'മലാല, നിങ്ങൾ ഒരു സമ്പൂർണ ദർശനമാണ്'; ആശംസകളുമായി പ്രിയങ്ക

ന്യൂഡൽഹി: വിവാഹിതയായ ആക്​ടിവിസ്റ്റും നൊബേൽ സമ്മാന ജേതാവുമായ മലാല യൂസഫ്​സായിക്ക് ആശംസകൾ നേർന്ന് ബോളിവുഡ് നടി പ്രിയങ്ക ചോപ്ര. ''മലാലക്ക് അഭിനന്ദനങ്ങൾ, സന്തോഷകരവും ആഹ്ലാദകരവുമായ ജീവിതം ആശംസിക്കുന്നു. നിങ്ങൾ ഒരു സമ്പൂർണ ദർശനമാണ്''-പ്രിയങ്ക ഇൻസ്റ്റഗ്രാമിൽ കുറിച്ചു.

പാകിസ്​താൻ ക്രിക്കറ്റ്​ ബോർഡ്​ ഹൈ പെർഫോമൻസ്​ സെന്‍റർ ജനറൽ മാനേജർ അസീർ മാലിക്കാണ് മലാല യൂസഫ്​സായിയുടെ വരൻ. ബർമിങ്​ഹാമിലെ വീട്ടി​ൽ നടത്തിയ ലളിതമായ ചടങ്ങിലായിരുന്നു നിക്കാഹ്. ട്വിറ്ററിലുടെ വിവാഹവിവരം പുറത്തുവിട്ട ​മലാല, നിക്കാഹിന്‍റെ ചിത്രങ്ങളും പങ്കുവെച്ചു​.

'ഇന്ന്​ ജീവിതത്തിലെ പ്രധാനപ്പെട്ട ഒരു ദിവസമാണ്​. ഞാനും അസീറും ജീവിതത്തിൽ ഒരുമിക്കാൻ തീരുമാനിച്ചു. ലണ്ടൻ ബർമിങ്​ഹാമിലെ വീട്ടിൽ കുടുംബാംഗങ്ങൾ മാത്രം പ​ങ്കെടുത്ത നിക്കാഹും നടത്തി. നിങ്ങളുടെ പ്രാർഥനകൾ ഞങ്ങൾ​ക്കൊപ്പം വേണം. ഒരുമിച്ച്​ ജീവിക്കുന്നതിന്‍റെ ആവേശത്തിലാണ്​ തങ്ങളിരുവരുമെന്നും' മലാല ട്വിറ്ററിൽ കുറിച്ചു.