വിദേശത്ത്​ നിന്നെത്തിയ ദമ്പതികളിൽ ഭർത്താവിന്​ കോവിഡ്​ സ്​ഥിരീകരിച്ചു

കൊടുങ്ങല്ലൂർ: വിദേശത്ത്​ നിന്നെത്തിയ ദമ്പതികളിൽ ഭർത്താവിന്​ കോവിഡ്​ സ്​ഥിരീകരിച്ചു. ഗർഭിണിയായ ഭാര്യക്ക്​ കോവിഡ്​ ബാധിച്ചിട്ടില്ലെന്ന്​ പരിശോധനയിൽ തെളിഞ്ഞു.

ജൂൺ ഒന്നിന്​ വിദ്ദേശത്ത്​ നിന്നെത്തിയ യുവാവിനാണ്​ ​വൈറസ്​ ബാധ സ്​ഥിരീകരിച്ചത്​. കൊടുങ്ങല്ലൂർ നഗരസഭ പ്രദേശത്ത്​ ആദ്യ കോവിഡ്​ ബാധയും ഇതാണ്​. മേഖലയിൽ എസ്​.എൻ.പുരം, മതിലകം തുടങ്ങിയ പ്രദേശങ്ങളിൽ ഇതിനകം പല കേസുകളും സ്​ഥിരീകരിച്ചീട്ടുണ്ടെങ്കിലും കൊടുങ്ങല്ലൂർ നഗരസഭ പ്രദേശത്ത്​ ആദ്യമായാണ് റിപ്പോർട്ട്​ ചെയ്യുന്നത്​.

നഗരത്തിലെ വീട്ടിൽ ക്വാറൻറീനിൽ ആയിരുന്ന ദമ്പതികളിൽ പ്രത്യേക ലക്ഷണം കണ്ടിരുന്നില്ല. എന്നാൽ ഭാര്യ ഗർഭിണിയായതിനാൽ അവരുടെ സ്രവം ആരോഗ്യ വകുപ്പ്​ പരിശോധനക്കായി ശേഖരിക്കുകയായിരുന്നു. ഇതോടൊപ്പമാണ്​ ഭർത്താവ്​ ത​​െൻറയും ​സ്രവം പരിശോധിക്കാൻ ആവശ്യപ്പെടുകയായിരുന്നു​. പരി​ശോധനാ ഫലം വന്ന ശേഷം യുവാവിനെ മെഡിക്കൽ കോളജിലേക്ക്​ മാറ്റുകയും യുവതിയെ വീട്ടിൽ തന്നെ നിരീക്ഷണത്തിൽ നിർത്തിയിരിക്കുകയുമാണ്​. ദമ്പതികൾ എത്തുന്നതിന്​ മു​െമ്പ വീട്ടിലുണ്ടായിരുന്നവർ മറ്റൊരിടത്തേക്ക്​ മാറിയിരുന്നു.

നഗരസഭ ​പ്രദേശത്ത്​ വിദേശത്ത്​ നിന്ന്​ എത്തിയവരും, മറ്റു സംസ്​ഥാനങ്ങളിൽ നിന്ന്​ എത്തിയവരുമായി നാനൂറോളം പേർ നിരീക്ഷണത്തിലുണ്ടെന്നാണ്​ ആരോഗ്യ കേന്ദ്രങ്ങൾ വ്യക്​തമാക്കുന്നത്​.​ നഗരസഭ പ്രദേശത്ത്​ താമസക്കാരായ രണ്ട്​ പേർ ഗൾഫിൽ കോവിഡ്​ ബാധിച്ച്​ മരിച്ചിരുന്നു.