ദേശ്​​രാജിന്​ ഇനി ഓ​ട്ടോയിൽ കിട​ക്കേണ്ട; പേരക്കുട്ടിയുടെ വിദ്യാഭ്യാസത്തിനായി വീടുവിറ്റ 74കാരന്​ 24 ലക്ഷം പിരിച്ചുനൽകി സോഷ്യൽ മീഡിയ

മുംബൈ: കോരിച്ചൊരിയുന്ന മഴയത്തും ദേഹമുരുക്കുന്ന ചൂടിലുമെല്ലാം ഓ​ട്ടോയിൽ കിടന്ന്​ ഉറങ്ങേണ്ടി വന്നിരുന്ന ദേശ്​രാജ്​ എന്ന 74കാരന്​ ഇനി വീടിന്‍റെ മേൽക്കൂരയുടെ സുരക്ഷയിൽ അന്തിയുറങ്ങാം. കൊച്ചുമകളുടെ വിദ്യാഭ്യാസത്തിനായി വീട്​ വിറ്റ ശേഷം ഓ​ട്ടോ വീടാക്കി മാറ്റിയ ദേശ്​രാജ്​ ജ്യോത്​ സിങിന്‍റെ കഥ സമൂഹമാധ്യമങ്ങളിൽ വൈറലായിരുന്നു. മുംബൈയിലെ ഈ ഓ​ട്ടോ ഡ്രൈവറുടെ കദനകഥ അറിഞ്ഞ സോഷ്യൽ മീഡിയ ഉപയോക്​താക്കൾ 24 ലക്ഷം രൂപയാണ്​ പിരിച്ചെടുത്തത്​. ദേശ്​രാജിന്‍റെ കഥ പുറംലോകത്തെത്തിച്ച 'ഹ്യൂമൻസ്​ ഓഫ്​ മുംബൈ' എന്ന ഫേസ്​ബുക്ക്​ കൂട്ടായ്​മ ഈ തുകയുടെ ചെക്ക്​ അദ്ദേഹത്തിന്​ കൈമാറി.

'ഈ തുക കൊണ്ട്​ തലചായ്​ക്കാനൊരിടം​ വാങ്ങാനാകും. പേരക്കുട്ടികളുടെ വിദ്യാഭ്യാസവും നടത്താൻ കഴിയും'- ചെക്ക്​ ഏറ്റുവാങ്ങി കണ്ണീരോടെ ദേശ്​രാജ് പറഞ്ഞു. 20 ലക്ഷമായിരുന്നു 'ഹ്യൂമൻസ്​ ഓഫ്​ മുബൈ' ലക്ഷ്യമിട്ടിരുന്നത്​. എന്നാൽ, സുമനസ്സുകളുടെ സഹായം പ്രവഹിച്ചതോടെ നാല്​ ലക്ഷം രൂപ കൂടി അധികം ലഭിച്ചു. 1986 മുതൽ ഓ​ട്ടോ ഓടിച്ചാണ്​ ദേശ്​രാജ്​ ജീവിക്കുന്നത്​. ​ആ കണ്ണുകളിലെ ദൈന്യതയും നിറഞ്ഞ ചിരിയിലെ നിസ്സഹായതയും ജീവിതഭാരമേറിയപ്പോഴും തളരാത്ത ആത്മധൈര്യവും സോഷ്യൽ മീഡിയ തിരിച്ചറിഞ്ഞതോടെയാണ്​ ഇത്രയും തുക സമാഹരിക്കാനായത്​.

സോന, സചിൻ, സഞ്​ജയ്​, സുനിൽ എന്നിങ്ങനെ നാല്​ മക്കളാണ്​ ദേശ്​രാജിന്​. ഇതിൽ സചിൻ അഞ്ച്​ വർഷം മുമ്പ്​ മരിച്ചു. ഇതിന്‍റെ ആഘാതം മാറി വരുന്നതിനിടെ മൂന്ന്​ വർഷം മുമ്പ്​ രണ്ടാമത്തെ മകൻ സഞ്​ജയ്​ ഖാർ റെയിൽവേ സ്​റ്റേഷനിൽ ജീവനൊടുക്കി. എന്നാൽ, അകാലത്തിൽ മരിച്ചു പോയ ആണ്‍മക്കളെക്കുറിച്ചോര്‍ത്ത് കരഞ്ഞ്​ സമയം കളയാതെ, മരുമക്കള്‍ക്കും പേരക്കുട്ടികള്‍ക്കുമായി രാപ്പകലില്ലാതെ ഓട്ടോറിക്ഷ ഓടിച്ച്​ വരികയാണ്​ ദേശ്​രാജ്​. പേരക്കുട്ടിയുടെ പഠനാവശ്യത്തിനായി ഒരു കൊല്ലം മുമ്പാണ്​ വീട് വിറ്റത്​. കുടുംബാംഗങ്ങളെ ഗ്രാമത്തിലേക്ക്​ പറഞ്ഞുവിട്ട ശേഷം ഭക്ഷണവും താമസവുമെല്ലാം ഓട്ടോയ്ക്കുള്ളിലാക്കി. ഭാര്യക്കും മരുമക്കൾക്കും അവരുടെ നാല് മക്കൾക്കുമുള്ള പണം കണ്ടെത്താനായി രാവിലെ ആറ്​ മുതൽ രാ​ത്രി പത്ത്​ വരെ ഓ​ട്ടോ ഓടിക്കുന്നുണ്ട്​ ദേശ്​രാജ്. ലോക്​ഡൗൺ സമയത്തും അതിന്​ മാറ്റമൊന്നുമുണ്ടായില്ല. ഡോക്​ടർമാരെയും നഴ്​സുമാരെയും ഡ്യൂട്ടിക്കെത്തിക്കാൻ പ്രത്യേക അനുമതിയോടെ ദേശ്​രാജിന്‍റെ ഓ​ട്ടോ തലങ്ങും വിലങ്ങും ഒാടി.

അങ്ങിനെ ഓ​ട്ടോയോടിച്ച്​ കിട്ടുന്ന പണത്തിൽ ഭൂരിഭാഗവും നാട്ടിലേക്ക്​ അയച്ചുകൊടുക്കുകയാണ്​ ചെയ്യുന്നത്​. വരുമാനത്തിൽ ഒരു വിഹിതം തെരുവോരത്ത്​ ആരോരുമില്ലാതെ കഴിയുന്നവർക്ക്​ ഭക്ഷണം മേടിച്ച്​ കൊടുക്കാനും വിനി​േയാഗിക്കുന്നുണ്ട്​. ദേശ്​രാജിന്‍റെ കഷ്​ടപ്പാട്​ കണ്ട്​ ഒമ്പതാം ക്ലാസിലെത്തിയപ്പോള്‍ പഠനം നിര്‍ത്തട്ടെയെന്ന് പേരക്കുട്ടി ചോദിച്ചിരുന്നു. എന്നാല്‍ ഇഷ്ടമുള്ളത്ര പഠിച്ചോളൂ എന്നായിരുന്നു അദ്ദേഹത്തിന്‍റെ മറുപടി. പന്ത്രണ്ടാം ക്ലാസ് പരീക്ഷയില്‍ പേരക്കുട്ടി 80 ശതമാനം മാര്‍ക്ക് നേടിയ ദിവസം ഓ​ട്ടോയിൽ കയറിയവർക്കെല്ലാം സൗജന്യയാത്ര നല്‍കിയാണ് ഈ മുത്തച്ഛന്‍ ആഹ്​ളാദം പങ്കിട്ടത്. അധ്യാപന കോഴ്​സ് പഠിക്കാൻ ഡൽഹിയിലേക്ക്​ പോകണമെന്നായിരുന്നു പേരക്കുട്ടിയുടെ ആഗ്രഹം. ഈ ആഗ്രഹം നടത്തിക്കൊടുക്കാനാണ്​ ഒരു വർഷം മുമ്പ്​ തന്‍റെ ചെറിയ വീട് ദേശ്​രാജ്​ വിറ്റത്​. ബാക്കിയുള്ളവരെ നാട്ടി​േലക്ക്​ അയച്ച ശേഷം ഓട്ടോറിക്ഷ വീടാക്കി മാറ്റിയത്​ അങ്ങിനെയാണ്​.

'എന്‍റെ ജീവിതത്തിൽ നേരിട്ട പ്രതിസന്ധികളെല്ലാം ഒരു ദുഃസ്വപ്​നം പോലെ മറക്കാനാണ്​ ഇഷ്​ടം. കുട്ടികളുടെ കാര്യങ്ങൾ ഓർക്കു​േമ്പാൾ വിശ്രമിക്കാൻ തോന്നാറില്ല. എന്‍റെ ശരീരത്തിന്​ ശക്​തിയുള്ളിടത്തോളം കാലം ഞാൻ ഓ​ട്ടോ ഓടിക്കുക തന്നെ ചെയ്യും. മറ്റ്​ ജോലികളൊന്നും ചെയ്യാനറിയില്ല. അതിനുള്ള ആരോഗ്യവുമില്ല. പേരക്കുട്ടി പഠനം പൂര്‍ത്തിയാക്കി അധ്യാപികയായെത്തുന്ന ദിവസം കാത്തിരിക്കുകയാണ്​ ഞാൻ. അവളെ ചേര്‍ത്തു പിടിച്ച് എനിക്ക് അഭിമാനിക്കാൻ അവസരം നല്‍കിയതിലുള്ള സന്തോഷം പങ്കിടണം'- ദേശ്​രാജ്​ പറയുന്നു. 'ഒരു കാര്യം കൂടിയുണ്ട്​. ആ സമയത്ത്​ ഒരാഴ്ച എന്‍റെ ഓ​ട്ടോയിൽ കയറുന്ന എല്ലാവർക്കും യാത്ര സൗജന്യമായിരിക്കും'- ആ പാവം മനുഷ്യന്‍ കൂട്ടിച്ചേര്‍ത്തു.

View this post on Instagram

A post shared by Humans of Bombay (@officialhumansofbombay)