അധ്യാപകനെതിരെ നൽകിയ പീഡന പരാതി വ്യാജമായിരുന്നെന്ന് ഏഴുവർഷത്തിനുശേഷം യുവതി; പരസ്യമായി ക്ഷമ ചോദിച്ചു

കടുത്തുരുത്തി (കോട്ടയം): അധ്യാപകനെതിരെ നൽകിയ പീഡന പരാതി വ്യാജമെന്ന് ഏഴുവർഷത്തിനുശേഷം വെളിപ്പെടുത്തി യുവതി. കുറുപ്പന്തറയിൽ പാരാമെഡിക്കൽ സ്ഥാപനം നടത്തിയിരുന്ന ആയാംകുടി മധുരവേലി സ്വദേശി സി.ഡി. ജോമോനാണ്​ നിരപരാധിയെന്ന്​ വെളിപ്പെട്ടത്​. പരാതി​ക്കാരി കോടതിയിലെത്തി കേസും പിൻവലിച്ചു.

2017ലാണ്​ ജോമോന്‍റെ സ്ഥാപനത്തിൽ പഠിച്ചിരുന്ന എറണാകുളം സ്വദേശിനി പരിശീലനത്തിന്​ കൊണ്ടുപോകുംവഴി പീഡിപ്പിച്ചെന്ന്​ പരാതി നൽകിയത്. കേസിൽ ജോമോൻ അറസ്റ്റിലാകുകയും സ്ഥാപനം പൂട്ടുകയും ചെയ്തു. കുടുംബാംഗങ്ങളും നാട്ടുകാരും അകറ്റിനിർത്തി. പിന്നീട്​ കേസിന്‍റെ പിന്നാലെയായി ഇയാളുടെ ജീവിതം.

പരാതി വരുന്നതിനു​മുമ്പ്​ ചിലർ പണം ആവശ്യപ്പെട്ട് വിളിച്ചിരുന്നതായി ജോമോൻ പറയുന്നു. കുടുംബം പട്ടിണിയിലായതോടെ മറ്റു പണികൾക്കിറങ്ങി. അടുത്തിടെ ജോമോന്‍റെ ദുരിതജീവിതത്തെപ്പറ്റി അറിഞ്ഞ പരാതിക്കാരി ഭർത്താവിനൊപ്പം ജോമോന്‍റെ വീടിന്​ സമീപത്തെ ദേവാലയത്തിലെത്തി. ഇവിടെവെച്ച്​ ജോമോൻ നിരപരാധിയാണെന്നും ചിലരുടെ പ്രേരണയിൽ പീഡനപരാതി നൽകിയതാണെന്നും സമ്മതിച്ചു.

ജോമോനോടും കുടുംബത്തിനോടും ഇവർ പരസ്യമായി ക്ഷമ ചോദിക്കുകയുംചെയ്തു. പിന്നീട്​ കോടതിയിൽ ഹാജരായി ​കേസ്​ പിൻവലിക്കുകയായിരുന്നു. തന്‍റെ നിരപരാധിത്വം ബോധ്യപ്പെട്ടതിൽ സന്തോഷമുണ്ടെന്ന്​ ജോമോൻ പറഞ്ഞു.