ചരിത്ര നേട്ടത്തിലേക്ക്​ പറന്നുയർന്ന്​ ശിവാംഗി

കൊച്ചി: ബിഹാറിലെ മുസഫർപൂരിൽനിന്നുള്ള ശിവാംഗി ഇന്നലെ ചരിത്രനേട്ടത്തി​​​​െൻറ നെറുകയിലേക്ക്​ പറന്നുയർന്നു. ഇന്ത്യൻ നാവികസേനയുടെ ആദ്യ വനിത പൈലറ്റ്​ എന്ന ബഹുമതിയാണ്​ ശിവാംഗി സ്വന്തമാക്കിയത്​. കൊച്ചിയിലെ ദക്ഷിണ നാവിക ആസ്​ഥാനത്ത്​ നടന്ന ചടങ്ങിൽ ശിവാംഗിക്ക്​ ദക്ഷിണ നാവിക കമാൻഡി​​​​െൻറ ഫ്ലാഗ്​ ഓഫിസർ കമാൻഡിങ്​ ഇൻ ചീഫ്​ വൈസ്​ അഡ്​മിറൽ എ.കെ. ചൗള വിമാനം പറത്താനുള്ള അനുമതിപത്രം കൈമാറി.

പത്താം വയസ്സ്​​ മുതൽ മനസ്സിലേറ്റിയ സ്വപ്​നമാണ്​ പൂവണിയുന്നതെന്ന്​ ശിവാംഗി പറഞ്ഞു. കുഞ്ഞുനാളിൽ കണ്ട വിമാനത്തിലൂ​ടെയാണ്​ പൈലറ്റ്​ ആകണമെന്ന ആഗ്രഹം ശിവാംഗിയുടെ മനസ്സിൽ ലാൻഡ്​​ ചെയ്​തത്​. വിമാനം പറത്തുക എന്നത്​ ഏറെ വ്യത്യസ്​തതയുള്ള ജോലിയായി തോന്നി. പിന്നീട്​ ആ സ്വപ്​നത്തിന്​ പിന്നാലെയായിരുന്നു.

നാവികസേനയുടെ ആദ്യ വനിത പൈലറ്റായി ചുമതലയേറ്റ ശിവാംഗി ​െകാച്ചിയിലെ ദക്ഷിണ നാവിക ആസ്​ഥാനത്ത്​

എയർഫോഴ്​സ്​ അക്കാദമി, ഇന്ത്യൻ നേവൽ എയർ സ്​ക്വാഡ്രൺ 550, ഐ.എൻ.എസ്​ ഗരുഡ കൊച്ചി എന്നിവിടങ്ങളിൽ രണ്ടുഘട്ടങ്ങളായി ഒരു വർഷത്തെ കഠിന പരിശീലനത്തിനൊടുവിലാണ്​ ശിവാംഗി സ്വപ്​നം സാക്ഷാത്​കരിച്ചത്​. ഏഴിമല നേവൽ അക്കാദമിയിലാണ്​ നേവൽ ഓറിയ​േൻറഷൻ കോഴ്​സ്​ പൂർത്തിയാക്കിയത്​. ഐ.എൻ.എസ്​ ഗരുഡയിലെ ഡ്രോണിയർ സ്​ക്വാഡ്രണായ ഐ.എൻ.എ.എസ്​ 550ൽ ശിവാംഗി വിദഗ്​ധ പരിശീലനം തുടരും.

നാവികസേനക്ക് ഇത് അഭിമാന നിമിഷമാണെന്ന് വൈസ് അഡ്മിറൽ എ.കെ. ചൗള പറഞ്ഞു. ഈ മാസം അവസാനത്തോടെ ദിവ്യ, ശുഭാംഗി എന്നീ വനിതകൾ കൂടി നാവികസേന പൈലറ്റ് ആയി പരിശീലനം പൂർത്തിയാക്കും.