സർക്കാർ സ്കൂൾ ക്ലാസുകളിൽ കാവിനിറം പൂശും: കോൺഗ്രസ് പ്രതിഷേധിച്ചു; ആ നിറത്തോട്​ എന്താണ്​ ദേഷ്യമെന്ന് മുഖ്യമന്ത്രി

ബംഗളൂരു: കർണാടകയിൽ സർക്കാർ സ്കൂളുകളുടെ ക്ലാസ്​ റൂമുകൾക്ക്​ കാവിനിറം പൂശുന്നു. പുതുതായി പണിയുന്ന 7,601 ക്ലാസ് മുറികളാണ്​ കാവിയണിയുക. വടക്കൻ കർണാടകയിലെ ഗദഗ്​ ജില്ലയിൽ നടന്ന ചടങ്ങിൽ വിദ്യാഭ്യാസമന്ത്രി ബി.സി. നാഗേഷാണ്​ ഇക്കാര്യം അറിയിച്ചത്​. സ്വാമി വിവേകാനന്ദനോടുള്ള ആദരസൂചകമായി നടപ്പാക്കുന്ന 'വിവേക' ​പദ്ധതിക്ക്​ കീഴിലാണ്​ സംസ്ഥാനത്തുടനീളം പുതിയ ക്ലാസ്​ റൂമുകൾ പണിയുന്നതെന്നും അദ്ദേഹം പറഞ്ഞു. ഇവയുടെ ശിലാസ്ഥാപനം കലബുറഗിയിൽ നടന്ന ശിശുദിനാഘോഷ ചടങ്ങിൽ മുഖ്യമന്ത്രി ബസവരാജ്​ ബൊമ്മൈ നിർവഹിച്ചു.

സ്കൂൾ എജുക്കേഷൻ ആൻഡ്​ ലിറ്ററസി വകുപ്പിന്‍റെ നേതൃത്വത്തിൽ ഓരോ ജില്ലയിലും നിർമാണോദ്​ഘാടനം നടക്കും. അതേസമയം, വിദ്യാഭ്യാസ മേഖലയിലെ കാവിവത്​കരണത്തിന്‍റെ തുടർച്ചയാണിതെന്ന ആ​രോപണം ഉയർന്നിട്ടുണ്ട്​. സർക്കാർ സ്കൂളുകൾ ജനങ്ങളുടെ നികുതിപ്പണംകൊണ്ടാണ്​ പ്രവർത്തിക്കുന്നതെന്നും വിദ്യാഭ്യാസത്തെ വർഗീയവത്​കരിക്കാനും മതപരമായ ചേരിതിരവ്​ ഉണ്ടാക്കാനുമാണ്​ സർക്കാർ​ ശ്രമിക്കുന്നതെന്നും കോൺഗ്രസ്​ നേതാവ്​ ബി.കെ. ഹരിപ്രസാദ്​ കുറ്റപ്പെടുത്തി. എന്നാൽ, വിവേകാനന്ദൻ കാവിവസ്ത്രം അണിഞ്ഞ സന്യാസിയായിരുന്നെന്നും അദ്ദേഹത്തിന്‍റെ പേരിലാണ്​ 'വിവേക' പദ്ധതിയെന്നും മുഖ്യമന്ത്രി പറഞ്ഞു. കോൺഗ്രസ്​ എല്ലാത്തിനെയും രാഷ്ട്രീയവത്​കരിക്കുകയാണ്​. ദേശീയപതാകയിൽവരെ കാവി നിറമുണ്ട്​. കോൺഗ്രസിന്​ ആ നിറത്തോട്​ എന്താണ്​ ദേഷ്യമെന്നും മുഖ്യമന്ത്രി ചോദിച്ചു. ക്ലാസ്​ മുറികൾക്ക്​ പൊതുനിറമായിരിക്കുമെന്നും വാസ്തുശിൽപ വിദഗ്​ധർ നിർദേശിച്ചതിനാലാണ്​ കാവിനിറമെന്നും സർക്കാറിന്​ അതിൽ പങ്കില്ലെന്നും വിദ്യാഭ്യാസമന്ത്രി പറഞ്ഞു.

സംസ്ഥാനത്ത്​ ഈയടുത്ത്​ സ്കൂളുകളിൽ വിദ്യാർഥികൾക്ക്​ ധ്യാനം നിർബന്ധമാക്കിയിരുന്നു. പാഠ്യപദ്ധതിയിൽ ഹിന്ദുത്വ ആശയങ്ങളുള്ള ഭാഗങ്ങൾ ഉൾപ്പെടുത്തിയത്​ വൻ പ്രതിഷേധത്തിന്​ ഇടയാക്കിയിരുന്നു. തുടർന്ന്​ ചില തിരുത്തലുകൾ വരുത്തിയിരുന്നെങ്കിലും ആർ.എസ്​.എസ്​ സ്ഥാപകൻ ഹെഡ്​ഗേവാറിനെ സംബന്ധിച്ചുള്ള അധ്യായമടക്കം നീക്കിയിട്ടില്ല