ബംഗളൂരു നാഷനൽ പബ്ലിക് സ്കൂളിൽ ബോംബ് ഭീഷണി; വിദ്യാർഥികളെ ഒഴിപ്പിച്ചു

ബംഗളുരു: നാഷനൽ പബ്ലിക് സ്കൂളിൽ ബോംബ് ഭീഷണി. തുടർന്ന് സ്കൂളിൽ നിന്ന് വിദ്യാർഥികളെ സുരക്ഷിതമായി ഒഴിപ്പിച്ചു. പൊലീസ് ഉടൻ സംഭവസ്ഥലത്തെത്തി പരിശോധന നടത്തി.

''ബോംബ് നിർവീര്യ സ്ക്വാഡുമായി സ്കൂൾ മുഴുവൻ ഞങ്ങളുടെ സംഘം പരിശോധിച്ചു. കുട്ടികളെ സുരക്ഷിത സ്ഥാനത്തേക്ക് മാറ്റി.''-ബംഗളൂരു(വെസ്റ്റ്)ഡി.സി.പി ലക്ഷ്മൺ ബി നിംബാർഗി പറഞ്ഞു. ബോംബ്​ വെച്ചതായി സന്ദേശമയച്ചയാളെ കുറിച്ച് അന്വേഷിക്കുകയാണെന്നും ​അദ്ദേഹം കൂട്ടിച്ചേർത്തു.

മുമ്പ് ബംഗളൂരു വിമാനത്താവളത്തിൽ ബോംബ് ഭീഷണിയുണ്ടെന്ന തരത്തിൽ ട്വീറ്റ് ചെയ്ത വിദ്യാർഥിയെ പൊലീസ് അറസ്റ്റ് ചെയ്തിരുന്നു. വിമാനത്താവളം അധികൃതരുടെ പരാതിയെ തുടർന്നായിരുന്നു അറസ്റ്റ്. കഴിഞ്ഞ വർഷം ബംഗളൂരു വിമാനത്താവളത്തിന് നിരവധി ബോംബ് ഭീഷണികളാണ് ലഭിച്ചത്.