പള്ളികളെ ഭക്​തിസാന്ദ്രമാക്കുന്ന ഗാ​യ​ക സം​ഘം

ലോകത്തിന്‍റെ ഏത്​ കോണിലായാലും ക്രിസ്മസ്​ ദിനാഘോഷങ്ങൾക്ക്​ ഭക്​തിസാന്ദ്രമായ അന്തരീക്ഷം ഒരുക്കുന്നതിൽ ക്വയർ സംഘങ്ങളുടെ പങ്ക്​ നിസ്തുലമാണ്​​. മറ്റ്​ ഗായക സംഘങ്ങളിൽ നിന്ന്​ വിത്യസ്തമായി സൗമ്യമായ ആലാപന ശൈലി കൊണ്ട്​ വിശ്വാസികൾക്ക്​ ഹൃദ്യമായ അനുഭവം സമ്മാനിക്കുന്നതോടൊപ്പം മനസിൽ ഭക്​തിയുടെ നിറഭാവങ്ങൾ തീർക്കുന്നവയാണ്​​ പള്ളികളിലെ ക്വയർ സംഘങ്ങൾ.

പ്രവാസ ലോകത്തും മലയാളികളുടെ നേതൃത്വത്തിലുള്ള വിശ്വാസി സമൂഹത്തിന്‍റെ ക്വയർ സംഘങ്ങൾ വിവിധ പള്ളികൾ കേന്ദ്രീകരിച്ച്​ സജീവമായി പ്രവർത്തിച്ചുവരുന്നുണ്ട്​​. എന്നാൽ, നാലര പതിറ്റാണ്ടിലധികമായി സജീവമായി ഈ രംഗത്തുള്ള പള്ളിയാണ്​ ദുബൈ സി.എസ്​.ഐ ചർച്ച്​. യുനൈറ്റഡ്​ അറബ്​ എമിറേറ്റ്​സിലെ ചർച്ച്​ ഓഫ്​ സൗത്ത്​ ഇന്ത്യയുടെ ആദ്യ ഇടവകയാണ്​ ദുബൈയിലെ സി.എസ്​​.ഐ ഇടവക.

ചർച്ച് ഓഫ് സൗത്ത് ഇന്ത്യയുടെ പാരമ്പര്യമനുസരിച്ച് ആരാധനയുടെ അവിഭാജ്യ ഘടകമാണ് ചർച്ച് ക്വയർ (ഗായക സംഘം). ക്വയറിൽ പരിശീലനം ലഭിച്ച ഗായകനാകാൻ വളരെയധികം പ്രതിബദ്ധത ആവശ്യമാണ്. ദുബൈ സി.എസ്‌.ഐ പാരിഷ് ക്വയർ സംഘാംഗത്തിന്​ മികച്ച നിലവാരത്തിലുള്ള പരിശീലനമാണ്​ നൽകിവരുന്നത്​. 1975 ൽ ആണ്​ ദുബൈ സി.എസ്​.ഐ പാരിഷ്​ ഗായക സംഘം ആരംഭിക്കുന്നത്​. തുടക്കത്തിൽ പുരുഷൻമാരാണ്​ സംഘത്തിലുണ്ടായിരുന്നത്​. പ്രധാനമായും പ്രതിവാര ആരാധനയിൽ സഭയെ ആലാപനത്തിൽ നയിക്കുകയാണ് ഗായക സംഘത്തിന്‍റെ​ ലക്ഷ്യം.

പിന്നീട്​ മൂന്ന്​ ക്വയർ മാസ്റ്റർമാരുടെ നേതൃത്വത്തിൽ സംഘത്തെ കൂടുതൽ വിപുലീകരിക്കുകയായിരുന്നു. ക്വയർ മാസ്റ്ററായ ജെ.ഇ മാത്യു ആണ്​ 2006 വരെ ക്വയർ സംഘത്തിന് ആദ്യം​ പരിശീലനം നൽകി വന്നത്​. ശേഷം 2012 വരെ മാത്യു ഫിലിപ്പ്​ എന്ന ക്വയർ മാസ്റ്ററുടെ നേതൃത്വത്തിൽ പരിശീലനം തുടർന്നു. നിലവിൽ ജൂബി അബ്രഹാമിന്‍റെ നേതൃത്വത്തിൽ സംഘത്തിൽ 70 അംഗ ഗായക സംഘമാണ്​ സി.എസ്​.ഐയിൽ പ്രവർത്തിക്കുന്നത്​.

അസി. ക്വയർ മാസ്റ്റർ ജിനോ മാത്യു, ഓർഗനിസ്റ്റ്​ പ്രതീഷ്​ പോത്തൻ എന്നിവരാണ്​ ജൂബി എബ്രഹാമിന്‍റെ സഹായികൾ. ജൂനിയർ ക്വയർ സംഘത്തിൽ എട്ടു മുതലുള്ള കുട്ടികൾ​ അംഗങ്ങളാണ്​​. ഞായറാഴ്ച നടക്കുന്ന ആരാധനയിൽ ആലാപനം സുഗമമാക്കുക എന്നതാണ് ഗായകസംഘത്തിന്‍റെ പ്രധാന പ്രവർത്തനം. ഇടവക വികാരി രാജു ജേക്കബാണ്​ പരിപാടികൾക്കെല്ലാം നേതൃത്വം നൽകുന്നത്​.​ ക്രിസ്മസ്​ ദിനങ്ങളിലുള്ള ക്വയറിന്​ വളരെയേറെ പ്രത്യേകതകളുണ്ട്​.

പാരിഷിനകത്തും പുറത്തും നിന്നുമായി വലിയ ആസ്വാദക സംഘം തന്നെ ഇതിനായി വന്നെത്തുമെന്നതാണ്​ പ്രത്യേകത. അബൂബദി, ദുബൈ, ഷാർജ, ജബൽ അലി യൂനിറ്റുകളുമായി ചേർന്ന്​ ദുബൈ സി.എസ്​.ഐ പാരിഷ്​ എല്ലാ വർഷവും ക്വയർ ഫെസ്റ്റിവൽ സംഘടിപ്പിക്കാറുണ്ട്​. ഒന്നിലധികം ആളുകൾ കോറസായി പാടുന്നതു കൊണ്ടാണ്​ ഇതിന്​ ക്വയർ എന്ന്​​ വിളിക്കുന്നത്​.