ഭക്ഷണം പാഴാകാതിരിക്കാന്‍ പല വഴികള്‍

പ്ലാന്‍ ചെയ്യാം, ലാഭിക്കാം: ഓരോ ആഴ്ചത്തെയും മെനു മുന്‍കൂട്ടി ആസൂത്രണം ചെയ്യാം. വേണ്ട പച്ചക്കറികളുടെ പട്ടികയുണ്ടാക്കാം. വീട്ടില്‍ ബാക്കിയുള്ളത് ഒഴിവാക്കി വേണം പട്ടികയുണ്ടാക്കാന്‍. ആവശ്യമുള്ളത് മാത്രം വാങ്ങുക. ചെലവ് ബജറ്റിനുള്ളില്‍ ഒതുക്കുക. 
സ്മാര്‍ട്ട് ഷോപ്പിങ്: പാഴാക്കല്‍ കുറക്കാനുള്ള ഏറ്റവും എളുപ്പവഴി ആവശ്യമുള്ളത് മാത്രം വാങ്ങുകയെന്നതാണ്. ഷോപ്പിങ് നടത്തുമ്പോള്‍ ആവശ്യമുള്ളവയുടെ പട്ടിക കരുതുക. ഡിസ്കൗണ്ട്, സൗജന്യ ഓഫറുകളില്‍ മയങ്ങി വേണ്ടാത്തത് വാങ്ങാതിരിക്കുക. ഫ്രിഡ്ജില്‍ സൂക്ഷിക്കേണ്ടതും എളുപ്പത്തില്‍ കേടുവരുന്നതും ഷോപ്പിങ്ങിന്‍െറ അവസാനം മാത്രം വാങ്ങുക.  
ഗുണനിലവാരത്തില്‍ ശ്രദ്ധവേണം: പാക്ക് ചെയ്ത ഭക്ഷ്യവസ്തുക്കള്‍ വാങ്ങുമ്പോള്‍ നിര്‍മാണതീയതിയും ഉപയോഗിക്കാവുന്ന കാലയളവും നോക്കി മാത്രം വാങ്ങുക
റിമൈന്‍ഡറുകള്‍ വെക്കാം: ഓരോ ഭക്ഷ്യവസ്തുവിെന്‍റയും കേടാകുന്ന തീയതി മനസ്സിലാക്കാന്‍ റിമൈന്‍ഡറുകള്‍ സൂക്ഷിക്കാം. പാകം ചെയ്തവ ഉണ്ടാക്കിയ തീയതി രേഖപ്പെടുത്തി സൂക്ഷിക്കുക. എക്സ്പയറി ഡേറ്റ് അടുത്തവ ആദ്യം ഉപയോഗിക്കാം. 
ചിട്ടയോടെ ക്രമീകരിക്കാം: അടുക്കളയും ഫ്രിഡ്ജും ശുചിയായി സൂക്ഷിക്കുക. ഭക്ഷ്യവസ്തുക്കള്‍ ശരിയായ വിധത്തില്‍ റഫ്രിജറേറ്ററില്‍ സൂക്ഷിക്കുക. ആദ്യം ഉപയോഗിക്കേണ്ടത് ആദ്യം എന്ന ക്രമത്തില്‍ ക്രമീകരിക്കാം. 
പുനരുപയോഗിക്കാം: ഭക്ഷണം ബാക്കിയായാല്‍ അതുകൊണ്ട് അടുത്ത ദിവസത്തെ മെനു പ്ലാന്‍ ചെയ്യുക. പച്ചക്കറികള്‍ സലാഡായോ കൂടുതല്‍ പഴുത്ത പഴങ്ങള്‍ ജ്യൂസാക്കിയോ മാറ്റാം. 
കുറച്ച് വിളമ്പാം: വിളമ്പുമ്പോള്‍ കുറച്ച് വിളമ്പുക, ആവശ്യമുണ്ടെങ്കില്‍ വീണ്ടും നല്‍കാം. 
സംഭാവന നല്‍കാം: ആവശ്യത്തിലധികമുള്ളവയും ഉപയോഗ തീയതി തീരും മുമ്പേ ഉപയോഗിക്കാന്‍ കഴിയാത്തവയും ഫുഡ് ബാങ്കുകള്‍ക്കോ സന്നദ്ധ സംഘടനകള്‍ക്കോ സ്ഥാപനങ്ങള്‍ക്കോ ദാനം നല്‍കാം. 
മൃഗങ്ങള്‍ക്ക് തീറ്റയാക്കാം: പാഴായ ഭക്ഷ്യവസ്തുക്കള്‍ വലിച്ചെറിയാതെ മൃഗങ്ങള്‍ക്ക് തീറ്റയായി നല്‍കാം. 
വളമാക്കാം: ഭക്ഷണം പാഴായാല്‍ അത് എറിഞ്ഞുകളയാതെ കമ്പോസ്റ്റ് രീതിയില്‍ ജൈവവളമാക്കി മാറ്റാം. പൈപ്പ് കമ്പോസ്റ്റ് രീതി ഫലപ്രദമാണ്. 
ഈറ്റിങ് ഒൗട്ട് പ്ലാന്‍ ചെയ്യാം: മുന്‍കൂട്ടി ആസൂത്രണം ചെയ്ത ശേഷം മാത്രം ഓര്‍ഡര്‍ ചെയ്യുക. എല്ലാവര്‍ക്കും പൊതുവായി കഴിക്കാവുന്ന വിഭവങ്ങള്‍ വാങ്ങുക. തുടക്കത്തിലേ വലിയ അളവ് വാങ്ങാതെ ആവശ്യത്തിനനുസരിച്ച് മാത്രം ഓര്‍ഡര്‍ ചെയ്യുക. ബാക്കിയായാല്‍ പൊതിഞ്ഞെടുക്കുക. 
പാചകം ചെയ്യുമ്പോള്‍: ആവശ്യമുള്ള ഭക്ഷണത്തിന്‍െറ 10 ശതമാനം കുറച്ച് പാചകം ചെയ്യുക. 
ജങ്ക്ഫുഡ് കുറക്കാം: ഫാസ്റ്റ് ഫുഡും പാക്കറ്റ് ഭക്ഷണവും പരമാവധി കുറക്കുക. പണവും ലാഭിക്കാം ആരോഗ്യവും സംരക്ഷിക്കാം.
ആഹാരമര്യാദകള്‍ പകരാം: ഭക്ഷണത്തെ ആദരിക്കുക, ആവശ്യമുള്ളത് മാത്രം എടുക്കുക, പാഴാക്കാതെ കഴിക്കുക തുടങ്ങിയ ആഹാര മര്യാദകള്‍ കുട്ടികളെ ചെറുപ്പത്തിലേ  ശീലിപ്പിക്കുക.