സ്കൂട്ടറും ബസും കൂട്ടിയിടിച്ച് യുവതി മരിച്ചു; സഹയാത്രികക്ക് ഗുരുതര പരിക്ക്

കുറ്റിപ്പുറം: ദേശീയപാതയിൽ സ്കൂട്ടറും കെ.എസ്.ആർ.ടി.സി ബസും കൂട്ടിയിടിച്ച് യുവതി മരിച്ചു. വളാഞ്ചേരി വട്ടപ്പാറ സ്വദേശി ആലുങ്ങൽ സിറാജുന്നിസ(23) യാണ് മരിച്ചത്.

സ്കൂട്ടറിൽ കുടെയുണ്ടായിരുന്ന വളാഞ്ചേരി കാട്ടിപ്പരുത്തി സ്വദേശി ചെകിടൻ കുഴിയിൽ റാഫിദയെ ഗുരുതര പരിക്കുകളോടെ വളാഞ്ചേരി നടക്കാവിൽ ആശുപത്രിയിൽ പ്രവേശിപ്പിച്ചു.

ബുധനാഴ്ച രാവിലെ 8:45 ഓടെ വളാഞ്ചേരി -കുറ്റിപ്പുറം ദേശീയ പാതയിൽ ഒലീവ് ഓഡിറ്റോറിയത്തിന് സമീപമാണ് അപകടം. യുവതികൾ സഞ്ചരിച്ച സ്കൂട്ടർ കെ.എസ്.ആർ.ടി.സി ബസുമായി കൂട്ടിയിടിക്കുകയായിരുന്നു. വളാഞ്ചേരിയിൽ നിന്നും എടപ്പാളിലേക്ക് പോകുന്ന സ്കൂട്ടറും തൃശൂരിൽ നിന്ന് കോഴിക്കോട്ടേക്ക് പോകുന്ന ബസുമാണ് അപകടത്തിൽപെട്ടത്.