മുംബൈയിലെ ചേരിയിൽ നിന്ന്​ മേക്കപ്പിന്‍റെ അദ്​ഭുത ലോകത്തേക്ക്​; ഇത്​ പൂജ ഗുപ്തയുടെ വേറിട്ട കഥ

ഇന്ത്യയുടെ വ്യവസായ നഗരമായ മുംബൈ അവിടത്തെ ചേരികൾക്കും ഏറെ പ്രശസ്തമാണ്​. ധാരാവി പോലുള്ള ഏഷ്യയിലെതന്നെ ഏറ്റവുംവലിയ ചേരി മുംബൈ നഗരത്തിലാണുള്ളത്​. ഇത്തരമൊരു ചേരിയിൽ നിന്ന്​ ജീവിതം വെട്ടിപ്പിടിച്ച പെൺകുട്ടിയുടെ കഥ ഇപ്പോൾ വൈറലായിരിക്കുകയാണ്​. പൂജ ഗുപ്ത എന്ന പെൺകുട്ടിയാണ്​ ഈ കഥയിലെ നായിക.

ചെറുപ്പത്തിൽതന്നെ മേക്കപ്പിന്‍റെ ലോകത്തേക്ക്​ എത്തിയ പൂജ 14ാം വയസിൽതന്നെ പ്രൊഫഷനൽ ​മേക്കപ്പിന്‍റെ വഴികളിൽ പ്രവേശിച്ചിരുന്നു. ‘ഡോൾഫിൻ ടാങ്കി’ എന്ന സംരംഭകത്വ മത്സരത്തിൽ പ​ങ്കെ​ടുത്തതാണ്​ പൂജയുടെ ജീവിതത്തിൽ വഴിത്തിരിവായത്​. പുതിയ സംരംഭകരെ കണ്ടെത്താനുള്ള റിയാലിറ്റി ഷോയാണ്​ ‘ഡോൾഫിൻ ടാങ്കി’. ഇതിൽ​ വിജയിച്ചതോടെയാണ്​ പൂജ മേക്കപ്പ്​ ലോകത്ത്​ ചുവടുറപ്പിച്ചത്​. 40,000 രൂപ സമ്മാനത്തുകയും പൂജക്ക്​ ഈ ഷോ വിജയിച്ചതിലൂടെ ലഭിച്ചു.

10,000 രൂപ വരുമാനത്തിൽ നിന്നാണ് താൻ കരിയർ ആരംഭിച്ചതെന്ന് പൂജ പറയുന്നു. അത് ഇപ്പോൾ 1,00,000 രൂപയായി മാറിയിരിക്കുന്നു. ഈ വരുമാനം അവളുടെ കുടുംബത്തിന്റെ ആവശ്യങ്ങൾ സുഗമമാക്കുന്നതിനും കോളജ് ഫീസ് അടയ്ക്കുന്നതിനും ഉപയോഗിക്കുന്നതായി പൂജ പറഞ്ഞു..

തന്റെ മിടുക്ക് കൂടുതൽ മെച്ച​പ്പെട്ട തലത്തിലേക്ക് ഉയർത്താനായി പൂജയുടെ പിന്നീടുള്ള ശ്രമം. 9-ാം ഗ്രേഡിൽ പഠിക്കുന്ന സമയത്ത് സ്‌കിൽസ് @സ്‌കൂൾ പ്രോഗ്രാമുമായി സലാം ബോംബെ ഫൗണ്ടേഷൻ അവളുടെ സഹായത്തിനെത്തി. അതുവഴി അവൾ കളർ തിയറിയിലും ഫേഷ്യൽ അനാട്ടമിയിലും തന്റെ കഴിവുകൾ പരിപോഷിപ്പിച്ചു.

ഭാവിയെപ്പറ്റിയും പൂജക്ക്​ കൃത്യമായ കാഴ്​ച്ചപ്പാടുകളുണ്ട്​. സ്വന്തമായി ഒരു മേക്കപ്പ്​ പാർലർ തുടങ്ങണമെന്നാണ്​ അവളുടെ ആഗ്രഹം. ‘ബാന്ദ്രയിൽ എന്റെ പേരിൽ ഒരു മേക്കപ്പ് സ്റ്റുഡിയോ ആരംഭിക്കുക എന്നത് സ്വപ്നമാണ്. അവിടെ, മേക്കപ്പ് സേവനങ്ങൾക്കൊപ്പം വളർന്നുവരുന്ന കലാകാരന്മാരെ മേക്കപ്പ് പഠിപ്പിക്കാനുള്ള സംവിധാനങ്ങൾ ഒരുക്കുകയും ചെയ്യും’-പൂജ പറയുന്നു.​