേരിൽ ചിലർ കോടതിയെ സമീപിച്ചിട്ടുണ്ട്​. ദുരന്തനിവാരണ നിയമപ്രകാരം ഇനിയും ഭൂമി ഏറ്റെടുക്കുമോയെന്നാണ്​ അവരുടെ ആശങ്ക. അക്കാര്യം കോടതിയിൽ പറഞ്ഞാൽ ഹൈകോടതിതന്നെ അത്​ പരിഹരിക്കുമെന്നാണ്​ കരുതുന്നത്​- മുഖ്യമന്ത്രി പറഞ്ഞു.