ജിഷ്​ണുവിനെന്തുപറ്റി; ഒരാണ്ടായിട്ടും ഉത്തരമില്ല

കോട്ടയം: വൈക്കം കുടവെച്ചൂരിൽ വെളുത്തേടത്തുചിറ വീട്ടിൽനിന്ന്​ പതിവുപോലെ ജോലിക്ക്​ പോയ ജിഷ്ണുവിന്​ (23)​ എന്തുസംഭവിച്ചു എന്നതിന്​ ഒരാണ്ടായിട്ടും ഉത്തരമില്ല. മൂന്നാഴ്​ചക്കുശേഷം കണ്ടെത്തിയ അസ്ഥികൂടം ജിഷ്​ണുവി​േൻറതാണെന്നും ആത്മഹത്യ ചെയ്​തതാണെന്നുമാണ്​ പൊലീസ്​ കണ്ടെത്തൽ. എന്തിന്​ ആത്മഹത്യ ചെയ്​തെന്നോ കൊലപാതകമാ​യിരുന്നോ എന്നിങ്ങനെയുള്ള വീട്ടുകാരുടെ ചോദ്യങ്ങൾക്ക്​ വർഷം ഒന്നായിട്ടും കൃത്യമായ മറുപടിയില്ല. വൈക്കം കുടവെച്ചൂരിൽ വെളുത്തേടത്ത് ചിറ ഹരിദാസി​െൻറയും ശോഭനയുടെയും ഇളയ മകൻ ജിഷ്ണു ​​(23)​ കഴിഞ്ഞ ജൂൺ മൂന്നിന്​ രാവിലെ ജോലിക്ക്​ പോയതാണ്​​. കുമരകത്തെ ബാർ ഹോട്ടലിൽ കമ്പ്യൂട്ടർ വിഭാഗം ജോലിക്കാരനായിരുന്ന​ു. വൈകീട്ട്​ ബാറിലെ ജീവനക്കാർ അന്വേഷിച്ചെത്തിയപ്പോൾ മാത്രമാണ്​ ജിഷ്ണു ജോലിക്കെത്തിയില്ലെന്ന്​ വീട്ടുകാർ അറിഞ്ഞത്​.

തുടർന്ന്​ വൈക്കം പൊലീസിൽ പരാതിയും നൽകി. മൊബൈൽ ഫോൺ കേന്ദ്രീകരിച്ച്​ സൈബർസെൽ നടത്തിയ അന്വേഷണത്തിൽ ഫോൺ ചെങ്ങളത്തുവെച്ച്​ ഓഫായതായി കണ്ടെത്തി. പിന്നീട്​ ഓണായിട്ടില്ല. കേസ്​ എങ്ങുമെത്താ​തിരുന്ന സമയത്താണ്​ 26ന്​ നാട്ടകം മറിയപ്പള്ളിയിൽ സാഹിത്യ പ്രവർത്തക സഹകരണ സംഘത്തി​െൻറ ഉടമസ്ഥതയിലുള്ള സ്ഥലം വൃത്തിയാക്കുന്നതിനിടെ മരത്തിനു കീ​ഴിൽ അസ്ഥികൂടം കണ്ടെത്തിയതും ജിഷ്​ണുവി​േൻറതാണെന്ന്​ തിരിച്ചറിഞ്ഞതും. സമീപത്തുനിന്ന്​ ജിഷ്​ണുവി​െൻറ മൊബൈൽ ഫോൺ കണ്ടെത്തിയിരുന്നു. ഫോണിലെ സിം കാർഡും ജിഷ്​ണുവി​േൻറതായിരുന്നു. ആത്മഹത്യയെന്നായിരുന്നു​ നിഗമനം​.

ഫോറൻസിക്​ വിഭാഗം നടത്തിയ പ്രാഥമിക പരിശോധനയിലും തൂങ്ങിമരണമാണെന്നാണ്​ വ്യക്തമായത്​.​ ഡി.എൻ.എ പരിശോധനയിലും ജിഷ്​ണുവാണെന്ന്​ സ്ഥിരീകരിച്ചു. എന്നാൽ, എന്തിന്​ ആത്മഹത്യ ചെയ്​തു, കുമരകത്തേക്ക്​ പോയ ജിഷ്​ണു എങ്ങനെ നാട്ടകത്തെത്തി, കഴുത്തിലുണ്ടായിരുന്ന സ്വർണമാല എവിടെ തുടങ്ങിയ ചോദ്യങ്ങൾക്ക്​ ഉത്തരം ലഭിച്ചിട്ടില്ല. തലയോട്ടിയിൽ വലതുഭാഗത്തെ ഏതാനും പല്ലുകളില്ലായിരുന്നു. ആ വഴിക്കൊന്നും അന്വേഷണം നടന്നിട്ടില്ലെന്ന് ബന്ധുക്കൾ പറയുന്നു.

അസ്ഥികൂടത്തിൽ ക​ണ്ട വസ്​ത്രങ്ങൾ ജിഷ്​ണുവി​​െൻറയല്ലെന്നും മൃതദേഹാവശിഷ്​ടം 23കാര​േൻറതല്ലെന്നും വീട്ടുകാർ പറയുന്നു. ആത്മഹത്യയാണെന്ന തീരുമാനത്തിൽ കേസ്​ അവസാനിപ്പിച്ചെങ്കിലും മൃത​േദഹാവശിഷ്​ടങ്ങൾ ഏറ്റെടുക്കാൻ ബന്ധുക്കൾ തയാറായിട്ടില്ല. വീട്ടുകാരുടെ ആവശ്യപ്രകാരം അന്വേഷണം ക്രൈംബ്രാഞ്ചിന്​ കൈമാറിയിരിക്കുകയാണ്​.