''യുവജനങ്ങൾക്കും പുതുമുഖങ്ങൾക്കും പ്രാതിനിധ്യം വേണം, ജനങ്ങൾക്ക്​ താൽപര്യമുള്ളവരെ മത്സരിപ്പിക്കണം''

പാലക്കാട്​: സംസ്ഥാന കോൺ​ഗ്രസിൽ തലമുറ മാറ്റം വേണമെന്ന്​ യൂത്ത്​ കോ​ൺഗ്രസ്​ സംസ്ഥാന പ്രസിഡൻറ്​ ഷാഫി പറമ്പിലും വൈസ്​ പ്രസിഡൻറ്​ കെ.എസ്​. ശബരീനാഥും വാർത്തസമ്മേളനത്തിൽ ആവശ്യപ്പെട്ടു. കേന്ദ്ര, സംസ്ഥാന സർക്കാറുകളുടെ ദുഷ്​ചെയ്​തികൾക്കെതിരെ യു.ഡി.എഫ്​ നിരവധി സമരങ്ങൾ നടത്തിയെങ്കിലും തദ്ദേശ തെരഞ്ഞെടുപ്പിൽ പ്രതിഫലിപ്പിക്കാൻ കഴിഞ്ഞില്ല. രാഷ്​ട്രീയ കാമ്പയിനുകളുടെ അഭാവമാണ്​ മുന്നണിക്ക്​​ മേൽ​െക്കെ ​ലഭിക്കാതിരിക്കാൻ കാരണം. പരാജയത്തിൽ എല്ലാവർക്കും ഉത്തരവാദിത്തമുണ്ട്​.

നേതൃത്വത്തി​െൻറ ജാഗ്രതക്കുറവും തോൽവിയിലേക്ക്​ നയിച്ചു. നിയമസഭ തെരഞ്ഞെടുപ്പിൽ കോൺഗ്രസ്​ സ്ഥാനാർഥി പട്ടികയിൽ യുവജനങ്ങൾക്കും പുതുമുഖങ്ങൾക്കും കൂടുതൽ പ്രാതിനിധ്യം നൽകണം. പാളിച്ചകളിൽനിന്ന്​ നേതൃത്വം പാഠം പഠിക്കണം. വിജയസാധ്യതയുള്ളവരെ ഗ്രൂപ്​ സമവാക്യങ്ങളുടെ പേരിൽ മാറ്റിനിർത്തരുത്​. വ്യത്യസ്​ത മേഖലകളിലും താഴെത്തട്ടിലും കഴിവ്​ തെളിയിച്ച പരിചയസമ്പന്നരെയും കളത്തിലിറക്കണം. ആര്​ നിന്നാലും വിജയിക്കുന്നിടങ്ങളിൽ പുതുമുഖങ്ങൾക്ക്​ അവസരം നൽകണം.

പതിവായി തോൽക്കുന്ന മണ്ഡലങ്ങളിൽ യുവാക്കളെ മുൻകൂട്ടി നിയോഗിച്ച്​ സീറ്റ്​ പിടിക്കാനുള്ള പരിശ്രമം ആസൂത്രണം ചെയ്യണം. നേതൃത്വത്തിന്​ ഇഷ്​ടമായവ​െ​ര ജനങ്ങൾക്ക്​ ഇഷ്​ടമാവണമെന്നില്ല. ജനങ്ങൾക്ക്​ താൽപര്യമുള്ളവരെയാണ്​ മത്സരിപ്പിക്കേണ്ടത്​. ചിലർക്ക്​ തുടർച്ചയായി സീറ്റ്​ നൽകുന്നതാണ്​ പരാജയ കാരണം. ഗ്രൂപ്പിന്​ അതീതമായ പ്രതിബദ്ധതയാണ്​ ​ആവശ്യം. പാർട്ടി സമീപനങ്ങളിലാണ്​ അഴിച്ചുപണി വേണ്ടത്​. സ്ഥാനാർഥി നിർണയം, താഴെത്തട്ടിലുള്ള പ്രവർത്തനം, തെരഞ്ഞെടുപ്പ്​ മുന്നൊരുക്കം എന്നിവയിലെല്ലാം കാതലായ മാറ്റം അനിവാര്യമാണ്​.

പാർട്ടിയിലും മുന്നണിയിലും അടിമുടി അഴിച്ചുപണി ആവശ്യമാണ്​. കോൺ​ഗ്രസ്​ എം.പിമാർ, മത്സരരംഗത്തിറങ്ങുന്നതിന്​ പകരം യു.ഡി.എഫ്​ വിജയത്തിനുവേണ്ടി മണ്ഡലങ്ങളിലേക്ക്​ ഇറങ്ങിച്ചെന്ന്​ പ്രവർത്തിക്കുകയാണ്​ വേണ്ടതെന്നും ഷാഫി പറമ്പിലും കെ.എസ്​. ശബരീനാഥും വ്യക്തമാക്കി. മലമ്പുഴയിൽ രണ്ടുദിവസമായി നടന്ന യൂത്ത്​ കോൺ​ഗ്രസ്​ സംസ്ഥാന എക്​സിക്യൂട്ടിവ്​ ക്യാമ്പിൽ വന്ന നിർദേശങ്ങൾ കെ.പി.സി.സി, ​എ.​െഎ.സി.സി നേതൃത്വങ്ങളെ ബോധ്യപ്പെടുത്തും.

ജനുവരി 11ന്​ ​തിരുവനന്തപുരത്ത്​ കോൺഗ്രസ്​ യുവ എം.പിമാർ, എം.എൽ.എമാർ, തദ്ദേശ സ്ഥാപനങ്ങളിലേക്ക്​ തെരഞ്ഞെടുക്കപ്പെട്ട യുവ പ്രതിനിധികൾ എന്നിവരുടെ യോഗം വിളിക്കും. തദ്ദേശ തെരഞ്ഞെടുപ്പിൽ വിജയിച്ചരും പരാജയപ്പെട്ടവരുമായ യുവജനങ്ങൾ നേടിയ വോട്ടും അവരിലൂടെ പാർട്ടിക്കുണ്ടായ നേട്ടവും വിപുലമായ ഒാഡിറ്റ്​ നടത്തി നേതൃത്വത്തെ ബോധ്യപ്പെടുത്തുമെന്നും ഇരുവരും അറിയിച്ചു.