വനത്തിൽ കുടുങ്ങിയ യുവാക്കളെ   രണ്ടുദിവസത്തിനുശേഷം കണ്ടെത്തി 

ഒല്ലൂർ: വെള്ളച്ചാട്ടം കാണാൻ പോയി വനത്തിൽ കുടുങ്ങിയ യുവാക്കളെ  രണ്ടുദിവസത്തിനുശേഷം കണ്ടെത്തി. ചാവക്കാട് തിരുവത്ര കടപ്പുറം പഞ്ചവടി വീട്ടിൽ മൂർത്തിയുടെ മകൻ ഉണ്ണികൃഷ്​ണൻ (26), വടക്കേക്കാട് ചിരിയങ്കണ്ടത്ത് സിറിൾ (24) എന്നിവരെയാണ് ചീരക്കുണ്ടിൽനിന്ന്​ 12 കിലോമീറ്റർ അകലെ വനത്തിനുള്ളിൽ കണ്ടെത്തിയത്. ഇലഞ്ഞിപ്പാറ വെള്ളച്ചാട്ടത്തിന് മൂന്ന് കിലോമീറ്റർ അകലെയാണിത്​. ഞായറാഴ്ച ഉച്ചകഴിഞ്ഞാണ് ഇവർ ബൈക്കിൽ വെള്ളച്ചാട്ടം കാണാൻ എത്തിയത്. വനത്തിൽ കയറിയ ഇവർ ആദ്യം ഒാലക്കയം വെള്ളച്ചാട്ടം കണ്ടു. പിന്നീട് നാല് കിലോമീറ്റർ കൂടി കയറി ഇലഞ്ഞിപ്പാറ വെള്ളച്ചാട്ടത്തിന്​ അരികിൽ എത്തിയപ്പോഴേക്കും ഇരുട്ട് പരക്കാൻ തുടങ്ങി. അതോടെ തിരിച്ചിറങ്ങി. കുറച്ച് ദൂരം പിന്നിട്ടപ്പോഴാണ് വഴിതെറ്റിയത്. അതിനകം സിറിൾ തളർന്നിരുന്നു. മറ്റു മാർഗങ്ങൾ ഇല്ലാത്തതിനാൽ അവർ രാത്രി പാറയുടെ മുകളിൽ കഴിഞ്ഞു.

തിങ്കളാഴ്ച വീട്ടിലേക്ക് ഫോണിൽ ബന്ധപ്പെടാൻ ശ്രമിച്ചെങ്കിലും സിഗ്​നൽ കിട്ടിയില്ല. ഉച്ചകഴിഞ്ഞാണ് ഫോണിൽ കിട്ടിയത്. ഉടനെ സിറിൾ സഹോദരിയെ വിളിച്ച് വിവരം അറിയിച്ചു. വൈകാതെ ഫോണിലെ ചാർജ് കഴിഞ്ഞു. കൊണ്ടുവന്ന ഭക്ഷണം രാത്രിയോടെ തീർന്നു. തിങ്കളാഴ്ച പകൽ മുഴുവൻ  വെള്ളം കുടിച്ചാണ് കഴിഞ്ഞത്. പകലും രാത്രിയും തിരച്ചിലുകാരുടെ ശബ്​ദം കേ​െട്ടങ്കിലും ദിശ കണ്ടെത്താൻ കഴിഞ്ഞി​െല്ലന്ന്​ അവർ പറഞ്ഞു. ചൊവ്വാഴ്ച  വൈകീട്ട്​ മൂന്നോടെയാണ്​ വരന്തരപ്പിള്ളി സഹകരണ ബാങ്ക് പ്രസിഡൻറ്​ ബാവയുടെ നേതൃത്വത്തിലുള്ള സംഘം ഇവരെ വനത്തിൽ കണ്ടെത്തിയത്. ഇവരുടെ സഹായത്തോടെ​ ചീരക്കുണ്ടിൽ എത്തി. 

അപ്പോഴേക്ക്​ പുത്തൂർ പഞ്ചായത്ത് പ്രസിഡൻറ്​ ഉൾപ്പെടെയുള്ളവർ ഭക്ഷണവുമായി കാത്തിരിക്കുകയായിരുന്നു. തുടർന്ന് ഒല്ലൂർ പൊലീസ്​ ഇവരെ ജില്ല ആശുപത്രിയിൽ എത്തിച്ചു. വൈദ്യപരിശോധനക്ക് ശേഷം ഒല്ലൂർ സ്​റ്റേഷനിൽ എത്തിച്ച് മൊഴിയെടുത്തു. തുടർന്ന് വനം വകുപ്പ് ഉദ്യോഗസ്​ഥർ മൊഴിയെടുത്തു. വനത്തിൽ അതിക്രമിച്ച് കയറിയതിന് ഇവർക്കെതിരെ കേ​െസടുക്കും. ഇവരെ കാണാതാ​യെന്ന പരാതിയുള്ളതിനാൽ കോടതിയിൽ ഹാജരാക്കി ബന്ധുക്കൾക്കൊപ്പം വിട്ടു.