സർക്കാർ തലത്തിൽ ഓൺലൈൻ ടാക്സി ആപ് വരുന്നു
text_fieldsബംഗളൂരു: യാത്രക്കാർക്ക് മിതമായതും ഡ്രൈവർമാർക്ക് നഷ്ടവുമില്ലാത്ത കൂലിയടക്കം വാഗ്ദാനം ചെയ്ത് സർക്കാർ തലത്തിൽ ഓൺലൈൻ ടാക്സി ആപ് പുറത്തിറക്കുന്നു. ഓട്ടോറിക്ഷകളും ടാക്സി കാറുകളും യാത്രക്കാർക്ക് ഓൺലൈനായി ബുക്ക് ചെയ്യാനുള്ള മൊബൈൽ ആപ്ലിക്കേഷൻ ഗതാഗതവകുപ്പാണ് തയാറാക്കുന്നത്. സ്വകാര്യകമ്പനികളായ ഒല, ഉബർ എന്നിവയുടെ ആപ്ലിക്കേഷന് സമാനമായായിരിക്കും ഇത്.
അഞ്ച് മാസങ്ങൾക്കകം ആപ് പുറത്തിറക്കുമെന്ന് ഗതാഗതമന്ത്രി രാമലിംഗറെഡ്ഡി അറിയിച്ചു. സ്വകാര്യ ആപ്പുകൾ വലിയതുക കമീഷൻ ഈടാക്കുന്നുണ്ടെന്നും ഡ്രൈവർമാർക്ക് ലഭിക്കുന്ന വരുമാനം തുച്ഛമാണെന്നും പരാതിയുയർന്നിരുന്നു. ഓട്ടോ, ടാക്സി ഡ്രൈവർമാരുടെ വരുമാനം ഉറപ്പുവരുത്താൻ ലക്ഷ്യമിട്ടാണ് സർക്കാർ നടപടി. യാത്രക്കാരുടെ സുരക്ഷ ഉറപ്പുവരുത്താനും ഇതുവഴി കഴിയുമെന്നാണ് കരുതുന്നത്.
മെട്രോ സ്റ്റേഷനുകൾക്ക് സമീപം ബംഗളൂരു മെട്രോ റെയിൽ കോർപറേഷൻ ലിമിറ്റഡുമായി ചേർന്ന് ഓട്ടോറിക്ഷ സ്റ്റാൻഡുകൾ നിർമിക്കാനും പദ്ധതിയുണ്ടെന്ന് മന്ത്രി അറിയിച്ചു.ബംഗളൂരുവിലെ ഓട്ടോ തൊഴിലാളി യൂനിയൻ കഴിഞ്ഞ നവംബറിൽ ‘നമ്മ യാത്രി’ ആപ് എന്നപേരിൽ പുതിയ ആപ്ലിക്കേഷൻ പുറത്തിറക്കിയിരുന്നു. 16,000ത്തിലധികം ഓട്ടോ ഡ്രൈവർമാർ ആപ്പിൽ രജിസ്റ്റർ ചെയ്തിട്ടുണ്ട്. 20,000ത്തോളം ആളുകളാണ് ആപ് ഡൗൺലോഡ് ചെയ്തിരുന്നത്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.