യൂത്ത്​ കോൺഗ്രസ്​ നേതാവിനെ ആക്രമിച്ച സംഭവം: ബി.​ജെ.പി ജില്ല പ്രസിഡന്‍റിനെതിരെ കേസ്​; യുവമോർച്ച നേതാവ് ഒന്നാം പ്രതി

തൃശൂർ: പ്രധാനമന്ത്രി നരേന്ദ്ര മോദി പങ്കെടുത്ത വേദിക്ക്​ സമീപം ചാണകവെള്ളം തളിക്കാനും പ്രതിഷേധിക്കാനും ശ്രമിച്ച കെ.എസ്‌.യു-യൂത്ത് കോൺഗ്രസ് പ്രവർത്തകരെ തടയുകയും ആക്രമിക്കുകയും ചെയ്ത സംഭവത്തിൽ ബി.ജെ.പി തൃശൂർ ജില്ല പ്രസിഡന്‍റ്​ കെ.കെ. അനീഷ് കുമാറിനെതിരെ പൊലീസ് കേസെടുത്തു.

യുവമോർച്ച നേതാവ് മനോജിനെ ഒന്നാം പ്രതിയും അനീഷ്‌ കുമാറിനെ രണ്ടാം പ്രതിയുമാക്കിയാണ് ഈസ്റ്റ് പൊലീസ് കേസെടുത്തത്. ഇരുവർക്കുമെതിരെ ജാമ്യം ലഭിക്കുന്ന വകുപ്പുകളാണ് ചുമത്തിയിരിക്കുന്നത്. പട്ടിക ഉപയോഗിച്ച്​ ബി.ജെ.പി പ്രവർത്തകർ നടത്തിയ ആക്രമണത്തിൽ യൂത്ത് കോൺഗ്രസ് സംസ്ഥാന സെക്രട്ടറി സലിം കയ്പമംഗലത്തിന് തലക്ക് പരിക്കേറ്റിരുന്നു. സലിമിന്‍റെ മൊഴി പൊലീസ് രേഖപ്പെടുത്തി.

വ്യാഴാഴ്ച രാവിലെ തേക്കിൻകാട്​ മൈതാനിയിലെ നായ്ക്കനാലിൽ നിർമിച്ച വേദി അഴിച്ചുമാറ്റുമ്പോഴായിരുന്നു സംഘർഷം. പ്രതിഷേധവുമായെത്തിയ കെ.എസ്‌.യു-യൂത്ത് കോൺഗ്രസ് പ്രവർത്തകരും തടയാനെത്തിയ ബി.ജെ.പി-യുവമോർച്ച നേതാക്കളും വെല്ലുവിളിച്ച് ഏറ്റുമുട്ടി. പൊലീസ് ഇവരെ ബലം പ്രയോഗിച്ച്​ നീക്കുകയായിരുന്നു.

പ്രധാനമന്ത്രിയുടെ സന്ദർശനവുമായി ബന്ധപ്പെട്ട സുരക്ഷ ക്രമീകരണങ്ങളുടെ പേരിൽ നായ്ക്കനാലിലെ ആൽമരത്തിന്‍റെ കൊമ്പുകളും തേക്കിൻകാട് മൈതാനിയിലെ മരച്ചില്ലകളും മുറിച്ചിരുന്നു. ഇതിൽ പ്രതിഷേധിച്ചാണ്​ ‘മാ നിഷാദാ’ എന്ന പേരിൽ ഇരുപതോളം യൂത്ത് കോൺഗ്രസ് പ്രവർത്തകർ എത്തിയത്. ഇതോടൊപ്പം പ്രധാനമന്ത്രി പ്രസംഗിച്ച വേദിക്ക് സമീപം ചാണകവെള്ളം തളിക്കാൻ കെ.എസ്‌.യു പ്രവർത്തകരും എത്തി. തടയാൻ ആദ്യം കുറച്ച് ബി.ജെ.പി പ്രവർത്തകരാണ്​ ഉണ്ടായിരുന്നത്​. പിന്നീടാണ് അനീഷ്‌ കുമാറിന്‍റെ നേതൃത്വത്തിൽ കൂടുതൽ പേർ എത്തിയത്​.

അതേസമയം, തൃശൂർ ഈസ്റ്റ്‌ സി.ഐ അലവിക്കെതിരെ കേന്ദ്ര ആഭ്യന്തര മന്ത്രിക്ക് പരാതി നൽകിയതായി അനീഷ് കുമാർ പറഞ്ഞു. തേക്കിൻകാട് മൈതാനിയിൽ പ്രധാനമന്ത്രി പ്രസംഗിച്ച വേദിയിൽ ചാണകവെള്ളം തളിക്കാൻ യൂത്ത് കോൺഗ്രസിന് സൗകര്യമൊരുക്കാൻ സി.​ഐ ശ്രമിച്ചെന്നാണ്​ സി.ഐക്കെതിരായ ആ​രോപണം. സമ്മേളന സ്ഥലത്തേക്ക് സ്ത്രീകളെ പ്രവേശിപ്പിക്കാതിരിക്കാൻ സി.ഐ ശ്രമിച്ചതായും അനീഷ്‌ കുമാർ നൽകിയ പരാതിയിൽ പറയുന്നു. നിയമ നടപടികളുമായി മുന്നോട്ടുപോകുമെന്ന് ബി.ജെ.പി ജില്ല നേതൃത്വം അറിയിച്ചു.