ആവേശമൊഴിയാതെ ബംഗളൂരു നഗരത്തിൽ ഓണാഘോഷം

ബംഗളൂരു: ഓണമെത്തുംമുമ്പേ ഓണാഘോഷം വിരുന്നെത്തുന്നതാണ് പ്രവാസികൾക്കിടയിലെ പതിവ്. ഇത്തവണയും നേരത്തെ തുടങ്ങിയ ആഘോഷങ്ങൾ ഓണം കഴിഞ്ഞും ആവേശമൊട്ടും ചോരാതെ കൊണ്ടാടുകയാണ്. പ്രവാസി മലയാളികളുടെ ജോലിത്തിരക്കും മറ്റും പരിഗണിച്ചാണ് മലയാളി സംഘടനകൾ ഇത്തരത്തിൽ ഒഴിവുദിനങ്ങളിലേക്ക് ആഘോഷം ക്രമീകരിക്കുന്നത്. മാസങ്ങളോളം ഓണത്തിന്റെ പൊലിമയൊട്ടും കുറയാതെ ആട്ടവും പാട്ടവും ഒത്തുകൂടലുമൊക്കെയായി പ്രവാസികൾ ഓണത്തെ നെഞ്ചേറ്റുകയാണ്.

കേരള സമാജം മാഗഡി റോഡ് സോൺ 'ഓണോത്സവ് 2022'

കേരള സമാജം മാഗഡി റോഡ് സോണിന്റെ ഈ വർഷത്തെ ഓണാഘോഷം 'ഓണോത്സവ് 2022' ഡിസംബർ നാലിന് നടക്കും. രാവിലെ 10 മുതൽ സുങ്കതഘട്ടെ ജയ് മാരുതി കൺവെൻഷൻ സെന്ററിൽ നടക്കുന്ന ആഘോഷം കേരള ഭക്ഷ്യ പൊതു വിതരണ മന്ത്രി അഡ്വ. ജി.ആർ. അനിൽ ഉദ്ഘാടനം ചെയ്യും. സോൺ ചെയർമാൻ ഒ.എ. റഹീം അധ്യക്ഷത വഹിക്കും. കർണാടക മന്ത്രി മുനിരത്ന മുഖ്യാതിഥിയും പ്രശസ്ത സംവിധായകൻ ലാൽ ജോസ് വിശിഷ്ടാതിഥിയും ആയിരിക്കും.

അംഗങ്ങളുടെ കലാപരിപാടികൾ, ചെണ്ടമേളം, പൊതുസമ്മേളനം, പഴയിടം മോഹനൻ നമ്പൂതിരിയുടെ ഓണസദ്യ, മെഗാഷോ എന്നിവ ഉണ്ടായിരിക്കും. ജോബി ജോൺ, ദുർഗ വിശ്വനാഥ് എന്നിവരുടെ ഗാനമേള, ചാർളി ജോസ്, സുരേഷ് കുന്നംകുളം എന്നിവരുടെ കോമഡി ഷോ, തൃശൂർ ലെജൻഡ് ഡാൻസ് ഗ്രൂപ്പിന്റെ സിനിമാറ്റിക് ഡാൻസ് എന്നിവ ഉണ്ടായിരിക്കും. പ്രവേശനം സൗജന്യമാണെന്ന് കൺവീനർ കെ. മനാസ്, ആഘോഷ കമ്മിറ്റി കൺവീനർ സനിൽ കുമാർ എന്നിവർ അറിയിച്ചു. ഫോൺ: 9886498182, 8904334810.

കൈരളി വെൽഫെയർ അസോസിയേഷൻ 'ഓണം ഫെസ്റ്റ് 2022'

കൈരളി വെൽഫെയർ അസോസിയേഷന്റെ 18ാമത് വാർഷികവും 'ഓണം ഫെസ്റ്റ് 2022' ഓണാഘോഷവും ഞായറാഴ്ച നടക്കും. കെ.ആർ പുരം ടി.സി പാളയ ഗാർഡൻ സിറ്റി യൂനിവേഴ്സിറ്റിയിൽ നടക്കുന്ന ആഘോഷം രാവിലെ 10ന് മന്ത്രി ബൈരതി ബസവരാജ് ഉദ്ഘാടനം ചെയ്യും.

കേംബ്രിഡ്ജ് ഗ്രൂപ് ചെയർമാൻ ഡി.കെ. മോഹൻ ബാബു, മുൻ കോർപറേറർമാരായ ആൻറണി സ്വാമി, വീരണ്ണ, മലയാളം മിഷൻ കർണാടക സെക്രട്ടറി ടോമി ആലുങ്കൽ, നോർക്ക റൂട്സ് ഓഫിസർ റീസ രഞ്ജിത്, മലയാളം മിഷൻ ഈസ്റ്റ് സോൺ കൺവീനർ കെ. അനൂപ്, സി.ഐ.ടി.യു ഏരിയ സെക്രട്ടറി പി. മുനിരാജ്, കെട്ടിട നിർമാണ തൊഴിലാളി യൂനിയൻ ഏരിയ പ്രസിഡന്റ് സി. രമേശ്, കെ.ആർ പുരം ഹെൽത്ത് ഇൻസ്‍പെക്ടർ ഡോ. ശ്രീശൈൽ, സാമൂഹിക പ്രവർത്തകൻ സതീഷ് നായർ, എയ്മ പ്രസിഡന്റ് ശ്രീലത നമ്പൂതിരി, പി.എം.ഡബ്ല്യു പ്രസിഡന്റ് ശ്രീകുമാർ വെള്ളായണി, സെക്രട്ടറി മോഹൻലാൽ കല്ലറ, എന്നിവർ പങ്കെടുക്കും. ഉച്ചക്ക് വിഭവസമൃദ്ധമായ ഓണസദ്യയുണ്ടാവുമെന്ന് സംഘാടകർ അറിയിച്ചു. തുടർന്ന് തലശ്ശേരി ഡാഫോഡിൽസ് ഓർക്കസ്ട്രയുടെ ഗാനമേളയും കുട്ടികളുടെ കലാപരിപാടികളും അരങ്ങേറും.

സുവര്‍ണ കര്‍ണാടക കേരള സമാജം സുവര്‍ണലയ സംഗമം 2022

സുവര്‍ണ കര്‍ണാടക കേരള സമാജം പീനിയ ദാസറഹള്ളി സോണിന്റെ നേതൃത്വത്തില്‍ സുവര്‍ണലയസംഗമം 2022 മെഗാഷോ 15ന് നടക്കും. മന്ത്രി ഡോ.സി.എന്‍. അശ്വത് നാരായണ്‍ ഉദ്ഘാടനം ചെയ്യും. കെ.പി.സി.സി പ്രസിഡന്റ് ഡി.കെ. ശിവകുമാര്‍, ആര്‍. മഞ്ജുനാഥ് എം.എൽ.എ തുടങ്ങിയവര്‍ പങ്കെടുക്കും. മലയാള സിനിമതാരം മനോജ് കെ. ജയന്‍, രാജേഷ് ഹെബ്ബാര്‍, അംബിക മോഹന്‍ തുടങ്ങിയ സിനിമ സീരിയല്‍ രംഗത്തെ വിവിധ താരങ്ങള്‍ അണിനിരക്കുന്ന മെഗാഷോ ചടങ്ങില്‍ അരങ്ങേറുമെന്ന് സോണ്‍ കണ്‍വീനര്‍ കെ.സി. ഉണ്ണികൃഷ്ണന്‍ അറിയിച്ചു. വിശദ വിവരങ്ങള്‍ക്ക്: 9742704656.