അവർ കൈകോർത്തു, ദയ കടലിനിക്കരയെത്തിക്കാൻ

ദമ്മാം: മനുഷ്യസ്നേഹികളായ ഒരുകൂട്ടം ആളുകളുടെ നിരന്തര പരിശ്രമമാണ്​ മരണശിക്ഷയുടെ വാൾത്തലപ്പിൽനിന്ന്​ ആ നിർധന യുവാവിന്റെ​ ജീവിതം രക്ഷപ്പെടുത്തിയത്​. കൊല്ലം പള്ളിത്തോട്ടത്തിലെ ലക്ഷംവീട്​ കോളനിയിലായിരുന്നു സക്കീർ ഹുസൈന്റെ കുടുംബം. ഉപ്പ സലാഹുദ്ദീൻ ഹൃദ്രോഗി. ഉമ്മ സാഹിറത്തിന്​ സംസാരശേഷി ഇല്ല. അനുജൻ അപകടത്തിൽപെട്ട്​ ചികിത്സയിൽ. ഇതിനിടയിലാണ്​ കുടുംബത്തിന്റെ ഏക അത്താണിയായ സക്കീർ ഹുസൈൻ കൊലപാതകിയായി ജയിലിലാകുന്നത്​. സഹായിക്കാൻ ആരുമില്ലാതെ ഒറ്റപ്പെട്ടുപോയ കുടുംബത്തിന്​ രക്ഷാദൂതരായി മാറുകയായിരുന്നു അയൽക്കാരായ ജസ്​റ്റിനും അനിതയും​.

ജസ്​റ്റിനാണ്​ ഈ വിഷയം സൗദിയിലെ സാമൂഹികപ്രവർത്തകനായ ​ശിഹാബ്​ കൊട്ടുകാടിന് മുന്നിലെത്തിച്ചത്​. ശിഹാബ്​ നാട്ടിൽപോയപ്പോഴെല്ലാം ഈ കുടുംബത്തേയും കൂട്ടി സഹായം തേടിയെത്തിയത് അനിത. കുടുംബത്തിന്റെ കണ്ണീരുകണ്ടതോടെ ശിഹാബിന് വെറുതെയിരിക്കാനായില്ല. കൊല്ലപ്പെട്ട തോമസ്​ മാത്യുവിന്റെ കുടുംബത്തോട് സംസാരിച്ച് സക്കീർ ഹുസൈന്റെ ജീവൻ രക്ഷിക്കാൻ സഹായം തേടി. ​ഉമ്മൻ ചാണ്ടിയുടെ ശ്രദ്ധയിലേക്ക്​ വിഷയമെത്തിച്ച് പരിഹാര നടപടികൾ വേഗത്തിലാക്കാനും ശിഹാബ് മുന്നിട്ടിറങ്ങി​.

ഉമ്മൻ ചാണ്ടിയെ കാണാൻ സക്കീർ ഹുസൈന്റെ കുടുംബത്തെ കൊണ്ടുപോയത് അനിതയും. ഒടുവിൽ തോമസ്​ മാത്യുവി​ന്റെ കുടുംബത്തിന്​ അർഹതപ്പെട്ട 'ദിയാധനം' (മോചനദ്രവ്യം) ഉമ്മൻ ചാണ്ടി നൽകിയത് അദ്ദേഹത്തിന്റെ കാരുണ്യമനസ്സിനൊപ്പം ഈ സാമൂഹികപ്രവർത്തകരുടെ കൂടി ശ്രമഫലവും കൊണ്ടുകൂടിയാണ്. അപ്രതീക്ഷിത വിധികളിൽ തകർന്നുപോയ ഒരു കുടുംബത്തിന്​ ഒപ്പംനിന്ന്​ അവരെ തിരികെ ജീവിതത്തിലേക്ക്​ എത്തിക്കുകയായിരുന്നു ഇവരുടെ കൂട്ടായ പ്രയത്നം. കൊല്ലപ്പെട്ട തോമസ്​ മാത്യുവിന്റെ കുടുംബത്തിന്റെ ഉദാര മനസ്സ് ഈ പ്രയത്നത്തെ വിജയത്തിലെത്തിച്ചു.

'എന്റെ മക​നെ എന്തിനവൻ കൊന്നു' എന്നായിരുന്നു ആ അമ്മയുടെ ചോദ്യം. ഒടുവിൽ സക്കീറിന്റെ കുടുംബത്തിന്റെ കണ്ണീരിനുമുന്നിൽ ഇവർ സ്വന്തം ദുഃഖം മറന്ന്​ മാപ്പു നൽകുകയായിരുന്നു. തോമസ്​ മാത്യുവിന്റെ കുടുംബത്തിന്റെ വിശാല മനഃസ്ഥിതിയാണ്​ ഈ കേസിന്​ ഇങ്ങനെയൊരു പര്യവസാനം നൽകിയതെന്ന്​ ശിഹാബ്​ കൊട്ടുകാട്​ പറഞ്ഞു.

, ഇതിന്റെ കേസ് വഴികളിൽ ഒപ്പംനിന്ന ഇന്ത്യൻ എംബസി ഉദ്യോഗസ്​ഥരായ സനീഷിന്റെയും യുസുഫ്​ ഉൾപ്പെടെയുള്ളവരുടെയും പിന്തുണ വിസ്​മരിക്കാനാവാത്തതാണ്​. നിരന്തരം ദമ്മാമിലേക്കുള്ള യാത്രകളിൽ പലപ്പോഴും ഒരു പ്രതിഫലവും ആഗ്രഹിക്കാതെ കൂടെവന്ന സലീം പാറയിൽ, ജയിൽ ഉദ്യോഗസ്​ഥർ, കോടതിയിലുള്ളവർ തുടങ്ങി നിരവധി ആളുകളോട്​ നന്ദി പറയേണ്ടതുണ്ടെന്നും ശിഹാബ്​ പറഞ്ഞു.

ശിഹാബ് കൊട്ടുകാട്