കോടതിയിൽ മാണിയുടെ പേര്​ പരാമർശിച്ചിട്ടില്ല; സഭയിൽ നടന്നത്​ അഴിമതിക്കെതിരായ സമരം -എ. വിജയരാഘവൻ

തിരുവനന്തപുരം: നിയമസഭയിൽ ഇടതുപക്ഷ മുന്നണി നടത്തിയത്​ യു.ഡി.എഫിന്‍റെ അഴിമതിക്കെതിരായ സമരമായിരുന്നുവെന്ന്​ സി.പി​.എം സംസ്ഥാന ആക്​ടിങ്​ സെക്രട്ടറി എ. വിജയരാഘവൻ. അന്ന്​ യു.ഡി.എഫ്​ സർക്കാർ അഴിമതിയിൽ മുങ്ങി നിൽക്കുകയായിരുന്നു. ആ സർക്കാറിനെതിരായ സമരമാണ്​ സഭയിൽ നടന്നത്​. സുപ്രീംകോടതിയിൽ ഇതുസംബന്ധിച്ച്​ എവിടെയും കെ.എം. മാണി എന്ന പേര്​ തന്നെ പരാമർശിച്ചിട്ടില്ലെന്നും അദ്ദേഹം പറഞ്ഞു.

കോടതിയിൽ നടന്ന കാര്യങ്ങളെ ഇടതുപക്ഷ വിരുദ്ധ മാധ്യമങ്ങൾ തെറ്റായി വ്യാഖ്യാനിക്കുകയാണ്​ ചെയ്​തത്​. മാധ്യമങ്ങളുടെ രാഷ്​ട്രീയ ലക്ഷ്യം വാർത്തകളിൽ പ്രതിഫലിക്കും. വാർത്താ നിർമാണ വിദഗ്​ധർ കൂടി മാധ്യമപ്രവർത്തകരുടെ കൂട്ടത്തിലുണ്ടെന്നും വിജയരാഘവൻ കുറ്റപ്പെടുത്തി.

കെ.എം മാണി കേരളത്തിൽ ദീർഘകാലം രാഷ്​ട്രീയ പ്രവർത്തനം നടത്തിയ ആളാണ്​. അദ്ദേഹം അനുഭവ സമ്പത്തുള്ള പൊതുപ്രവർത്തകനായിരുന്നു. ബാർ കോഴ വിഷയവുമായി ബന്ധപ്പെട്ട വിജിലൻസ്​ അന്വേഷണങ്ങൾ നടന്നതാണ്​. ഉയർന്നു വന്ന വിഷയങ്ങളിൽ കെ. എം മാണിക്ക്​ വ്യക്തിപരമായി ഉത്തരവാദിത്തമില്ലെന്നാണ്​ വിജിലൻസ്​ കണ്ടെത്തിയത്​.

ഇടതുമുന്നണിയിലെ പ്രധാന ഘടക കക്ഷിയാണ്​ കേരള കോൺഗ്രസ്​ എം. മുന്നണിയിൽ നല്ല നിലയിലാണ്​ കാര്യങ്ങൾ നീങ്ങുന്നത്​. പരസ്​പര ബഹുമാനത്തോടു കൂടിയാണ്​ ഇടതു മുന്നണിയിലെ ഘടക കക്ഷികൾ മുന്നോട്ടു പോകുന്നത്​. സ്വാഭാവികമായും ആശയക്കുഴപ്പമുണ്ടാക്കാൻ ഒരു വിഭാഗം മാധ്യമങ്ങൾ ശ്രമിക്കുന്നു​ണ്ടെന്നും അദ്ദേഹം പറഞ്ഞു.

യു.ഡി.എഫാണ്​ കേരളത്തിലെ എല്ലാ അഴിമതിയുടേയും അടിത്തറ. യു.ഡി.എഫ്​ എന്നത്​ അഴിമതി സർവ വ്യാപിയായി നടപ്പിലാക്കിയ ഒരു സംവിധാനമാണ്​. ഭരണം അഴിമതിക്കു വേണ്ടി വിനിയോഗിച്ചവരാണ്​ യു. ഡി.എഫുകാരെന്നും അദ്ദേഹം ആരോപിച്ചു. യു.ഡി.എഫിനെ തള്ളിപ്പറഞ്ഞുകൊണ്ടാണ്​ കേരള കോൺഗ്രസ് എം​ ഇടതു​മുന്നണിയിലേക്ക്​​ വന്നത്​. തെര​ഞ്ഞെടുപ്പുകളിൽ ഇടതു മുന്നണിയുടെ വിജയത്തിനു വേണ്ടി നല്ല നിലയിൽ പ്രവർത്തിച്ചവരാണ്​​ കേരള കോൺഗ്രസ്​ എം എന്നും വിജയരാഘവൻ പറഞ്ഞു.