ഈ ശിൽപങ്ങൾ ഇനി ജോൺസ​െൻറ സ്​മാരകങ്ങൾ...

വേലൂർ: അടിയന്തരാവസ്ഥക്കാലത്ത് പൊലീസ് മർദനത്തിൽ കൊല്ലപ്പെട്ട രാജ​​െൻറ കോഴിക്കോട്​ കക്കയത്തെ പ്രതിമ കണ്ട്​ നാട്ടുകാർ അതിശയിച്ചുപോയി. അത്രമേൽ സാമ്യവും പുതുമയുമുള്ളതായിരുന്നു ആ പ്രതിമ.

എൺപതുകൾ പാതി പിന്നിട്ട കാലമായിരുന്നു അത്​. ശനിയാഴ്​ച നിര്യാതനായ ജോൺസൺ വേലൂർ എന്ന കലാകാര​െൻറ ഉയർച്ചയുടെ ആരംഭമായിരുന്നു അക്കാലം. പതിയെ പ്രശസ്​തിയിലെത്തിയ ജോൺസ​​േൻറതായി പിന്നീട്​ അനേകം ശ്രദ്ധേയ പ്രതിമകൾ പിറന്നു.

തൃശൂർ ജില്ല പഞ്ചായത്തിനുവേണ്ടി നിർമിച്ച മുൻ രാഷ്​ട്രപതി എ.പി.ജെ. അബ്​ദുൽ കലാമി​െൻറ അർധകായ പ്രതിമ, കോഴിക്കോട് ഗുരുവായൂരപ്പൻ കോളജ് കാമ്പസിലെ ബുദ്ധ പ്രതിമ, വേലൂർ ഗവ. ആർ.എസ്.ആർ.വി ഹയർ സെക്കൻഡറി സ്കൂൾ മുറ്റത്തെ ഗാന്ധി പ്രതിമ, തൃശൂർ ജൂബിലി മിഷൻ ആശുപത്രി ജങ്ഷനിലെ ട്രാഫിക്​ ഐലൻഡിലെ മതസൗഹാർദ ശിൽപം, വേലൂർ പള്ളി പരിസരത്തെ അർണോസ് പാതിരിയുടെ പ്രതിമ തുടങ്ങിയവ അക്കൂട്ടത്തിൽപെട്ടതാണ്​. ചിത്ര-ശിൽപ കലാരംഗത്ത് നൂതന പരീക്ഷണങ്ങൾക്ക് നേതൃത്വം കൊടുത്ത കലാകാരനായിരുന്നു ജോൺസൺ.

പേപ്പർ പൾപ്പിൽ തീർത്തവയായിരുന്നു ആദ്യ സൃഷ്​ടികൾ. പിന്നീട്​ ഫൈബറിൽ ശിൽപങ്ങൾ നിർമിച്ചുതുടങ്ങി. അക്കാലത്തെ ആദ്യ പരീക്ഷണമായിരുന്നു അത്​.

കഥകളി കിരീടം ഫൈബറിൽ നിർമിച്ചായിരുന്നു തുടക്കം. വീടിനു സമീപത്തെ ചരിത്രപ്രസിദ്ധമായ വെങ്ങിലശ്ശേരി മണിമലർക്കാവ് ഭഗവതി ക്ഷേത്രത്തിലെ കുതിരവേലക്ക് ആദ്യമായി ലക്ഷണമൊത്ത കുതിരകളെ ഫൈബറിൽ വാർത്തെടുത്തു. കൂടാതെ പള്ളികൾ, ക്ഷേത്രങ്ങൾ, സ്കൂളുകൾ, പൊതുസ്ഥലങ്ങൾ തുടങ്ങി നിരവധി സ്ഥലങ്ങളിൽ മരം, വെട്ടുകല്ല്, സിമിൻറ്​, കളിമണ്ണ്, ഫൈബർ എന്നിവയിലെല്ലാം ശിൽപങ്ങൾ നിർമിച്ചിട്ടുണ്ട്.

കേരള ലളിതകല അക്കാദമിയുടെതടക്കം നിരവധി ചിത്ര-ശിൽപ പ്രദർശനങ്ങളിലും പങ്കാളിയായി. കാലടി സംസ്കൃത സർവകലാശാലയിൽ ശിൽപകല അധ്യാപകനായിരുന്ന ജോൺസൺ വേലൂരിലെ സാംസ്കാരിക രംഗത്തെ സ്ഥിരസാന്നിധ്യമായിരുന്നു.