നിനവിലെ ​പെരുന്നാൾ അമ്പിളി

ഓരോ പെരുന്നാൾ ദിനവും കടന്നുവരുമ്പോഴും തൃ​ശൂർ നെടുമ്പറമ്പ്​ കൂളിമുട്ടം സ്വദേശി ശംസുവിന്‍റെ മനസ്സിൽ ആ ഉമ്മയുടെ കരുണാർദ്രമായ ഓർമകൾ നിറയും. അണമുറിയാത്ത സ്​നേഹംകൊണ്ട്​ തന്നെ ചേർത്തുപിടിച്ച ആ ഇമാറാത്തി ഉമ്മയെ ഓർക്കാതെ ഒരു പെരുന്നാളും ശംസുവിന്‍റെ ജീവിതത്തിലൂടെ കടന്നുപോകില്ല. കാരണം, ഇന്ന്​ ജീവിതത്തിൽ കാണുന്ന എല്ലാ സൗഭാഗ്യത്തിനും പിന്നിൽ അവരുടെ ചേർത്തുപിടിക്കലുണ്ട്. 40 വർഷം ആ ഉമ്മയുടെ തണലിലാണ്​ ജീവിതം കരുപ്പിടിപ്പിച്ചത്​. 18ാം വയസ്സിൽ ദുബൈയിലേക്ക്​ വിമാനം കയറുമ്പോൾ ആശങ്കയുടെ കാർമേഘം മുഖത്ത്​ ഇരുണ്ടുകൂടിയിരുന്നു. കാരണം ഡ്രൈവിങ് അറിയാത്ത താൻ അറബി വീട്ടിൽ ഡ്രൈവറായി ജോലിക്ക്​ പോകുകയാണ്​. ചിന്തകൾ പലവഴിയെ പോകുമ്പോഴും കൂടപ്പിറപ്പ്​ നൽകിയ വിസയാണെന്നതായിരുന്നു ഏക ആശ്വാസം.

നാല്​ പതിറ്റാണ്ടു മുമ്പ്​ അൽ ഖവാനിജിലെ മരുഭൂമിയോട്​ ചേർന്നുള്ള ആ കൊച്ചുവീട്ടിലേക്ക്​ കയറിച്ചെല്ലുമ്പോൾ ഉള്ളിൽ നിറയെ ഭയമായിരുന്നു. പത്ത്​ കിലോമീറ്റർ ചുറ്റളവിൽ മറ്റൊരു വീടില്ല. മുറ്റത്ത്​ ഒരു വലിയ ആട്ടിൻപറ്റം കലപില ശബ്ദമുണ്ടാക്കുന്നുണ്ട്​. അൽപനേരം വീടിന്​ മുന്നിൽ നിന്നു. ശേഷമാണ്​ അകത്തുനിന്ന്​ ഒരു സ്ത്രീ പുറത്തേക്ക്​ വന്നത്​. പ്രായം 60 കടന്നിട്ടുണ്ടാവും. അകത്തോട്ട്​ ക്ഷണിച്ചപ്പോൾ തെല്ലൊരു ആശ്വാസമായി. വീടിനകത്ത്​ മറ്റൊരു മനുഷ്യജീവിയെയും കണ്ടില്ല. കൂട്ടിന്​ കുറെ ആടുകൾമാത്രം. കണ്ണെത്താ ദൂരത്ത്​ പരന്നു​ കിടക്കുന്ന ഈ മരുഭൂമിയിൽ ‘ആടു​ജീവിതം’ നയിക്കേണ്ടി വരുമോയെന്ന പേടി ഉള്ളിൽ നിറഞ്ഞിരുന്നു. മുറ്റത്തെ കാർ കണ്ടപ്പോൾ വീണ്ടും ആശങ്ക. ദൈവമേ ഡ്രൈവിങ്​ അറിയാത്ത ഞാനെങ്ങനെ ഈ വണ്ടി ഓടിക്കും. സത്യം പറഞ്ഞ്​ തിരികെ പോയാലോ എന്നാലോചിച്ചു. പക്ഷേ, ആ ഇമാറാത്തിയുടെ സ്​നേഹവായ്പിൽ മനസ്സിന് ധൈര്യം കൈവന്നു. അങ്ങനെ ഡ്രൈവിങ്​ അറിയാത്ത ശംസു ആ വീട്ടിൽ ‘ഡ്രൈവറായി’. പക്ഷേ, വണ്ടി ഓടിച്ചത്​ പിന്നെയും കാലങ്ങൾ ഏറെ കടന്നുപോയ ശേഷമായിരുന്നുവെന്ന്​ മാത്രം.

സനഅ സഈദ്​ ബിൻ നാസർ സനഅ എന്നായിരുന്നു അവരുടെ മുഴുവൻ പേര്​. സ്​നേഹത്തോടെ മാമ എന്നായിരുന്നു ശംസു വിളിച്ചിരുന്നത്​​​. വീടിന്​ തൊട്ടടുത്തുള്ള ഒറ്റമുറിയിലായിരുന്നു ശംസുവിന്‍റെ താമസം. ആദ്യമൊക്കെ ആടുകളെ മേക്കുന്നത്​ വലിയ പ്രയാസം സൃഷ്ടിച്ചെങ്കിലും ചോക്ലറ്റുകളും മധുര പാനീയങ്ങളുമായി എന്നും സൽക്കരിച്ചിരുന്ന മാമയെ വിട്ടുപോകാൻ മനസ്സ് അനുവദിച്ചില്ല. രണ്ട്​ പെൺമക്കളാണ്​ മാമക്ക്​. രണ്ടു​ പേരും ഖത്തറിൽ സ്ഥിരതാമസം. ഒറ്റക്ക്​ താമസിക്കുന്ന ആ ഉമ്മയുടെ ജനിക്കാത്ത മകനായി അങ്ങനെ ശംസു മാറി. അത്രമേൽ ഇഴുകിച്ചേർന്നിരുന്നു ആ ബന്ധം. ജൂണിലെ ഉഷ്ണത്തിൽ ഉറക്കം നഷ്ടപ്പെടുമ്പോൾ എയർ കണ്ടീഷൻ ചെയ്ത മുറിയിലേക്ക്​ ആ ഉമ്മ കൂട്ടിക്കൊണ്ടുപോകും.

പെരുന്നാൾ ദിനങ്ങളിൽ ‘മകനായി’ പ്രത്യേക ഭക്ഷണമൊരുക്കും. ഒരു പ്ലേറ്റിൽ ഒരുമിച്ചായിരുന്നു ഉണ്ടിരുന്നത്​. പെരുന്നാൾ കോടിയും അവർ വാങ്ങിനൽകും. വീട്ടുജോലിക്കാരനായ ശംസുവിന്​ ഒടുവിൽ ആ ഉമ്മ മറ്റൊരു വീട്ടുജോലിക്കാരനെ വെച്ചു നൽകി. അങ്ങനെ ശംസു വീട്ടുകാരനായി മാറി. ഇതിനിടെ വിവാഹം കഴിച്ചു. സഹോദരങ്ങളെ ദുബൈയിലെത്തിച്ച്​ ജോലി തരപ്പെടുത്തി നൽകി. ആ ഉമ്മയുടെ കാരുണ്യത്തിൽ മറ്റനേകം മലയാളി സുഹൃത്തുക്കൾക്കും ബന്ധുക്കൾക്കും ജോലി നേടിക്കൊടുത്തു. ചെറു സംരംഭം തുടങ്ങാനുള്ള അനുവാദവും നൽകി. ഖത്തറിലെ മക്കൾ ഉമ്മയെ കുറിച്ചറിഞ്ഞതും ശംസുവിൽനിന്നായിരുന്നു. ഓരോ പെരുന്നാൾ കടന്നുവരുമ്പോഴും അവർ ശംസുവിലൂടെയാണ്​ ഉമ്മക്ക്​ ആശംസ അറിയിച്ചിരുന്നത്​​. ഒടുവിൽ അതിലൊരാൾ മരിച്ചപ്പോൾ ഉമ്മയെ അറിയിക്കാനുള്ള ദൗത്യവും ശംസുവിനായിരുന്നു.

മരുഭൂമിയെ പച്ചപ്പ്​ നിറച്ചതും ശംസുവിന്‍റെ കഠിനാധ്വാനമാണ്​. ആടുകൾ ഏറെയുണ്ടെങ്കിലും ഒരിക്കൽപോലും ശംസുവിന്​ ‘ആടുജീവിതം’ നയിക്കേണ്ടി വന്നിട്ടില്ല. ഡ്രൈവിങ്​ പഠിച്ചതോടെ കൂടുതൽ ശമ്പളത്തിൽ പല ഓഫറുകളും വന്നിരുന്നു. പക്ഷേ, മാമയെ പിരിയാൻ മനസ്സനുവദിച്ചില്ല. ഒരു നൂറ്റാണ്ടുകാലം ജീവിച്ച മാമ നാലു വർഷം മുമ്പ്​ ഈ ലോകത്തോട്​ വിടപറയുന്നതും ശംസുവിന്‍റെ അടുത്തുവെച്ചായിരുന്നു. ഒറ്റ ഒസ്യത്തെ അവർക്കുണ്ടായിരുന്നുള്ളൂ. ആടുകളെ വിൽക്കരുത്​. തുടർന്ന്​ മാമ മരിച്ചശേഷവും ഒരു വർഷത്തോളം ശംസു ആ വീട്ടിലായിരുന്നു താമസം. ആടുകളെ പരിചരിച്ചിരുന്നത്​ ഇദ്ദേഹമായിരുന്നു. പക്ഷേ, ഒരു വർഷത്തിനുശേഷം ബന്ധുക്കൾ വന്ന്​ ആടുകളെ വിറ്റതോടെ മനസ്സിൽ വല്ലാത്ത വീർപ്പുമുട്ടലായി​. അതോടെ, അവിടെനിന്ന്​ താമസം മാറി. ഇപ്പോൾ സ്വന്തമായ സംരംഭം നോക്കിനടത്തുകയാണ് അദ്ദേഹം. ഓരോ പെരുന്നാൾ അമ്പിളി മാനത്ത്​ തെളിയുമ്പോഴും ശംസുവും കുടുംബവും മാമയുടെ ഓർമകളിൽ വിതുമ്പും.