ശബരിമലയിലെ തിരക്ക്​: പൊലീസ്​ മേധാവിയുടെ നിർദേശങ്ങളിൽ ഹൈകോടതി നിലപാട്​ തേടി

കൊച്ചി: ശബരിമലയിലെ തിരക്ക്​ നിയന്ത്രിക്കാൻ പൊലീസ്​ മേധാവി സമർപ്പിച്ച നിർദേശങ്ങളിൽ ഹൈകോടതി തിരുവിതാംകൂർ ദേവസ്വം ബോർഡിന്റെയും അമിക്കസ് ക്യൂറിയുടെയും ശബരിമല സ്പെഷൽ കമീഷണറുടെയും നിലപാട്​ തേടി. കഴിഞ്ഞ ദിവസം സർക്കാർതലത്തിൽ ചേർന്ന യോഗത്തിലെ തീരുമാനങ്ങളടങ്ങുന്ന റിപ്പോർട്ട്​ പത്തനംതിട്ട ജില്ല കലക്ടർ കോടതിയിൽ​ സമർപ്പിച്ചു.

വെർച്വൽ ക്യൂ മുഖേനയുള്ള പ്രതിദിന ബുക്കിങ്​ 90,000ഉം ദർശനം 19 മണിക്കൂറും ആക്കിയതുമടക്കം നിർദേശങ്ങളാണ് കലക്ടർ സമർപ്പിച്ചത്. ഭക്തരുടെ ഒഴുക്ക് ക്രമാതീതമായാൽ എരുമേലി, പത്തനംതിട്ട, കോട്ടയം തുടങ്ങി സമീപസ്ഥലങ്ങളിൽ ജില്ല കലക്ടർമാരുടെ അറിവോടെ തീർഥാടകരുടെ വാഹനങ്ങൾ നിയന്ത്രിക്കണമെന്നതടക്കമുള്ള നിർദേശങ്ങളാണ് പൊലീസ് നൽകിയത്. ഇത്​ സംബന്ധിച്ച ഹരജികൾ ബുധനാഴ്ച വീണ്ടും പരിഗണിക്കാൻ ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് പി.ജി. അജിത്കുമാർ എന്നിവരടങ്ങുന്ന ഡിവിഷൻ ബെഞ്ച്​ മാറ്റി.

അതേസമയം, പത്തനംതിട്ടയിലേക്ക് വിവിധ സ്ഥലങ്ങളിൽനിന്നുള്ള ഷെഡ്യൂൾ സർവിസുകൾ ഇപ്പോഴും അതേപടിയാണ്​ തുടരുന്നതെന്ന്​ ​ കെ.എസ്​.ആർ.ടി.സി അറിയിച്ചു. മണ്ഡല മകരവിളക്ക്​ സീസൺ ആണെങ്കിലും ഇവ സ്പെഷൽ സർവിസുകളാക്കി മാറ്റിയിട്ടില്ല. തീർഥാടകരിൽനിന്ന് കെ.എസ്.ആർ.ടി.സി അധിക നിരക്ക് ഈടാക്കുന്നുവെന്നതടക്കം പരാതിയിൽ ദേവസ്വം ബെഞ്ച് സ്വമേധയാ സ്വീകരിച്ച ഹരജിയിലാണ് വിശദീകരണം.

ഷെഡ്യൂൾ സർവിസുകളുടെ പട്ടികയും കെ.എസ്​.ആർ.ടി.സി സമർപ്പിച്ചു. ഇക്കാര്യത്തിൽ വിശദമായ സത്യവാങ്മൂലം നൽകാൻ നിർദേശിച്ച കോടതി ഹരജി​ വെള്ളിയാഴ്ച പരിഗണിക്കാൻ മാറ്റി.