വിദ്യാർഥികൾക്ക്​ ഡിജിറ്റൽ പഠനസൗകര്യത്തിന്​ വെബ്സൈറ്റ്: സാധ്യത റിപ്പോർട്ട്​ തേടി ഹൈകോടതി

കൊച്ചി: ഡിജിറ്റൽ പഠനസൗകര്യങ്ങളില്ലാത്ത വിദ്യാർഥികൾക്കും സ്കൂളുകൾക്കും ലഭ്യമാക്കാൻ വെബ്സൈറ്റ് ആരംഭിക്കുന്നതി​ലെ വിജയസാധ്യത പരിശോധിച്ച് റിപ്പോർട്ട്​ നൽകണമെന്ന്​ ഹൈകോടതി. വീടുകളിൽ ഒാൺലൈൻ പഠനത്തിന്​ സൗകര്യമില്ലെന്ന് ചൂണ്ടിക്കാട്ടി എരുമേലി മുക്കട ജി.എച്ച്.എസിലെ അഞ്ചാം ക്ലാസ് വിദ്യാർഥിനി ഉൾപ്പെടെ വിവിധ സ്കൂളുകളിൽനിന്നുള്ള ഏഴ് കുട്ടികൾ മാതാപിതാക്കൾ മുഖേന നൽകിയ ഹരജിയിലാണ് ജസ്​റ്റിസ് രാജ വിജയരാഘവൻ സർക്കാറിന്​ ഈ നിർദേശം നൽകിയത്​.

മൊബൈൽ ഫോണും മറ്റ്​ ഡിജിറ്റൽ ഉപകരണങ്ങളുമില്ലാത്തവർക്ക്​ അക്കാര്യം വ്യക്തമാക്കി രജിസ്​റ്റർ ചെയ്യാൻ കഴിയുന്ന വിധത്തിൽ കേരള സ്​റ്റേറ്റ് ഐ.ടി മിഷ​െൻറ സഹായത്തോടെ വെബ്സൈറ്റ് തുടങ്ങുന്നതിനെക്കുറിച്ചാണ് ഹൈകോടതി ആലോചിക്കുന്നത്. വീടുകളിൽ ഒാൺലൈൻ സൗകര്യമില്ലാത്തതിനാൽ പഠനം തുടരാനാവുന്നില്ലെന്നും സ്വതന്ത്രവും നിർബന്ധിതവുമായ വിദ്യാഭ്യാസം ഭരണഘടന ഉറപ്പുനൽകുന്ന അവകാശമാണെന്നും ചൂണ്ടിക്കാട്ടിയാണ്​ ഹരജി.

മുക്കട, ചെല്ലാനം, ചേർത്തല, പത്തനംതിട്ട എന്നിവിടങ്ങളിലെ വിവിധ സ്കൂളുകളിൽ പഠിക്കുന്ന ഡിജിറ്റൽ സൗകര്യങ്ങളില്ലാത്ത കുട്ടികളുടെ ലിസ്​റ്റും ഇവർ ഹാജരാക്കിയിട്ടുണ്ട്. ഡിജിറ്റൽ സൗകര്യമില്ലാത്തതി​െൻറ പേരിൽ പഠനം നിഷേധിക്കരുതെന്ന്​ കോടതി ഓർമിപ്പിച്ചു. തുടർന്നാണ്​ ​വെബ്​സൈറ്റ്​ തുടങ്ങുന്നത്​ സംബന്ധിച്ച ആശയം മുന്നോട്ടുവെച്ചത്​. വെബ്സൈറ്റ് പരിശോധിക്കുന്നവർക്ക്​ അർഹരായ കുട്ടികൾക്ക് ഡിജിറ്റൽ ഉപകരണങ്ങൾ നൽകാനും ഇതിനുള്ള തുക സംഭാവന നൽകാനും കഴിയുമെന്ന്​ കോടതി അഭിപ്രായപ്പെട്ടു.

ഹരജിക്കാർക്ക് ഒാൺലൈൻ പഠനം മുടങ്ങുന്നില്ലെന്ന്​ ഉറപ്പാക്കാൻ സർക്കാർ സ്വീകരിച്ച നടപടി അറിയിക്കാനും നിർദേശിച്ചിട്ടുണ്ട്​. ഹരജി 10 ദിവസത്തിനുശേഷം വീണ്ടും പരിഗണിക്കാൻ മാറ്റി.