ഹാദിയ​ വീട്ടുതടങ്കലിലല്ലെന്ന്​ പിതാവ്​ അശോകൻ

കോട്ടയം: കോടതി വിധി അംഗീകരിക്കുമെന്ന്​ ഹാദിയയുടെ പിതാവ്​ അശോകൻ. ഹാദിയയെ കോടതിയിൽ താൻ തന്നെ ഹാജരാക്കും. മകൾ വീട്ടുതടങ്കലിലല്ല. നവംബർ 27ന്​ ഹാദിയയെ തുറന്നകോടതിയിൽ നേരിട്ട്​ ഹാജരാക്കണമെന്ന സുപ്രീംകോടതി വിധിയോട്​ വൈക്കം ടി.വിപുരത്തെ വസതിയിൽ മാധ്യമപ്രവർത്തകരോട്​ പ്രതികരിക്കുകയായിരുന്നു അദ്ദേഹം. ഇന്ത്യൻ ഭരണഘടനയെയും  കോടതിവിധിയെയും അംഗീകരിക്കുന്നു. ഹാദിയയെ എവിടേക്ക്​ വേണമെങ്കിലും കൊണ്ടുപോകാൻ തയാറാണ്​. പൊലീസ്​ സംരക്ഷണം വേണമെന്ന്​ മാത്രം.

മകൾ ഏതു മതത്തിൽ ജീവിച്ചാലും തനിക്ക്​ പ്രശ്​നമില്ല. അവൾക്ക്​ പുറത്തുപോകാൻ ഒരുതടസ്സവുമില്ല. സ്വന്തം തീരുമാനപ്രകാരമാണ്​ അവൾ പുറത്തിറങ്ങാത്തത്​. താൻ മകളെ വീട്ടുതടങ്കലിൽ പാർപ്പിച്ചിരിക്കുകയാണെന്നത്​ വ്യാജപ്രചാരണമാണ്​. ത​​െൻറ വീടിനുചുറ്റും പൊലീസാണ്​. വീട്ടിനകത്ത്​ രണ്ട്​ വനിത പൊലീസുകാരുമുണ്ട്​. പൊലീസ്​ സംരക്ഷണയിൽ മകൾക്ക്​ എവിടെ വേണ​മെങ്കിലും പോകാം. അ​വളോട്​ താൻ തന്നെ പറഞ്ഞിട്ടുണ്ട്​. പ​േക്ഷ, അവൾക്ക്​ പോകാൻ താൽപര്യമില്ല. നിർബന്ധിച്ച്​ അയക്കാൻ അവൾ കൊച്ചുകുട്ടിയൊന്നുമല്ല. 

കേസി​​െൻറ തുടക്കം മുതൽ വലിയരീതിയിലുള്ള പ്രചാരണങ്ങളാണ്​ തനിക്കും കുടുംബത്തിനും​ നേരെ നടക്കുന്നത്​. ഇതെല്ലാം വളരെ ആസൂത്രിതമായാണ്​ ചെയ്യുന്നത്​. മകൾ ഏത്​ മതത്തിൽപെട്ടയാളെയും വിവാഹം കഴിക്കുന്നതിൽ എതിർപ്പില്ല. പക്ഷേ, ഇപ്പോഴത്തെ സംഘത്തിന്​ തീവ്രവാദബന്ധമുണ്ടെന്ന്​ കോടതിയെ ബോധിപ്പിച്ചിട്ടുണ്ട്​. ഇക്കാര്യത്തിൽ കോടതി ശരിയായ തീരുമാനമെടുക്കുമെന്നാണ്​ പ്രതീക്ഷയെന്നും അദ്ദേഹം പറഞ്ഞു. ഹാദിയയുമായി വിവാഹം അസാധുവാക്കിയ ഹൈകോടതിവിധിക്കെതിരെ ​ഭർത്താവ്​ ഷെഫിൻ ജഹാൻ നൽകിയ ഹരജി തിങ്കളാഴ്​ച സുപ്രീംകോടതി പരിഗണിക്ക​േവ ഹാദിയയുടെ വൈക്കം ടി.വിപുരത്തെ വീട്ടിലും പരിസരത്തും വൻ പൊലീസ്​ സുരക്ഷ ഒരുക്കിയിരുന്നു.