പ്രവാസി വെൽഫെയർ : ജുബൈൽ ലോഗോ പ്രകാശനം

ജുബൈൽ : പ്രവാസി സാംസ്‌കാരിക വേദി 'പ്രവാസി വെൽഫെയർ' എന്ന പേര് സ്വീകരിച്ച ശേഷം സംഘടനയുടെ പുതിയ ലോഗോ പ്രകാശനവും സാംസ്‌കാരിക സമ്മേളനവും ജുബൈലിൽ നടന്നു. കിഴക്കൻ പ്രോവിൻസ് പ്രസിഡന്റ് മുഹ്‌സിൻ അറ്റാശ്ശേരി ലോഗോ പ്രകാശനം നിർവ്വഹിച്ചു. പ്രവാസി ജുബൈൽ റീജിണൽ കമ്മിറ്റി പ്രസിഡന്റും യോഗ അധ്യക്ഷനുമായിരുന്ന ഫൈസൽ കോട്ടയം ഏറ്റുവാങ്ങി. അക്രമത്തിനും അനീതിക്കും അഴിമതിക്കും ഫാസിസത്തിനുമെതിരെ ജനാധിപത്യ വിശ്വാസികളുടെ ഏകോപനം ഉണ്ടാവണമെന്ന് മുഖ്യ പ്രഭാഷണം നിർവഹിച്ച മുഹ്‌സിൻ പറഞ്ഞു. രാജ്യത്ത് നിലവിലുള്ള സാഹചര്യത്തില്‍ വര്‍ഗീയതയ്ക്കെതിരെ വിപുലമായ ജനാധിപത്യ–മതനിരപേക്ഷ ശക്തികളുടെ കൂട്ടായ്മയാണ് ആവശ്യമായിട്ടുള്ളത്. അതോടൊപ്പം ജനകീയപ്രസ്ഥാനങ്ങളുടെ രാഷ്ട്രീയസഖ്യവും കെട്ടിപ്പടുക്കണം. ഈ ദ്വിമുഖസമീപനത്തിലൂടെമാത്രമേ ഫാസിസ്റ്റ് ശക്തികളെ ചെറുക്കാനും പരാജയപ്പെടുത്താനും കഴിയൂവെന്ന് യോഗം വിലയിരുത്തി. 'പ്രവാസം: ആരോഗ്യവും,അതിജീവനവും' എന്ന വിഷയത്തിൽ നടന്ന ചർച്ചാ സംഗമത്തിൽ പി.വി. അബ്ദുൽ റഹൂഫ് മുഖ്യ പ്രഭാഷണം നടത്തി. 'പ്രവാസികളും മാനസികാരോഗ്യവും' എന്ന വിഷയത്തിൽ സന്നദ്ധ പ്രവർത്തകരായ സൈഫുദീൻ പൊറ്റശ്ശേരി, സലിം ആലപ്പുഴ എന്നിവർ ചർച്ച നയിച്ചു. വിവിധ സംഘടനാ പ്രതിനിധികളായ നൂഹ് പാപ്പിനിശ്ശേരി,അഷ്‌റഫ് മുവാറ്റുപുഴ,മുഹമ്മദ് കുട്ടി മാവൂർ,ബൈജു അഞ്ചൽ, ഡോ.ജൗഷീദ്,സാബു മേലതിൽ സംസാരിച്ചു. നസീർ ഹനീഫ സ്വാഗതവും നിയാസ് കൊടുങ്ങല്ലൂർ നന്ദിയും പറഞ്ഞു. അബ്ദുൽ കരീം ആലുവ അവതാരകനായിരുന്നു.