'വീട്ടുകാർ ഞങ്ങളെ സിനിമക്കാരായി കാണാൻ ഇപ്പോഴും തയാറായിട്ടില്ല' -ചിരിമാലക്ക് തിരികൊളുത്തി നൻപൻസ്

ചിരിയുടെ മാലപ്പടക്കങ്ങൾക്ക്​ തിരികൊളുത്തിയാണ്​ ഗോകുലനും സുധി കോപയും ലുഖ്​മാൻ അവറാനും കാമറക്കു മുന്നിലേക്ക്​ എത്തിയത്​. സിനിമ സെറ്റിലെ തമാശകൾ ഒന്നിനൊന്ന്​ പൊട്ടിച്ച്​​ ലുഖ്​മാനും ഗോകുലനും. അതിൽ നിറഞ്ഞ്​ നിർത്താത്ത ചിരിയുടെ ചിറകിലേറി സുധി കോപ. പുതു മലയാള സിനിമയിലെ ഈ താരക്കൂട്ടം ഇന്ന്​ സന്തോഷത്തിലാണ്​. കൈയിൽ ഒരുപിടി നല്ല ചിത്രങ്ങൾ. ചെറുതെങ്കിലും ശ്രദ്ധ നേടിയ വേഷങ്ങളിലൂടെ മലയാള മനസ്സുകളിൽ ചേക്കേറിയ ഇവർ ഊഷ്മള സൗഹൃദം കാത്തുസൂക്ഷിക്കുന്നതിലും മുന്നിൽതന്നെ...

കൊച്ചിക്കാരനായ സുധി കോപയാണ്​ കൂട്ടത്തിൽ സിനിമയിൽ ആദ്യമെത്തിയയാൾ. സാഗർ ഏലിയാസ്​ ജാക്കിയിലെ ഗുണ്ടയായി അരങ്ങേറ്റം കുറിച്ച്​ ആടിലെ 'കഞ്ചാവ്​ സോമനാ'യി മലയാളികൾ അറിഞ്ഞുതുടങ്ങിയ നടൻ. ജോസഫിലും ഇലവീഴാപൂഞ്ചിറയിലും ശ്രദ്ധേയ വേഷങ്ങൾ. തല്ലുമാല, ഉണ്ട, നാരദൻ തുടങ്ങി സൗദി വെള്ളക്കയിലൂടെ നായക പദവിയിലേക്ക്​ നടന്നുകയറി ലുഖ്​മാൻ. ഈ ചങ്ങരംകുളംകാരന്‍റെ വർഷങ്ങളുടെ സിനിമമോഹങ്ങൾക്കാണ് വിജയം കണ്ടുതുടങ്ങുന്നത്​.

ഉണ്ടയിലും തല്ലുമാലയിലും എറണാകുളം കാക്കനാട്​ സ്വദേശിയായ ഗോകുലനും മികച്ച വേഷങ്ങൾ ചെയ്തു. പുണ്യാളൻ അഗർബത്തീസിലെ 'ജിബ്രൂട്ട'നായി മലയാളികളെ കൈയിലെടുത്ത നടൻ.

സിനിമയിലേക്ക്​ വന്ന വഴി

സുധി കോപ: എറണാകുളത്ത്​ ടി.സി.സിയിൽ ജോലിക്കാരനായിരുന്നു എന്‍റെ അച്ഛൻ ശിവശങ്കരപിള്ള.​ സ്വന്തമായി ബാലെ ട്രൂപ് നടത്തിയിരുന്നു. എന്നാൽ, സിനിമയായിരുന്നു എന്‍റെ പാഷൻ. യാദൃച്ഛികമായി അഭിനയിക്കാൻ അവസരം കിട്ടിയതൊന്നുമല്ല. അവസരം ചോദിച്ച്​ ഒട്ടേറെ നടന്നു. അത്​ ഒരു കഷ്ടപ്പാടായി ​ഇതുവരെ തോന്നിയിട്ടില്ല. സംവിധായകനെ കാണാൻ എത്രനേരം വേണമെങ്കിലും കാത്തിരിക്കാൻ തയാറായിരുന്നു​. എവിടെവരെ പോകാനും.

അത്​ ശരിവെക്കുകയാണ്​ ലുഖ്​മാനും ഗോകുലനും. സിനിമയിൽ മുഖംകാണിക്കാൻ നടത്തിയ സാഹസങ്ങളുടെ വിശേഷങ്ങൾ ഒട്ടേറെ പറയാനുണ്ട്​ ഇരുവർക്കും...

ലുഖ്​മാൻ: 2012ൽ ഹർഷദ്​ 'ദായോം പന്ത്രണ്ടും' എന്ന സിനിമ സംവിധാനം ചെയ്യുന്നതറിഞ്ഞ് മലപ്പുറം ചങ്ങരംകുളത്തെ വീട്ടിൽനിന്ന്​​ കോഴിക്കോട്ടേക്ക്​ വണ്ടി കയറിയതാണ് ഞാൻ​. മുഹ്​സിൻ പരാരിയായിരുന്നു അതിൽ​ സംഭാഷണം രചിച്ചത്​. അവരുമായി സംസാരിച്ചപ്പോൾ അവർ ഒരു കണ്ടീഷൻ വെച്ചു: 'സിനിമയിലെ ഒരു കഥാപാത്രത്തിന്​ കാറുണ്ട്​. സ്വന്തമായി കാറുംകൊണ്ട്​ വന്നാൽ ആ കഥാപാത്രം നിനക്ക്​ ചെയ്യാം' എന്ന്​. അന്ന്​ ഒരു പാഷൻ പ്ലസ്​ ബൈക്ക്​ മാത്രമേ സ്വന്തമായുള്ളൂ. കാറോടിക്കുന്നതുപോലും അത്ര വശമില്ല. എന്നാലും നാട്ടിൽ പോയി ഒരു കാർ റെന്‍റിനെടുത്തു. അത്​ രണ്ടാഴ്ചകൊണ്ട്​ ഒരുവിധം ഓടിച്ചു പഠിച്ച്​ ലൊക്കേഷനിലേക്ക്​ വിട്ടു. അങ്ങനെയാണ്​ മുഹ്​സിനും അർഷാദിക്കയുമായൊക്കെ പരിചയത്തിലാകുന്നത്​.

ഗോകുലൻ: നാടകത്തിൽ അഭിനയിക്കാൻ വേണ്ടി മാത്രം എം.ഫിലിന്​ ചേർന്ന കഥയാണ്​ എന്റേത്​. ലോഹിതദാസിന്‍റെ അസോസിയറ്റ്​സായിരുന്ന മനോജ്​ കുമാർ, വിനോദ്​ കുമാർ എന്നിവരുടെ കീഴിലാണ്​ നാടകാഭിനയം പഠിക്കുന്നത്​. കളമശ്ശേരി കേന്ദ്രീകരിച്ച്​ സെലിബ്രേഷൻസ്​ എന്ന പേരിൽ ഒരു തിയറ്റർ ​ഗ്രൂപ്​ അവർക്കുണ്ട്​. കാക്കനാട്​ ഭാരതമാത കോളജിൽനിന്ന്​ ഡിഗ്രിക്കുശേഷം ​പ്രസ്​ അക്കാദമിയിൽനിന്ന്​ ജേണലിസം എടുത്തു. പിന്നെ കുസാറ്റിൽ ബിസിനസ്​ ഇക്കണോമിക്സ്​ പി.ജി. അവിടെത്തന്നെ ഇക്കണോമിക്സിൽ എം.ഫിലിന് ചേർന്നത്​ നാടകത്തിൽ അഭിനയിക്കാനാണ്​. സിനിമ എന്നത്​ അന്ന്​ മനസ്സിൽപോലുമില്ല. കാരണം എത്തിപ്പെടാവുന്നതിലും അപ്പുറമായിരുന്നു അന്ന്​ സിനിമ.

സൗഹൃദങ്ങൾ സിനിമയിലേക്ക്​ അവസരത്തിന്​ വഴിതുറന്നിട്ടുണ്ടെന്ന പക്ഷക്കാരാണ്​ മൂവരും. എങ്കിലും സൗഹൃദം കൊണ്ടുമാത്രം അഭിനയരംഗത്ത്​ പിടിച്ചുനിൽക്കാനുമാകില്ല.

ലുഖ്​മാൻ: സൗഹൃദംകൊണ്ട്​ മാത്രം സിനിമയിൽ അവസരം ലഭിക്കണമെന്നില്ല. എന്നാൽ, സിനിമ ഉണ്ടാകുന്നതിൽ സൗഹൃദം ഒരു കാരണമാണ്. സാധാരണ നമ്മുടെ ജീവിതത്തിലെ സൗഹൃദം തന്നെയാണ്​ സിനിമയിലും സംഭവിക്കുന്നത്​. കോളജിലും ജോലിസ്ഥലത്തും ഒരുമിച്ച്​ കാണുന്നതുപോലുള്ള സൗഹൃദംതന്നെ ഇവിടെയും. നമ്മളുമായി സംസാരിച്ചിരിക്കാൻ കഴിയുന്നവരുമായാണ്​ കൂടുതൽ സ്​നേഹം ഉടലെടുക്കുക.

ഗോകുലൻ: നാടകാഭിനയം കണ്ടാണ്​ സംവിധായകൻ കിരൺ വിളിച്ച്​ കുടുംബശ്രീ ട്രാവൽസിൽ അവസരം നൽകുന്നത്​. പിന്നീട്​ സിനിമയിൽ അവസരം അന്വേഷിച്ച്​ തുടങ്ങിയപ്പോൾ​ സുധി കോപയെയും ലുഖ്​മാനെയും പരിചയപ്പെട്ടു​. അത്​ വളരെ ഗുണംചെയ്തു. ആമേനിൽ അഭിനയിക്കു​മ്പോഴാണ്​ സുധിച്ചേട്ടനെ കാണുന്നത്. അദ്ദേഹം തരുന്ന കരുതലും പ്രചോദനവും ഗൈഡൻസുമൊക്കെ ഒരിക്കലും മറക്കാനാകില്ല.

സൗഹൃദങ്ങളിലൂടെ ലഭിക്കുന്ന അവസരങ്ങൾ എങ്ങനെ ഉപയോഗപ്പെടുത്തുന്നുവെന്നത്​ നമ്മുടെ മിടുക്കാണ്​. സൗഹൃദംകൊണ്ട്​ മാത്രം സിനിമയിൽ അഭിനയിക്കാൻ പറ്റണമെന്നില്ല. ലുഖ്​മാൻ, ഖാലിദ്​ റഹ്​മാൻ എന്നിവരുടെ സുഹൃദ്​ബന്ധവും ഗുണംചെയ്യുന്നുണ്ട്​. എങ്കിലും നമ്മൾ എങ്ങനെ മികച്ച രീതിയിൽ സിനിമയിൽ അഭിനയിക്കുന്നുവെന്നതാണ്​ കാര്യം. അങ്ങനെവന്നാൽ മാത്രമേ വിജയമുണ്ടാകൂ. എനിക്ക്​ മികവില്ലെങ്കിൽ ആരെന്നെ സഹായിച്ചിട്ടും കാര്യമില്ല.

ഇതുകേട്ടിരുന്ന സുധി കോപയും തലകുലുക്കി...

സുധി കോപ: സൗഹൃദം സിനിമയിൽ ഗുണംചെയ്തിട്ടുണ്ടെങ്കിലും നമ്മൾ ചെയ്യേണ്ട കാര്യങ്ങൾ വൃത്തിയായി ചെയ്​തില്ലെങ്കിൽ കാര്യമില്ല. ഞാൻ നന്നായി അഭിനയിക്കുമെങ്കിൽ മാത്രമേ ഗോകുലനോ ലുഖ്​മാനോ ഒരവസരം വന്നാൽ എന്നെ ആ സിനിമയിലേക്ക്​ നിർദേശിക്കൂ. അഭിനയമായാലും സംവിധാനമായാലും മറ്റ്​ ഏത്​ സാ​ങ്കേതിക ജോലിയായാലും അങ്ങനെതന്നെ. 2006-07 കാലത്താണ്​ പുതിയ മാറ്റങ്ങൾ മലയാള സിനിമയിൽ വന്നുതുടങ്ങിയത്​. ഓരോ പടത്തിനായും ഓഡിഷൻ തുടങ്ങുന്നത്​ അക്കാലത്താണ്. ചെറിയ കാരക്ടറുകൾ വരെ ഓഡിഷനിലൂടെ തിരഞ്ഞെടുക്കാൻ തുടങ്ങിയതോടെയാണ്​ ഞങ്ങൾക്കൊക്കെ അവസരം ലഭിച്ചുതുടങ്ങിയത്​.

ഓണാഘോഷം എങ്ങനെ?

​ലുഖ്​മാൻ: ഇക്കുറി ഓണത്തിന്​ സക്കരിയ നിർമിക്കുന്ന സിനിമയുടെ ഷൂട്ടിലാണ്​. കോഴിക്കോടും തൃശൂരുമൊക്കെയായാണ്​ ലൊക്കേഷൻ. തല്ലുമാല, സൗദി വെള്ളക്ക എന്നിവയിലാണ്​ അവസാനമായി അഭിനയിച്ചത്​. വാപ്പ അവറാനും ഉമ്മ ഹലീമയും ഞങ്ങൾ അഞ്ചു മക്കളും അടങ്ങുന്നതാണ്​ കുടുംബം. ഞാൻ രണ്ടാമത്തെയാളാണ്​. ഭാര്യ ജുമൈമ ഇപ്പോൾ എം.കോം ചെയ്യുന്നു.

സുധി കോപ: ഞങ്ങൾ പശ്ചിമ കൊച്ചിക്കാർക്ക്​ എന്നും എന്തും ആഘോഷമാണ്​. പെരുന്നാളും ഉത്സവങ്ങളും ഹോളിയും പുതുവർഷവുമൊക്കെ ഒന്നുപോലും വിടാതെ ആഘോഷിക്കും. അതുപോലെതന്നെ ഓണവും. ഞങ്ങൾക്ക്​ എല്ലാ ഞായറാഴ്ചയും ഒരു ജന്മദിന പാർട്ടിയെങ്കിലും ഉണ്ടാകും. അല്ലെങ്കിൽ വിവാഹ വാർഷികം. ബുദ്ധപൗർണമി പോലും ഇവിടെ ആഘോഷിക്കുന്നുണ്ട്​. കൊച്ചിയുടെ 'കോ', പള്ളുരുത്തിയുടെ 'പ' എന്നിവ ചേർത്താണ്​ എന്‍റെ പേരിലെ 'കോപ' തന്നെ ഉണ്ടായത്​. പലരും വിളിച്ചുവിളിച്ച്​ അത്​ പേരിനൊപ്പം ചേർന്നു.

ഗോകുലൻ: ബാല്യകാലത്താണ്​ ഓണം ഏറെ രസകരം. അന്ന്​ എല്ലാവരും ഒത്തുകൂടിയിരുന്നത്​ ഓണക്കാലത്താണല്ലോ. അമ്മായിയും വല്യച്ഛനും കസിൻസുമൊക്കെ വീട്ടിൽവരും​. അല്ലെങ്കിൽ നമ്മൾ അങ്ങോട്ട്​ പോകും. ഇന്ന്​ അതിനൊക്കെ മാറ്റം വന്നില്ലേ. ആരും അകലെയാണെന്ന്​ ഇന്ന്​ തോന്നുന്നില്ല. എന്നാൽ, ഒത്തുകൂടലിന്‍റെ സന്തോഷം ഇന്ന്​ നമുക്ക്​ കിട്ടുന്നുമില്ല. നാട്​ മൊത്തം ആഘോഷിക്കുന്ന സന്തോഷംതന്നെയാണ്​ ഓണം. കോടതി ജോലിക്കാരനായിരുന്നു അച്ഛൻ സത്യൻ. നാലാണും ഒരുപെണ്ണുമായി അഞ്ചു മക്കളാണ് ഞങ്ങൾ​. ഭാര്യ ധന്യയും അഞ്ചുമാസക്കാരി റിഥവും വീട്ടിലുണ്ട്​.

വീട്ടിൽ സിനിമക്കാരാണോ...?

പൊട്ടിച്ചിരിയോടെയാണ്​ മൂവരുടെയും മറുപടി. വീട്ടുകാർ നമ്മളെ സിനിമക്കാരായി കാണാൻ ഇപ്പോഴും തയാറായിട്ടില്ല. അതിന്‍റെ ഒരു ബഹുമാനവും കിട്ടുന്നില്ലെന്നത് സ്വകാര്യ ദുഃഖം.

ലുഖ്​മാൻ: റിലീസിന്​ ഒരുങ്ങുന്ന സൗദി വെള്ളക്ക, ആളങ്കം പടങ്ങളിൽ നായകവേഷമുണ്ടെന്നൊക്കെ പറയാം. പക്ഷേ, വീട്ടിൽ ചെന്നാൽ നായകപരിഗണനയൊന്നും കിട്ടില്ല. ചെന്ന്​ കയറുമ്പോഴായിരിക്കും ഉമ്മ റേഷൻപീടികയിലേക്ക്​ പറഞ്ഞയക്കുക. നേരംവൈകി വീട്ടിൽ വന്നാൽ ചോറിൽ വെള്ളമൊഴിച്ചുവെക്കുമെന്നും ഉമ്മ ഭീഷണി മുഴക്കും.

നില​ക്കാത്ത ചിരിയോടെതന്നെ മൂവരും പിരിഞ്ഞു. സിനിമകളുടെ തിരക്കുകളിലേക്കുതന്നെ...

●