ഹാജിക്കാക്ക്​ ഇപ്പോഴും 53​ന്‍റെ യുവത്വം

ഈ യുവജനദിനത്തിൽ ഞങ്ങൾ പരിചയപ്പെടുത്തുന്നത്​ 53 വയസുള്ള ഒരു 'യുവാവി'നെയാണ്​. പേര്​ അബ്​ദുൽ നാസർ ഹാജി. ഹാജിക്ക എന്ന്​ വിളിക്കും. വയസി​ന്‍റെ കണക്ക്​ നോക്കിയാൽ മധ്യവയസ്​കൻ എന്ന്​ വിളിക്കേണ്ടി വരും. മനസിന്‍റെ കണക്കിൽ നാസർ ഹാജി ഒന്നൊന്നര യുവാവാണ്​. യുവാക്കളുടെ പ്രചോദനമാണ്​. യുവജനതയുടെ കൂട്ടുകാരനാണ്​. പെരുന്നാൾ ദിവസം റാസൽ ഖൈമയിൽ നിന്ന്​ ദിബ്ബയിലേക്ക്​ 100 കിലോമീറ്റർ സൈക്കിൾ ചവിട്ടിയ നാസറിനെ യുവാവ്​ എന്ന്​ തന്നെയല്ലേ വിളിക്കേണ്ടത്​.

ജബൽ ജൈസ്​ മലനിരകളിലേക്ക്​ നഗ്​നപാദനായി ഓടിക്കയറിയ മുഹമ്മദ്​ ഷാഫി വാർത്തയായപ്പോൾ അവർക്കൊപ്പം സൈക്കിളിൽ ഹാജിക്കയും ഉണ്ടായിരുന്നു. അന്നാണ്​ അദ്ദേഹം ആദ്യമായി ജബൽ ജൈസിലെ കുത്തനെയുള്ള കയറ്റം സൈക്കിളിൽ കീഴടക്കിയത്​. യു.എ.ഇയിലെ മലയാളികളുടെ കായിക കൂട്ടായ്​മയായ കേരള റൈഡേഴ്​സ്​ ക്ലബ്ബിലെ ഏറ്റവും പ്രായം കൂടിയ സൈക്ലിസ്​റ്റാണ്​ മലപ്പുറം കൊളത്തൂർ കരുപാറക്കൽ നാസർ. ആ ക്ലബ്ബിലെ യുവാക്കളുടെയെല്ലാം ഉറ്റ ചങ്ങാതി.

ഇന്നോ ഇന്ന​ലെയോ തുടങ്ങിയതല്ല നാസറിന്‍റെ സൈക്കിൾ ഭ്രമം. 1987ൽ അമ്മാവൻ ഗൾഫിലുള്ള അമ്മാവൻ കൊടുത്ത 300 രൂപയുടെ വാച്ച്​ വിറ്റാണ്​ ആദ്യമായി സൈക്കിൾ വാങ്ങിയത്​. ഗൾഫിലെത്തിയപ്പോഴും ആ സ്വഭാവം മറന്നില്ല. മൂന്ന്​ വർഷം മുൻപാണ്​ സൈക്ലിങി​െൻറ കൂടുതൽ സാധ്യതകളിലേക്ക്​ നാസർ പെഡൽ കറക്കി തുടങ്ങിയത്​. 'അഞ്ച്​ ലിറ്റർ വെള്ളമുണ്ടെങ്കിൽ നൂറ്​ കിലോമീറ്റർ സൈക്കിൾ ചവിട്ടാം. കാറിൽ പോകണമെങ്കിൽ അഞ്ച്​ ലിറ്ററിൽ കൂടുതൽ പെട്രോൾ വേണമെന്നോർക്കണം. മണിക്കൂറിൽ 50 കിലോമീറ്റർ വരെ താണ്ടാൻ കഴിയും' -നാസർ പറയുന്നു.

യാത്രകൾ അധികവും രാത്രിയിലാണ്​. ഇടക്കിടെ യുവ സുഹൃത്തുക്കളോടൊപ്പം രാത്രി കറക്കത്തിനിറങ്ങും. രാത്രി എട്ട്​ മണിക്ക്​ പുറപ്പെട്ടാൽ പുലർച്ചയായിരിക്കും തിരിച്ചെത്തുക. കഴിഞ്ഞ വർഷം നാട്ടിലെത്തിയപ്പോൾ കൊളത്തൂരിൽ നിന്ന്​ പട്ടാമ്പി വഴി കറങ്ങി 76 കിലോമീറ്റർ സഞ്ചരിച്ചിരുന്നു. രാവിലെ ചായയും പുട്ടും കഴിച്ചിട്ട്​ ഒരു പോക്കായിരുന്നു. നാട്ടിടവഴിയിലൂടെ സൈക്കിൾ ചവിട്ടി നോക്കൂ എന്നാണ്​ യുവതലമുറക്ക്​ നാസറിന്​ നൽകാനുള്ള ഉപദേശം. എന്തെന്നില്ലാത്ത അനുഭൂതിയും അനുഭവവുമായിരിക്കും ലഭിക്കുകയെന്നും അദ്ദേഹം പറയുന്നു.

യുവത്വത്തി​െൻറ പ്രസരിപ്പുമായി ഓടി നടക്കുന്ന നാസറിന്​ ഓഫ്​ റോഡിലൂടെയുള്ള മൗണ്ടൻ ബൈക്ക്​ യാത്രയും പ്രിയപ്പെട്ടതാണ്​. മലകളും പാറക്കെട്ടുകളുമടങ്ങിയ വാദി തൈബാൻ ചവിട്ടി കയറിയ ചരിത്രവുമുണ്ട്​ അദ്ദേഹത്തിന്​. യു.എ.ഇയിൽ വാട്ടർ പ്രൂഫിങ്​ കമ്പനി നടത്തുന്ന ഹാജിക്ക മൂന്ന്​ പതിറ്റാണ്ടായി ഗൾഫിലുണ്ട്​. യു.എ.ഇയിലെ മാരത്തണുകളിലും സൈക്ലിങ്​ ഇവന്‍റുകളിലും സജീവ സാന്നിധ്യമാണ്​ ഈ 'യുവാവ്​'.